السلام عليكم ورحمة الله وبركاته
شلونكم ان شاءالله طيبين ؟؟؟ ... بما انه الحين بدأ موسم الصيف الحلو والغالبيه ودهم يسافرون فحبيت احط لكم وحده من الرحلات اللي قمت فيها مع صديقي الصدوق الصادق الوعد منصفا ... الى شرم الشيخ ... وياعيني على هالشرم هذي ماشاءالله فيها بحر حده حلوو ... اهوه مالح بس حلو اقصد يعني كشاطئ وكعوم وكسباحه وغطس وكل حاجه جميله ^_^
المهم عزمنا انا ورفيجي بعد ماتجولنا في الايام الأولى في اسواق شرم الشيخ وبالمارينا ورحنا حق ألف ليله وليله قررنا ان نروح رحله في الغواصه ترم ترييييم
قصينا تذاكرنا مادري جم طلع علينا بس مو وايد يعني رخيص وشلنا عدتنا من كاميرات وركبنا الباص اللي بيودينا الى مكان الغواصه وطبعا كالعاده لازم نأخرهم انا ورفيجي العالم ايوون مبجر واحنا لازم نتاخر شوي ... حاولت وحاولت ان الاقي حل حق هالمشكله بس ماقدرنا الصراحه مو مهم المهم انه ركبنا الباص ووصلنا الى مكان الغواصه عشان نركب وكان من اهم الشغلات اللي المفروض انييبها معانا في الرحله بطل الماي اللي مع رفيجي .... لأنه يقولك اكو حموضه وملوحه تحت الماي فلازم انعوض الشئ بالشئ
صديقي ممسكا ببطل ماء الصحه ساحبه من راسه تقول قاعد يتل صخله الله يهداه
وقعدنا بالاستراحه ننطر يجهزون الغواصه ... وحطولنا هالاغاني السنعه ... خو ماعندهم الا ام كلثوم بعد شيحطون ؟؟
سماعات هاي فاي ... 7890 واط ... بس عاد خوش اغاني يطلعون اغاني اول مره تسمعهم اهب
واتجهنا الى الغواصه عشان نركب ... وهني احنا في الطريق الى الغواصه ... وهالشاب اللطيف لاصق في مرته ياخي فج ليما الحين ماركبنا وجذي امشبص فيها وخّر شوي ياخوي ماراح تطيح ^_^ ... والله شكله اهوه اللي خايف يطيح مو خايف عليها
وركبنا الغواصه تريريريرم وبأينا حبايب ..
وياحلو الغواصه تريريريرم وبأينا قرايب ..
وانطلقت الغواصه في اعماق البحر الاحمر متجهة الى مكان الغوص ورؤية الشعب المرجانيه
هذيل يختين لاحقينا حسبالهم قاعدين نصور فلم بوليسي والا شي
فيلا فوق جبل على البحر مباشرة ياسلام على هالفيلا ... هذي يقولكم كانت حق ابو رفيجي وحاشها التثمين ^_^ بززززززززززززززززز معليش
هذا مادري شنو مستوصف شاليه ... صندقه مادر شنو بالضبط المهم انه يمه كراسي بحر للتشمس حق شنو مادري والله
ناس يتسبحون .. اكيد بيتسبحون عيل شبيسوون بيطلون بويووهنا يعني ؟؟
ناس يتشمسون .. ياحبهم هالعنجريز حق التشمس ماغير قاعدين تطقهم هالشمس بالساعات ومايصير فيهم شي
الحين خلونا نشوف هالشابين اللطيفين اللي يتسابقون في الدونات البحريه ومروا مشاخيط اللهم ياكافي ... لاحقكم احد يعني ؟؟ يواش يواش يبا ماكو الدنيا للحين بخير الحمدالله
بس جيكوا على اللي عاليسار شوفوا شلون ماسك الدونات بضمير خايف على عمرك ؟؟؟
لايف جاكيت ولابس شخايف منه بعد ؟؟ لايكون بس حسبالك الفك المفترس تحتك وانا مادري ؟؟
وراعي الطراد يعفر فيهم النذل يبي يطيحهم ^_^ اديلوا ياعم ماترحمهومش ياخويا
ولازالوا صامدين الحبايب ومتمسكين عدل
هوب هوب هووووووووووووب جنه شنقلهم فوق
هدي هدي يالطيب ترى يتغشمرون وياك مو وقته يطيحون
ريولك يالحبيب اثبت عدل يابو الشبااااااااب
وطشششششششششششش وطاحوا في البحر ^_^ اقول شيلوا قشكم وطقوها سباحه ليما اليال ترى وايد احسن لكم لااييلكم واحد خبل الحين ويطشركم واهوه مو شايفكم ... يالله هاردلك شبابز دونات
اشتبين انتي ؟؟؟ اي انزين وعليكم السلام اللي بعدووو اشتبين يعني ؟؟
اشفيها اللي يمج متلحفه صاكها البرد ؟؟؟ والا شسالفة خالتها ؟؟؟
اقول مسكي الياهل اللي يمج لايتكرفس بعدين تطقين اصبع مالنا خلق عاد اتصير افلام واحنا ليما الحين ماشفنا الشعب المرجانيه
الحين عاد خلونا ننزل داخل الغواصه ونشوف شكو ماكو تحت البحر
ونزلنا تحت وحبه فوق وحبه تحت
وصكروا الغواصه علينا .... وقعدنا جذي صفين وكل واحد معطي ظهره للثاني ... يعني بمعنى اخر كل واحد حاقر الثاني ومايرد عليه
هههههههه بس ليش جذي ضيج يبا فجوا شوي وسعوا الله يهديكم ترى الوساع حلو وانا اخوكم ... خاوتكم الذيابه ^_^ مالكم امل اخاويكم بل
تعالوا الحين نشوف بعض الصور من تحت قاع البحر الاحمر ونشوف شاللي عندهم ونشوف شاللي عندهم
هذا اتقول جنه بلح تحت الماي
وهذا جنه صماخ ياهل ... مادري جنه من ربع جنكيز خان وربعه شي جذي مايندرى بس اهوه من ربعهم الظاهر
اسماك
وهذيل بعد اسماك بحريه ^_^
انزين انا خابر الواحد غايص عشان يشوف سمج وشعب مرجانيه وهالسوالف مو عشان يشوف اوادم ؟؟؟
يالله يبا خلاص هونا مانبي نشوف لاشعب مرجانيه ولابطيخيه خل نرجع لفندقنا وايد ابرك
وهني لحظة العوده والنزول من الغواصه الزرقاء ولازال صاحبنا امشبص بزوجته مادري شتصيرله
وهذا باصنا العجيب اللي بيرجعنا حق الفندق مالنا ... شدعوه عاد شارينه بفلوسنا خو الفندق وخلاص بعد شنو مالنا ما مالنا ؟؟
ودائما صاحبي في المقدمه وكاشت فيني ماينطرني كله حاقرني اوريك ان ماطلعت عيونك في رحلة راس محمد يصير خير
يالله سلام عليكم ورحمة الله وبركاته ونشوفكم ان شاءالله في الرحله القادمه
هذي كانت رحلة الغواصه في شرم الشيخ ... الصراحه استمتعنا فيها وكانت خوش رحله ... وياعيني على جمالك يامصر
تصوير وتعليق اخوكم دندرن HaMaD