اليوم سلمكم الله بوديكم في رحله الى سفاري ايلاند … وتشمل الرحله المغامره بالقوارب المطاطيه في النهر واللي يسمونها الرافتينغ وبعدها نروح لنشاهد بعض عروض الفيله ونركب البانشيات ونرجع ان شاءالله  عشان اليوم اللي بعده راح يكون آخر يوم لنا في بوكيت وبنقعد على يال البحر ونشوف شاللي عندهم وبتشوفون بعد بعض الاحداث من على يال البحر

لما قررنا نروح نحجز للرافتينغ الكل كان متحمس ولله الحمد ولكن في الطريق واحنا رايحين تردد الحبيب مشعل وقال شكلي ماراح اركب ياااااه شالسالفه يامشعل جان يقول جنها مغامره خطره … بعدين قعدنا نحاول نقنعه ان يركب معانا لكن لاحياة لمن تنادي وقعدنا طول الطريج انقنع فيه

في الطريق الى سفاري ايلاند وسيارة اصدقائنا القروب الثاني اللي معانا  في الرحله

 ومنحنيات ومرتفعات ونزلات وهبدات والمعده صارت خلاط من كثر ما اختلط فيها الحابل بالنابل

ياصلاة الزين ياللي معانا ياللي معانا الكراوان غنى وصحانا وصحانا

ها يامشعل ماهونت ؟؟

اعنبوه داره هذا وين دخلنا بين هالشجر … لانتكرفس يامعود من فوق الجبل ونروح من جيس اهالينا يالحبيــب

ووصلنا بحمدالله ورعايته الى مكان ركوب الرافتينغ وهذيل اللي بالصوره يتأهبون لركوب القوارب المطاطيه لخوض المسابقه … ها يامشعل مالك نيه ؟؟

القروب اللي قبلنا يزهبون شغلهم عشان ينطلقون 

القبطان يعطي تعليماته لأفراد الطاقم اللي معاه عشان يبلشون

احدى الطرقات اللي راح نسلكها في المسابقه … يالله خربانه خربانه زين

وبعدين غصبنا مشعل على انه يركب معانا لأنه اتفاقنا من الأول نروح مع بعض نغامر مع بعض ماكو احد فينا يخون 

احنا الثلاثه قبل الركوب الى القارب المطاطي

انا من اليمين .. بو بدر الحمادي في الوسط .. مشعل على اليسار … لايغركم ترى مشعل اقصر واحد فينا بس كان واقف على صخره

انزين يامشعل انا خابر العالم يسوون علامة النصر … شكو تأشر بيدك بالخمسه ؟؟؟ اخاف بتضرب بالخمس والا يمكن يوعان او شي مني مناك ^_^

واللي بيسأل شلون صورنا ترى في شي اسمه تايمر يعني مؤقت للتصوير .. لأنه ماشاءالله وايد يسالون يقولون شلون تصورون نفسكم

===========

وابتدا وابتدا وابتدا المشوار … تريريريم وآه ياعيني وآه ياليلي من آخر المشوار آه ياليلي

طبعا ركبوا معانا اثنين من التايلنديين المحترفين واللي يعرفون الطريق عدل … واحد في المقدمه دريول والثاني في المؤخره القائد

واحنا متوزعين في المركب نجدف معاهم وانطلقنا ترييييييييييم

طبعا في هالرحله ماغامرنا بأذخ كاميراتنا معنا لكن استعنا بالصور اللي اهمه صوروهم لنا ووضعناهم لكم لكي استكمل الموضوع وتعالوا انشوف الحين مع بعض .. البعض من هذه الصور من الرحله الممتعه والشيقه

كل شي اوكي ياشباب واحنا في المقدمه ياسلااااااام هيه هيه كويتاويه

ومستانسين انه احنا في المقدمه ولكن حدث مالم يكن بالحسبان

الحبيب صديقنا بو بدر … كان شاد حيله شوي وابن الحلال ما انتبه انه ريله (قدمه) افلتت من الرباط اللي في وسط القارب فضربتنا حفره في وسط النهر وحاص شوي القارب جان يطيح رفيجنا بو بدر في وسط النهر … يا الاهي وبدأ ينجرف الحمادي في النهر ياويلتي ويلتااااااه والصخور تتلاطم به يمينا ويسارا … واذا بي انا البطل الهمام مع التايلندي اللي في مقدمة القارب المطاطي .. نمسك في جاكيت صديقنا ونرفعه رفعه وحده جنها ايد وحده اسم الله علينا من وسط النهر بسرعه وبخفة يد غير معهوده قبل ان يصطدم في احد الصخور وجذع الشجر اللي كان على قارعة النهر ياسلام علينا والله ابطال ها ؟؟

شدعوه يبا صار فلم هندي .. خلص اهو

المراد مانطولها عليكم … وفي ظل هالحوسه اللي كنا فيها اختل توازن المركب شوي لأنه الدريول اللي في مقدمة المركب مالنا ساعدني في رفع الحمادي وارجاعه الى القارب فضاعت القياده جان ننحشر بين صخرتين هههههههههههههه يادي النيله مو مترقعين يالله مو مشكله ونحاول ونحاول يمين ويسار جان نطلع القارب من بين الصخور والا على مرة قارب ثاني يضحكون علينا ماشي ياعيال الذين يصير خير ونحاول ونحاول ونحاول لكن تجري الرياح بما لاتشتهي القوارب المطاطيه والصخور البالستيه والاشجار الخشبيه … المهم طلعنا الثواني في المسابقه على المجموعه ككل والأوائل على مجموعتنا اللي كانت معانا في الباص يعني زين الحمدالله طلعنا بفوز صريح  لولا الظروف القاهره اللي صادفتنا في المسابقه

ماعليه يابو بدر هذي حوبة مشعل لما غصبناه يركب معانا الظاهر

ومن بعد هاللويه والحوسه ذهبنا الى حديقة الفيله والبانشيات جان تطق علينا ذيج المطره القويه اللي سالت على اثرها الوديان والشعاب اويلاااااااااااه واحنا بالكويت المطر عندنا قليل ولله الحمد يعني نادر جدا مانشوف مثل هذا المطر علينا بالكويت

ويزداد المطر شيئا فشيئا

شوفوا قوة المطر .. انزين وين عرض القرود ماكو شواذي ليش

ها خايفين عليهم مو خايفين على الاوادم ؟؟ ^_^

ويبلش عرض الفيله

بسطوا الشباب

والمطر ينهمر والأخ متلحف بجيس نايلون

ياعيني حتى الفيله عندهم يسوون مساج ؟؟ يالله هم زين

انزين بالله خوّن الفيل وهوّس شوي على ظهر الادمي اللي تحته شبيصير في اللي تحته اتهقون ؟؟
اعتقد كل عظمه بتلاقونها في جزيره من جزر تايلند

يالله خلونا نروح الحين حق البانشيات ونركب ولازال المطر يطق علينا بغزاره واحنا صامدين الا نكمل رحلتنا ونستانس خو اساس الرحله الوناسه

واحد من القروب اللي كانوا معانا في الرحله ولاحظوا الطين والمطر لكن صامدين ان شاءالله

سكه طويله والبراري قفار والدار تشكي تريريرم من كثر هالطين

درب درب ياعيال خلونا نطوف جزاكم الله خير … مو وقته يخرب الطقطاقي مالك بوسط الطريج

انزين بالله اخترب بريك البانشي مالي والدنيا زلق ومطر وغيله شلون بوقف انا بالله ؟؟ مالي الا ادش فيهم

واحد ثاني من القروب شاد حيله شوي

ماعليه مردها الملابس بالمصبغه

للمحافظه على احذيتك من تلفها جراء الامطار الغزيره اعمل مثل طريقتي ولفها في جيس جمعيه احسن لك والسلام ختام

خلصنا يومنا الماطر ونروح نريح من بعد تعب هاليوم عشان ثاني يوم راح يكون آخر يوم لنا في بوكيت فقررنا ان ناخذه براحه واستجمام على شاطئ البحر على الباتونغ بيتش مقابل الفندق اللي سكنا فيه

يعني انحط كراسي وشماسي ونريح ونتسبح ونركب باراشوت وغيره وغيره

ياحلو هالشاطئ
تاخذ راحتك فيه بالجلوس بهدوء وسكينه وراحة بال

حيث تستطيع ان تتسوق وانت قاعد بمكانك ههههههههههههه يكونون الباعه المتجولين جدامك يبيعون فشق يبيعون ولاعات , رسومات , لوحات , مزامير اي شي تبي تلاقيه جدامك

خل نشوف بعض المعروضات ..

ولاعه على فشق

هذي احدى اللوحات اللي تنباع

وهذا بائع الات موسيقيه

وتقدر تتمتع ببعض المشروبات البارده كالكوكا كولا والسفن أب

يعني مسوين حركه بالقواطي

وانت قاعد في امان الله تشاهد بالقرب منك هالباراشوت اللي يطير وينزل يمك

ياسلام شكله حلو ..

عاش بو جورج  صفقوله ياناس

يامعود خلاص اضحك ترى مو مركبينك غصب .. انت بكيفك اللي راكب

قرر صاحبنا بو بدر ان يقوم بتجربة وركوب الباراشوت فتعالوا نتابع الرحله مع الحمادي رفيجنا لحظه بلحظه

بداية شد الحبل حول خصر رفيجنا وتضبيط الحزام لايتبطل واهو طاير في السما العالي

وبداية الركض عشان يطيرون … يالله شد حيلك … الحياة تجارب يابو بدر … هههه من الحين اشوفك رافع ريولك عن الأرض شالسالفه تو الناس ماطار الباراشوت للحين 

ايخسي هالتايلندي ياهو يتشنقل بشكل مو طبيعي ولد الذين .. عادي عنده يسوي شغلبات ودحرجات واهوه في السما

وهالتايلندي متعلق برقبة رفيجنا الله يغربل بليسه ههههههههههههههه
يامعود خف على رقبة صاحبنا لايموت من ريولك مو من الخرعه

وذهب بو بدر مع الريح

لا اشوه اشوه كاهو عاد بو بدر ماذهب مع الريح … عاد مع الريح ماذهب الحمدالله

وصل وصل اوه يالله بو بدر وصل يالله حيوووه

آوج 

الحمدالله على السلامه يالحمادي عاش الحبيب عاش … ها قولنا عن انطباعك وشعورك وانت طاير بالهوى اوكي ؟؟

الشعور موميت 

وفي ظل قعدتنا الحلوه ومشاهدة الباراشوتات شاهدنا هالباراشوتين يقتربون من بعض وكانوا قريبين جدا

ياربي لايتداعمون الحين 

هووووب وخروا عن بعض ياشباااااب

لا تشابكت الخطوط الظاهر راحوا وطي

لف يمين لف يمين وخروا عن بعض ياصبياااان

لابس عادي ماكو شي بس جذي شغل غشمره الحمدالله ماكو الا الخير ترى

اللي حبيت اقوله انه ديروا بالكم من تقارب الباراشوتات من بعضها البعض لايتشابكون

يعني قبل لاتبلشون وتركبون باراشوت قولوا حق اللي بيركب معاكم يوخر عن الناس ويوخر عن اي باراشوت ثاني لأنه عملية ركوب الباراشوت ماتطول يمكن دقيقتين او 3 دقايق بس

صج العمليه ممتعه وخطره بس الاحتياط واجب واتمنى لكم قضاء اسعد وامتع الاوقات في رحلاتكم وسفراتكم

وخلص يومنا لغاية هني وغابت الشمس عن سماء بوكيت ومن بعدها رحنا نتعشى ونزهب جناطنا عشان نتأهب للذهاب الى بانكوك في اليوم التالي  فانتظروني