بعد الرحلة الحلوه الى جزيرة بي بي نروح حق جزيرة سمعتها وصلت للقاصي والداني لارتباط اسمها باسم جيمس بوند لتمثيل جزء من افلامه على هالجزيرة مادري متى وشنو الفلم بس انه سووه فلم في هالجزيره

طبعا كالعاده لازم نقوم مبجر عشان يمدينا نتريق على مايوصل الباص اللي راح يودينا الى مكان الانطلاق وركبنا احدى العبارات اللي نوعا ما بطيئه يعني تاخذ لها طريج بو ساعه ونص تقريبا واحنا نمشي في عرض البحر خلونا نشوف شوية مناظر مني ومناك على مانوصل الى الجزر اللي ناوين نروح لها

مادري شسالفته حداق قناص اللي هو
ونشوف هالخيمه المنصوبه على هالاسكله مادري شلون قاعدين فيها

الظاهر محطة انتظار باص بحري

وبدوا يوزعون هالفاكهه علينا والبسكويت

ونشوف بعض هذه الجزر الكثيره … واللي يقولون عددها في تايلند تقريبا 3000 جزيره مادري عاد العهده على التايلندي اللي قالي مادري صج والا جذب الله اعلم 

ووصلنا الى المكان الأول من الرحله وهو النزول في قوارب مطاطيه ونايلونيه والتجديف في البحر والدخول الى الكهوف عشان نشوف الوطاويط  كل هالتعب والمغامره عشان خفافيش … هههههههههه لو على الأقل رايحين نحدق وايد احسن شعندي ادش كهف عشان اشوف خفاش ؟؟ زين ماكو قطعه ذهب بالغلط لؤلؤ مرجان ياقوت اي شي ياجماعه …

طبعا الربع اللي معاي خونوا فيني وركبوا مع بعض في قارب واحد وانا توهقت مع منو اركب ؟؟ يقولون لازم اثنين يركبون مع بعض عشان يوفرون المراكب اللي عندهم ويخلصون فاحترت مع منو منو منو يادندرن جان الاقي هالانجليزي وقلتله ها معاي في القارب ؟؟ جان يقولي اوكي يادندرن انا معاك

شنو يذكركم فيه من صوب الأفا من ورى ؟؟ 

مسلسل لوست 

ودشينا داخل الكهف

وناس رايحه وناس راده ماكو تنظيم جيد لحركة المرور ^_^

وهني الربع بو بدر في المقدمه وبن نقدي المنشكح … شنو قاعدين تدورون جرابيع ؟

وهذيل الخفافيش اللي قلنا عنهم

سبحان الله اول مره اشوف وطواط صجي

طاير من الفرحه طاير

وهني لحظة الخروج من الكهف والذهاب الى العباره للذهاب الى المكان الثاني ^_^

الحين بتشوفون شنو صار في الربع  واهمه في طريق عودتهم الى السفينه … طبعا في طريق العوده الحبيب اللي جدام قاعد يهز المركب يمين ويسار يبي يخرع صاحبنا اللي وراه وشوفوا شنو صار

اثاري الماي قام يدخل عليهم بالمركب

وخروا وخروا عنهم بيغرقون  …

يالله بالدور بالدور ياجماعه مايصير اتخطرون

وناس رايحين للكهف وناس رادين … وسوالف ووناسه

ونروح الحين حق الموقع الآخر واللي حاشنا فيه مطر قوي كاد ان يغرقنا ههههههههه

وين رايحين يايبا

وبدا المطر يطق بقوه وبغزاره

لكن ابينا الا ان نذهب ونغامر انا واحد الاصدقاء .. صاحبنا المتعافي شوي مارضا يروح هالمره فقررنا انا وبو بدر ان نركب ونروح

ومن بعد ماخلصنا هالمغامره والعفيسه اللي اعتفسناها

رحنا حق جزيرة جيمس بوند ووصلناها بحمد الله ورعايته

طلع اسمها تابوو ايلاند  واحنا طول هالوقت عبالنا اسمها جيمس بوند ايلاند

خلونا الحين ناخذ بعض اللقطات من الجزيره

الصخره الجيمس بونديه

مادري على شنو متجمعين الظاهر الاسكندر الاكبر كاتب ذكرى على الطوفه 

عاشوا الشباب

رفيجي اقوى منهم  شال الجبل بروحه بزززززززززززززززززززززززززز من قلب

الطريق الى الهاويه

ومن بعدها ذهبنا الى احدى الجزر للاسترخاء والطمأنينه

ليش عاد فوق الشجره ؟؟ جنهم شواذي الله يهديهم خو نزلوا تحت وقعدوا

اخاف بس نهائي الجامبيز ليغ وانا مادري

وخلصت جذي رحلتنا وفي طريق العوده وبما انه الطريق طويل تفاجأنا انهم يايبين لنا احدى المطربات المشهورات اتونسنا بالعباره بالطريج وقالوا انها نانسي عجرم … احنا استغربنا الصراحه من صجهم هذيل والا يتغشمرون ؟؟

بالأخير طلعت بريتني سبيرس مو نانسي

وخلصت وملصت ويت الديايه وعنفصت وانشوفكم ان شاءالله في رحلات قادمه ان شاءالله ^_^