اكمل معاكم بقية تقرير رحلة شانغ ماي في تايلند وراح يكون هذا الجزء الأخير لشانغ ماي وبعدها نعرج على بوكيت جزيرة الجمال … واليوم راح يكون تقريرنا عن بعض الشلالات اللي زرناها … مساكين فينا فقرة شلالات احنا هني اذا ذبحنا عمرنا ننطر المطر لما يطق شوي بقوه وبعدين نروح اي جبل في البحر ونفتح فيه فتحه ونخلي الماي يصب منه يعني شلال واخرتها خمس دقايق ويوقف الماي … الحمدالله على كل حال شنسوي مايسوون عندنا شلالات صناعيه
وصلنا الشلال الأول اسمه سيرثان مادري ثيران اللي هو
في الطريق لمشاهدة الشلال … وهذا القروب اللي معانا من مملكة البحرين الشقيقه .. والله والنعم فيهم خوش قروب اخوانا من البحرين
اشجار شامخه شموخ الشماخ
الطريق إلى الهاوية … ترم ترم … تقريبا هاويه لأنه النزول حق هالمكان يبيله مجهود جبار وتركيز بسبب تبلل الأرض فيه والتزحلق بداعي ومن غير داعي
ووصلنا الى الشلال الأول شوي بعيد لكن هذا اللي قدرنا نوصل حقه
ياسلام يبيله السباحه في هالشلال وتحدي الصعاب
بعدين سرينا واذا الرجل ملت واذا العين ماجاها بلاها … الى الشلال الثاني ويبعد عن الشلال الأول مادري جم كيلو الاكيد انه شوي بعيد
هذا هو الشلال الثاني هم اسمه فيه شي ثيران جذي من هالطقه
وقعدنا نمشي ونمشي ونمشي
وهم نمشي ونمشي ونمشي
بعد نمشي ونمشي ونمشي …. ياااه لي متى يعني ؟؟
جاااان نوصل بالسلامه الحمدالله
يازين رذاذ الشلال واهو يطق بويووهنا ابد مو ناقصك الا صابون زيست وتفرك وتغسل ايابااااه <=== شكو ؟؟
نلغي نظره على الجانب الآخر من الشلال
مبين رذاذ الشلال ها ؟؟ طش طش سباحه عكس مجرى التيار ياعيني عليك ياسبايدر مان
ايضا نظره على الجانب الآخر
زووووووووووووم يابو حمد … قول قول شمزوّم عليه ها ؟ 😀
خل ننزل شوي عند الشلال ونلتقط بعض الصور
هني شفتوا هالمكان هذا … زميلنا بو حمد اللي توكم شفتوه اللي قاعد يصور … تحدى الأخوان اللي معانا بالقروب وقال تراهنون اني اقدر اسبح عكس التيار واصعد لي آخر الشلال فوق واطق راس الشلال وانزل مره ثانيه ؟؟ عاد اهمه ماصدقوه
فكان له ما أراد وسبح عكس الشلال وطق راس الشلال ورد مره ثانيه في دقيقتين وربع … وفجأه !!! جان يقعد من النوم بو حمد واكتشف انه حلم عابر
شرايكم مو جنه تصوير ستيديو :p
شرايكم الحين نشوف بعض اللقطات من مني ومناك
درب التبانه
عناقيد الغرام
عش العنكبوت
بيض الخعفق
وبعدها تغدينا من هالأكل بعد ماطقنا اليوع … وبعدين رجعنا فندقنا عشان انزهب اجناطنا حق مغادرة شانغ ماي في ثاني يوم والذهاب الى بوكيت
في الطياره ثاني يوم ننتظر اقلاع الطياره الى بانكوك ومن ثم الى بوكيت
كل واحد لاهي بكرسيه … في طيران air asia
المشكله في هالطيران انه اول مايصعدون الركاب ويسكرون الباب مال الطياره الطيار على طول يقطه قري ويحرك يااااه انطر شوي خل الاوادم يقعدون على كراسيهم لا مو هامه الحبيب … لا وتقعد وين ماتبي مالك مكان محدد اي كرسي يعجبك اقعد فيه خوش طيران الصراحه هههه … طيران تجاري بعد شنسوي على قد فلوسنا ^_^
تسابق يالحبيب ؟؟ يقولون القومه من الف دينار بزززز
مادري شنو يم مدرج المطار
جان تقلع الطائره متوجهة بنا الى بانكوك ومن ثم الى بوكيت
باي باي شانغ ماي
يحليلها حبيتها هالغيمه
واشوفكم ان شاءالله في رحلات بوكيت في الحلقات القادمه
الى اللقاء … مع تحية دندرن