السلام عليكم ورحمة الله وبركاته
اول شي مبارك عليكم الشهر ... وكل عام وانتوا بخير ... وعيدكم مبارك مره وحده بعد
ويعطيكم العافيه وانعم الله عليكم
وووووو شاخباركم
هذا سلمكم الله الجزء الأخير من رحلة تايلند اللي كانت في العام الماضي ... وتحديدا بالضبط راح يكون من بانكوك المعموره
نصيحه لكل المسافرين لتايلند ... خل
بانكوك اخر يومين ووايد عليها ترى ... لأنها بالفعل تلوع جبدك وتزهقك من السفره
كلها فلاتخليها اول شي عشان لاتعكر مزاجك خلها في الأخير عشان تزهق مره وحده من
السفره وترد ديرتك .. يعني خلها بس حق تسوق اذا حاب تتسوق واذا ماتبي تتسوق نصيحه
اخرى لاتطبها ولاتقعد فيها ساعه وحده على طول اطلع منها
بانكوك مشكلتها مشكله ... اول شي تلوع جبدك بالزحمه يعني تخيل بتروح مثلا الجمعيه اللي في منطقتك تقعد نص ساعه على ماتوصل اذا بتاكسي و20 دقيقه اذا راكب توك توك وخمس دقايق اذا تسوق طقطاقي
اياباااااه عاد طقطاقي شغل عدل هناك الديزل يدش بخشمك ويترسب في المخ ... واذا فكر يطلع منك الديزل يطلع من صبع ريلك هذا اذا فكر يطلع طبعا
مشكله أخرى تواجهها في بانكوك ... الديزل مصيبه ... تخيل وانت قاعد تمشي على ريولك خلاص هونت ماتبي تركب اي وسيله مواصلات من اللي ذكرتهم خو يمدحون رياضة المشي بعد
تحس نفسك وانت تمشي بصالة التزلج
... تتزحلق على رواااااء 
اهو ديزل يخليك تتزحلق ... اشياء
أخرى الله يلوع جبودهم 
تخليك تتزحلق ... شوي زالق يمين وشوي زالق يسار من المصايب اللي على الأرصفه
لا وبعد ممنوع تدخن وتقط الزقاره
على الارض اذا فيك خير دخّن وقط الزقاره راح تلاقي واحد من الشرطه يتربص لك
فيك خير بس قط الزقاره والا
ساحبك الحبيب وصاكك مخالفه هههههههه عاد قيمة المخالفه على الزقاره 2000 بات هذا
الرسمي بس بعد الخصم يقولك خلاص عطني 500 بات ولا جنه شي صار وشكله آخرتها بمخباته
هالـ 500 ولايسجلها النذل 
الحمدالله اني ما ادخن بس هالسالفه صارت مع واحد من ربعنا اللي بالسفره
يالله نروح ونشوف مظهر من مظاهر الزحمه في بانكوك
اي والله ليش السايدين كلهم بنفس الاتجاه .. المفروض واحد ذاهب والآخر قادم
ماشاءالله بالدور بالدور ياجماعه لحد يخطر ... اهم شي السيكل اللي يم الباص واقف بالطابور ورى السياره السودا يعني ملتزم مع ويهه بالمرور ... لو هني عندنا جان تلاقونه راكب فوق السيارات ويخطر
أول سياره واقفه بالاشاره الجيب
الاسود من الزهقه والرطوبه اللي ببانكوك نزل من السياره
يشم هوى يتنفس الصعداء
ياحليل تكاسيهم ... الوانهم وردي وازرق واصفر واخضر واحمر ... صايرين قرقيعان مال ايام قبل اللي يكون في القرقيعان الحلاو اللي على رسمة بقره الاصفر والاحمر
وسيله من وسائل النقل اللي عندهم الا وهي التوك توك ... بس ترى صحي الركوب فيه يعني عادي لاتحاتون من شي
صحيح انه التوك توك الامامي وجميع التكاتوك يطلعون ديزل مادري ثاني أكسيد الكربون من القزوز بس عادي ماكو الا الخير ان شاءالله يبيلك بس كمام تحطه على ويهك وهات ياقز في ربوع بانكوك
وهذي أهداء لكم هالمعزوفه القتاله يالله كليك هير
عاد على هالزحمه شنو الحل ياترى ؟؟ الواحد شلون يخلص مشاويره
مالك الا حل واحد واهو انك تركب القطار المعلق ... اللي يمشي فوق الناس والسيارات
وهذا اهو القطار .... يوديك وين ماتبي في بانكوك وسريع ماشاءالله يفكك من الزحمه والتزحلق اللي على القار والارصفه وتشوف الناس من فوق وانت بعيد عنهم
اعنبوا دار بليسكم حتى عالأرض زحمه ؟؟
الظاهر عندهم طقطاقيز شوو ... عرض طقطاقيات يعني
انزين هذاك عرض طقاقيات هذا عرض شنو بالله ؟؟ اهو شي مرتبط بالسياكل بس شنو وضعهم من الاعراب الله اعلم ... لا ومرقمين بعد البنات ... يمكن عليهم سحب او شي او يمكن اهمه البنات اصحاب السياكل المعروضه
لأنه هناك عادي جدا البنت تسوق سيكل وتروح دوامها ... عاد اوله يالكشه اللي طايره لما توصل الدوام والا الشدو اللي بالعين سايح من الهوى على جنب تقول واحد امبكّس فيها لين قايل بس
المهم ماعلينا ونكمل طريجنا لكي نتسوق ونفتر قليلا في أخر ايام الرحله قبل العوده للوطن
هذا خوش مجمع بس غالي لاتروحون له طاف من امه
وهذا مجمع MBK اللي خبونا فيه ... ماتخلصه الا بعد اسبوع ... اوله يالجذب شدعوه اسبوع خو كله سبع طوابق وتفرهم بجم ساعه
طابقين للملابس ... وطابق للبلعه والأكل ... طابق للتلفونات النقاله والاجهزه الكهربائيه الخفيفه ... وطابق حق الاثاث اشعندي اروح افتر بطابق الاثاث بعد ؟؟
وطابق حق القيمز واللعب وبولينج خو مو مهم اللي ماله خلق يلعب ... وطابق اكسسوارات ومادري شنو ... سويتوه اسكت عاد ماتخلصه بيوم واحد شدعوه عليكم يالبز
عاد الربع سوولهم مخيم عند هالسوالف
شلون مطولين يعني ياشباب ؟؟
ياسبحان الله تكنولوجيا الصراحه
اتحط صبعك الضوء ايي على
الاصبع ياسبحان الله ياسبحان الله
بنشوف الحين تطور آخر ... الظاهر حملة ترشيد وصلت لهم بس هالمره على المشروبات البيبسيه والسفن أبيه
أبـ جيس عاد ؟؟ البيبسي حاطينه بجيس ؟؟ عاد حلاتها لجيس مقضض مني ومناك اويلااااااه تمشي وتخرخر دبق
وبجذي نودعكم من مطار بانكوك الدولي على أمل اللقاء بكم في رحلات أخرى بأذن الله تعالى
من داخل المطار في ممر المغادرون
هو ياملي هو ياملي هو ياملي هو
ياملي ... هيـــــــــــه دمعي تحدر
يطامر على نار هاديه
وهكذا انتهت رحلتنا في ربوع تايلند انا واصدقائي وان شاءالله التقيكم في مواضيع ورحلات أخرى
والسلام عليكم ورحمة الله وبركاته