السلام عليكم ورحمة الله وبركاته
بعد ماخلصنا من شانغ ماي وبوكيت قررنا نرجع لبانكوك عشان نقضي بقية ايامنا اللي كنا حاجزين فيها فقلنا نخليها للتسوق .. ولكن واحنا في الطيارة الداخليه راجعين بانكوك طرت فكره من احد الاصدقاء انه نروح حق بتايا لأنها قريبه من بانكوك وماتحتاج طياره يعني بتكسي نوصل ان شاءالله وكان الوقت المستغرق ساعتين تقريبا فتوكلنا على الله وقلنا بنروح بتايا يومين وبعدين نرجع بانكوك عشان نتسوق
ووصلنا بتايا وقعدنا نحوس شويه على
شان ندور فندق ومن بداية دخولنا لي هالمنطقه مادري انا عن نفسي ماحسيت براحه بالعكس
من بوكيت وشانغ ماي هناك تحس براحة بال ووناسه هني مادري ليش حسيت بالعكس قلت يالله
كلها يومين وطالعين منها نقزرها بعد شنسوي وطلعت علينا الليله بالفندق بـ 650 بات
يعني تقريبا خمس دنانير بالليله 
يابلاش الصراحه
المهم قزرنا ليلة وصولنا في الاكل في والتجول في جم مجمع دايخ وثاني يوم قررنا نروح في رحله في الغواصه الصفراء ترم ترم مادري ليش تذكرت المسلسل الكارتوني الغواصه الزرقاء
المهم مانطولها عليكم السالفه ان في هالغواصه تركب وتغوص وتشوف بعض المخلوقات البحريه من تحت قاع البحر التايلندي .. فقلنا يالله مغامره يديده اشورانا احنا فوقه
ووصلنا مكان التجمع هني في هالعماره الصغيرونه اللي على شكل غواصه وبعدين ياخذونا في باص صغيرون يودونا نركب في احد الطراريد ونروح لمدة تقريبا العشرين دقيقه في هالطراد عشان نوصل المكان المراد الغوص فيه
وتوكلنا على الله وركبنا الطراد ومرينا على هالمناره القتاله اللي من فوق تقول كشك تلفون ماعلينا ورحنا وعبر فينا الطراد وديان وبحور ومحيطات وخلجان ... شدعوه رايحين القطب الشمالي مو حق غواصه
ووصلنا بحمد الله ورعايته الى مكان الغوص وتشوف البحر نظيف شحلاته يرد الروح مافيه اي شائبه تشوبك مني او مناك كلش بتاتا البته ماكو الا الخير ان شاءالله
ونزلنا في الغواصه
وهذا القبطان مال الغواصه يرحب فينا من داخل الغواصه ويشرح لنا كيفية الغوص فيها ويمه تلفزيون يوريك شكو ماكو بره الغواصه وانت داخل سبحان الله اتحس انك راكب شي اسطوري متطور بشكل مو طبيعي ... ماعليه احساس خايس
وهذي شاشة التلفزيون تبين لك
الغواصه واهيه قاعده تغوص شوي شوي لين ينقطع الارسال ... انزين كملوا التكنولوجيا
اللي انتوا فيها ولاتقطعون الارسال خو عادي مافيها شي خنشوف صج عاد غصنا والا تقصون
علينا 
وهني القروب اللي معانا مصدقين السالفه وطايحين له تصوير من امام شبابيك الغواصه
وهالآدمي مادري من وين طلع لنا يتخطرف بين السمج والطحالب والكائنات البحريه
اعنبوا دارك لايطلعلك سمك قرش ويخليك شاورما للسمج الصغير خل عنك التفلسف واركب معانا يبا قاعدين نشوف من غير ماتتخطرف جدامنا
يحليله صايد طحلب بحري مادري عنكبوت ويقص علينا
والله مادري شنو بس الاكيد انه شي يقزز وله شوارب وايد
وهذا جنه يرو صغير ... يعني جرو
يعني فرخ الكلب يعني صغير الكلب اعزكم الله 
وهذا مادري شنو مادري هذا اللي يسمونه الدغس ؟؟ او شي ثاني مادري الصراحه شكله يقول فيه خاز باز متفخ من لغابيبه
ياعيني على السمج اللي رايح راد مادري مو قاعد اشوف فيه اي حلا الصراحه من الماي الخابط
يالله بالغلط طلعت معاي هالصوره
والسبه مايهم الخابط ... لا ويقولون بحر تايلند اتشوف اللي تحت الماي من بعد 20 متر
... اي طل بعين العدو خير ان شاءالله ... حتى 20 سم ماتشوف
يااااااو ياكثر الشوك هني مو شي يعني تسوي روحك الغواص الماهر وتنزل تغوص في هالمكان واتيي صوب هالشوك وتزلق وتطيح عليه يااااااااو حده مو شي
يحليلي هذي صورتي جنها القمر عاكس
على الماي 
بززززززززززززززززز
وبجذي خلصنا من تحت الماي يالله بس
لاعت جبودنا بنطلع بنشم هوى وكنت انا اول الطالعين الى سطح الغواصه ... والله مو
مني من الغته اللي تحت 
وهذا بن نقدي صاحبنا طلع وراي ...
ههههه جنه تغلغص بن نقدي ... هوووب شد حيلك يالله ياولد هانت هانت ... اهم شي
النظاره تحت الماي ليـــــش 
وهذا بو بدر صاحبنا الثاني طلع وراه الحمدالله الربع على ما يرام
وبدأ كل واحد يطالع شكو ماكو وكل واحد يمارس هوايته بصوب
وحده بوحده يعني ؟؟
وبجذي ودعنا الغواصه الصفراء على امل نلتقي بها في الرحلات القادمه ... اي خير ان شاءالله بس ارجع اركبها من زين السمج اللي ماتقدر تشوفه تحت الماي والسبه الماي الخابط ... اعنبو دارهم مادري شمسوين اللي مخلين الماي جذي مايبين فيه السمج
وكان في وداعنا في الغواصه هاللطيف هذا
الى اللقاء مستر جلبوب نشوفك بعد مادري جم سنه واي واحد يروح حق هالرحله يسلم لنا على مستر جلبوب واللي يعافيكم لاتنسونه
وفمان الله