السلام عليكم ورحمة الله وبركاته
في هذا الصيف من عام 2009 قررنا ان تكون وجهتنا ورحلتنا الصيفيه الى أم الدنيا مصر وتحديدا شرم الشيخ .. ياعيني عليج ياشرم وتم حجز تذاكر الطيران على متن طيران الجزيره وتم حجز السكن ايضا عن طريق الانترنت في فندق موفنبيك جولي فيل واللي اكتشفنا بعدين انهم غيروا اسمه الى جولي فيل ماريتيم وايام واحنا ندور اسم الفندق مو عارفينه لين عيال الحلال قالولنا انه السالفه جذي وجذي وحجزنا وتوكلنا على الله ولله الحمد وطرنا الى وجهتنا الى شرم الشيخ ... إلى خليج نعمه
هالسنه يتكون قروب الرحله من 6
اشخاص والحجز كان لغرفتين متجاورتين كل 3 اشخاص بغرفه .. اندور الرخص عادي
وهذي لقطه جويه لخليج نعمه من حبيب الشعب قوقل ايرث الله يخليه لنا والحين بتشوفون ان شاءالله صوره لفندقنا من الجو عبر اثير قوقل ايرث العامر
هذا اهو فندقنا ومكان غرف نومنا اللي حجزناها ... طبعا المنطقه اللي حجزنا فيها اسمها السبورت ايريا وهي شوي بعيده عن المطعم اللي كل يوم نتريق فيه
يعني مشي على ريولك يبيلك 10 دقايق
كل يوم بهالحر طاق درب رايح راد ... بس ماعليه المشي رياضه
ولازم تطلع من الفندق وتمر على الشارع الرئيسي وتكمل لين اخر شي صوب البحر عشان تتريق سهالات كله يهون في سبيل البطن وترس المعده
عدل يابو خمس نجوم عدل
وهذا طريق الذهاب الى المطعم للتريق
انزين وصلونا معاكم يالنحس شدعوه عاد ... وروووح الحبيب بو قاري دازه وراهم جنه مو له
المفروض يسوون مظلات طول الطريج لي المطعم عشان الواحد مايحس بالحر ... شدعوه بيدرون عنا عاد اذا قلنا جذي
هالحمامتين لو هني بالكويت جان صاروا مجبوس حمام
ونكمل صوب حمام السباحه يا الله متى نوصل ... وهالطيب كل يوم يصبح علينا واحنا مارين عليه بس ماكو فايده فينا همنا في بطونا مو صوبه
واخيرا وصلنا للمطعم ... يالله
اكلوا عليكم بستين الف عافيه ... ها ارتحتوا الحين ؟؟ دبيتوا من مالذ وطاب ؟؟
عاد الله يعين اللي عاليمين بو
الاسود بروحه العرباوي والخمسه اللي معاه الباجي كلهم قدساويه ... اش هالتعاسه اللي
عاش فيها طوال اسبوع الرحله
صباح الخير بـ 6 لغات ...اللي عرفت منهم ماشاءالله علي تبارك الرحمن اربع لغات الثنتين الباجي مادري ملوت وين الصراحه
عاد عقب ماتتريق ... وترد شوي الفندق اتريح وتاخذلك شوي قيلوله وتشوف هالقتلى والجرحى اللي مسدحين على السراير جدامك ... مالك الا تنفضهم نفض وتقعدهم من النوم رايحين مسافرين عشان تنامون؟؟
وتطقلك فره في المشايه مالت شرم الشيخ وتشوف هالرحلات مني ومناك وتدور حجوزات للرحلات اللي بخاطرك تروح لها ... الله يالمشايه ... يالله توكلنا على الله
عاشوا ربع القباقب اللي لابسين حفر
وليــه حتى موضة الشماغات وصلتوها لي هناك ؟؟
عاش الجمل ... بروروووو
أحد الاسواق الجانبيه في المشايه اللي تبيع تحف
ياسلام عليكم ... عاد هالله هالله بالعدنيات الطيبه ماوصيكم
اواني نحاسيه
مالك أمل اصعد على هالدرج مينون انا .. اوصل لي اخر شي واتكرفس
شدعوه كل هالدخنه من زقارتج يالطيبه
؟؟ هدي هدي يا الأخت مو جذي الاوادم يدخنون
ها مضيعه ؟؟؟
اي كاهم هني هالصوب
زين على الاقل احسن من صاحبنا في
شعر
احد المطاعم والقهاوي في المشايه
هذيل سلمكم الله اهم اصحاب المطاعم والقهاوي اهم يسوون رحلات اهم يرقصون كل شي يسوون ماشاءالله عليهم
طاحوله دق ورقص
لا ويسوون عروض فلكلوريه بعد جنه صج
صديق الجمل
وهذيل اصحاب القمصان اللي عاليمين
ربع النقدي اللي لابس Gap
خصوصا بو بنطلون كحلي حيل يحبه النقدي وكل مايشوف النقدي بالمشايه يقعد يسولف معاه وضربوا صحبه مع بعض حتى النقدي اوعده يسويله كرت زياره عشان يزور الكويت .. عاد مو تنسى يالنقدي تعزمه بالشيراتون مثل ماوعدته
القادسيه والعربي
انزين ان شاءالله متى توخرون عشان اصور المشايه بالله ؟؟
صارت زحمه يالله يايبا وخروا بصور
زين الحمدالله اخيرا
عاد يقولك تشتهر مشاية شرم الشيخ بالقهاوي المتاخمه على جانبي الطريق وتكتظ بالاوادم اللي قاعدين فيها
عاد نقعد معاهم ونتطمش حالنا حال هالناس
ماشاءالله روس روس
والله مو منك من الزحير اللي حاطه جدامك مخليك متشردغ على الكنبات
صوّر .. زيع .. احسن جمهور احسن تشجيع
ها يالنقدي شتفكر فيه بالاكل ؟؟
لا شكله اليوع مأثر عليك يابو يعقوب
... ميخالف هانت هانت بعد شوي ناكل
قاعده بالغلط
الزميل السابع اللي كان ممكن يروح معانا حاطين صورته بالفندق ... ولكن لظروف اخوه عسى الله يقومه بالسلامه ان شاءالله اعتذر عن السفر
والحين اخليكم مع بعض الرحلات الموجوده في شرم الشيخ مع الاسعار ... ولكن الاسعار الفعليه اقل من المكتوبه بالبروشورات
ونكمل بعد هالبروشورات في رحله الى الف ليله وليله
ملاحظه : ضغطوا على الصوره الصغيره لتشاهدونها بحجم أكبر
