جوله في شرم الشيخ ... الجزء الأول

مساكم الله بالخير وصبحكم الله بالخيرات ... اني ويي كل واحد بوقته نو بروبلم ^_^

بما أن الصيف دخل علينا وحياه الله الصيف والا الشتا كلهم حلوين .. وكل واحد له محبينه وخصوصيته طبعا

اليوم بنروح ان شاءالله في جوله إلى شرم الشيخ وراح اتكون هذي ان شاءالله الجوله والرحله الأولى الى شرم الشيخ لأنه هناك راح تكون عدة اجزاء لشرم الشيخ وراح نتداولها كل وحده بروحها ان شاءالله تعالى

فاليوم خلونا نشوف الجزء الأول وهو بداية وصولنا الى شرم الشيخ وشوية فراره فيها

هني واحنا في طريقنا الى الفندق

هني واحنا بالتاكسي وتونا واصلين الى فندقنا اللي سكننا فيه وهو الموفينبيك جولي فيلا ... لأنه فيه موفنبكين هناك ...

يالله نتوكل على الله واندش الفندق ونروح نشوف شاللي عندهم وانشوف شاللي عندهم ياب الحلا مادري منو انعلمهم وين اوليدهم انعلم ... انعلمهم وين اوليدهم

هني الساحه في وسط الفندق وهذي النافوره ... طبعا اهوه الفندق نظامه مثل الشاليهات وبعيد عن الريسبشن يعني مثل الشاليهات فوق بعض صوب البحر بس ترى على فكره مايطل مباشره على البحر عشان مو تقولون دندرن غشنا ومادري شنو بس قريب منه البحر ترى

طبعا عقب مااتريح شوي بالغرفه واتبدل ملابسك وتلبس ملابس البحر ... خو يقولك هناك على طول لاتطوف شي على طول بدل وروح البحر لاتنطر عشان تشوف البحر شحلاته ^_^ لأنك من كثر اللويه اللي راح تشوفها بعدين على مدى الايام اليايه ماراح يمديك حتى تسبح في البحر من كثر الرحلات اللي راح تسويها وتروح لها

طبعا أول شي روح وجابل البحر ... ييب فوطتك وافرشها على حدا هالكراسي الموجوده عالبحر وانسدح تحت الشمس لين يصير خدك املح .. واقعد تطمش وطالع الرايح والياي

هذي ركبة رفيجي اشحلاتها طالعه بالصوره ههههههههههههه

تستطيع ان تشاهد المراكب والسفن الخلابه في خليج نعمه وياعيني على جمالك يامصر

وتستطيع ان تشاهد الباراشوتات واهيه تطير باصحابها من على الخليج ياعيني والله شي شي ماشاءالله

ترى اللي يبي يأجر عادي ماكو مانع ترى خوش باراشوتات عندهم

شوي وانت قاعد تطالع وتتأمل في الخلق في الرايح والراد

والا يمر عليك هالحبيب ...

ها شكو ماكو مستر هو هو ؟؟ ان شاءالله بس مرتاح في هالاجواء الصيفيه ؟؟

ولييييييه هذا وين راح ؟؟؟

تعال يامعود وين رايح شموديك بين الاوادم ؟؟؟ بروحهم لابسين من غير هدوم مو حلوه الحين ينحاشون منك ويطلع الاكو والماكو يابو الشباب

انخلص من مستر هو هو ... وجذي يطق براسك ودك تتسبح في البحر هههههه

شوفوا المنظر بس شحلاته وانتوا من امه راح تتشيشون على السباحه

والله تبون الصج ترى خوش بحر

غلطان يالحبيب ... ماكو أكبر من هالمفتاح يعطونك اياه الفندق ؟؟ هي هي هي هي

اذا تبي تتهاوش ماله داعي اتييب عجره وتتهاوش عندك هالمفتاح يؤدي الغرض المطلوب ... حشا عجره مو مفتاح بل عليهم ... عجيب المزلّط يابو فلان

الحين خو خلصنا من السباحه بعد شنو تبون اصور لكم واحنا بوسط البحر مايصير خوووو

يالله عاد نقوم ونروح انبدل ... ونقعد شويه على البيسين ههههه يعني حمام السباحه

هذا البيسين مال الفندق  

وليييييييييه هم يبي يسبح صاحبنا اشفيييييييييك عسى ماشر .؟؟؟ شفيك ملهوف على السباحه؟؟

لا انا اقولكم شفيه اهوه كان قصده بس يبي يجرب الماي المالح والماي الحلو عدل بو فلان ؟؟

خووووش فوطه الصراحه ...

الحين عاد انخلص من الفندق والسباحه ونروح شوي نطلع نتمشى على البحر شويه بس هالمره بالليل مو بالنهار ... في عندهم نظام حلو ... وهوه طول ماانت تمشي على البحر مساءا في مثل الممشى تقعد تمشي فيه مسافه طوييييييله على كل الفنادق المطله على البحر وتشوف هالفندق شيسوي والفندق الثاني شيسوي وطبعا كل فندق مسوي عرض خاص فيه ياعشا مخفض .. ياحاطلك قعده خارجيه مثل اللي راح تشوفونها

يامسويلك عرض اغاني ورقص مثل هالفندق وغيرهم وغيرهم من قعدات وحفلات وعشيات ... خو اكو اكل وشيشه مو كله حفلات ودق ورقص عاد ؟؟

المهم انخلص من الممشى البحري اللي على خليج نعمه واندش اشوي نروح المارينا مالت شرم

واهيه قريبه حيل من الممشى ومن الفندق يعني ماكو تطلع على طول والا بويهك هالشارع الطويـــــل

وعلى جانبي الشارع محلات ومطاعم وقهاوي

أول شي اقعد افتر وحوس لاتخلي داعوس ماتدخل كل مكان روح عشان لاتقول ماشفت شي

هذا احد المجمعات التجاريه في شرم في المارينا

طبعا تشوف وانت تمشي هالهوامير والسمج العجيب والربيان وام الربيان وابو الربيان والقباقب على كيف كيفك جدامك ... هذا طبعا مو تشتري وتروح بيتكم ؟؟ لايبا هذا تقوله ابي اتسويلي هالنوع واهوه يطبخ لك وتاكله عليك بالعافيه

هذا ماندري شسالفته اهوه حي ميت ماندري عن امه .. انهوشله مايتحرك فمومهم انعرف خليناه يولي ورحنا عنه

صخره بوسط الطريج يعني منظر

احم الهارد روك ... طم طش طم طش

عاد عقب هالفراره والتعب اقعد في وحده من هالقهاوي وتطمش على الرايح والراد .. حطلك صماخ هالشيشه اذا كنت اتشيش والا هالاكل الطيب اللذيذ واندف عليك بستين الف عافيه ان شاءالله

الحين اخليكم تتطمشون على اللي رايحين ورادين وسوالف ووناسه

ماشاءالله عليهم حتى فوق السطوح قهاوي لوووووووول مستغلينها صحححح

هذي كانت جولتنا اليوم في شرم الشيخ وشلون تقضي يومك في شرم الشيخ اذا ماعندك مكان اتروحله هناك

واشوفكم ان شاءالله انا وصديقي في الاجزاء القادمه من شرم الشيخ

تصوير وتعليق ... دندرن HaMaD