2/3/2004

السلام عليكم ورحمة الله وبركاته

اليوم بوديكم رحله على خط البحر ... وبوريكم مطاعم الكويت المتاخمه على خط البحر ..الحمدالله عندنا خوش مطاعم على البحر وعندنا شاطئ جميل جدا جدا ... ويعتبر من احلى الشواطئ في الدنيا العالميه ... دندرن

نبتدي من صوب دوار البدع واحنا اللي راجعين مره ثانيه

*********************

مطعم أس أس دانه

راح انتهى كأن لم يكن صار واحد غيره الحين

لاصق في مطعم الدانه سابقا مطعم ثاني اسمه زوربا من اسمه يقول انه مطعم اهوازي ... اسف اقصد مطعم يوناني اوكراني شي من هالقبيل .. طبعا الكويتيين نادر ماتلاقيهم في هالمطعم .. انا انصحكم نصيحه حق اللي بيروح هالمطعم يقعد على طاوله يجابل البحر وخل يشوف المنظر الخلاب بس .. اي طل خلاب انتوا روحوا وشوفوا شنو أكو يم المطعم صار دفان دفان ماكو بحر  ماتلاقون الا حفريات وماي ناقع صارله ربع قرن

هم انقرض هالمطعم

*****************

بيتزا هت

نطلع من الدانه انروح شوي جدام .. راح تلاقون 2465050 بيتزا هت للتوصيل زاهبين ... اي بس هذا اللي زاهبين فيه حق التوصيل واخرتها الطلب يوصل بارد لا ويقولولك ترى انييبه لك حار اي خير ان شاءالله ... بس فالحين اتدقون علي وتقولون ترى انت عميل مميز وفزت معانا بعرض بيتزا ثنتين بسعر واحد ... خو شسوي فيهم ؟؟ خو محد ياكل بيتزا في البيت الا انا  المهم نتكلم شوي عن رواد المطعم واهمه من النوع العجيب الغريب مره تلاقيهم اي شي ومره تلاقيهم سنع وزينه اسم الله عليهم   

طبعا غالبيه رواد المطعم من الحجم العائلي اقصد الاكس لارج مادري اهم يحطون شي بالبيتزا اتمتن او شي ... الله اعلم

********************

مطعم كريباوي

راح انقرض ايضا

************************

برجر كنج

برجر كنج البلاجات ... وين ايامك يا الارنب الجائع .. على فكره يومها ماكان عند المطعم الا سياره وحده واقفه يمه ... لاوشكلها بعد السياره مو له نازلين يتمشون على البحر

****************

سوليدير بالاس

مقهى ومطعم ومنتزه ومادري شنو سوليدير بالاس ... هذا يكون عند بافلوز كافيه ... طبعا الشباب على ابو انهم ماكو مواقف كافيه عند المطعم يرزون سياراتهم الكشخه جبال المطعم يعني ترى هالسياره لي ها ؟؟ يعني ياللي يايه المطعم او ماره جدام المطعم ترى هذي سيارتي ويحط له طاوله يم سيارته يعني ترى لي .. ماعلينا نقدر انسمي هالموضوع ماكو شغل ... ايضا انقرض المطعم ذهب مع الريح

************************

بافلوز كافيه

بافلوز كافييييييييييه .... ايييييييييه شغل كاوبوي ماكو؟؟ جذي السالفه اتدش كله بقر وخرابيط ومادري شنو .. الدور الارضي ناس تكانه قاعدين وعوايل وماكو ازعاج ... تصعد فوق صيحه ونجره ولويه وعفسه وصراخ جنك قاعد بحراج سيارات صراخ هالزباين من كل صوب ... طبعا الحين مايبين على البحر اندفن من العمارات اللي جدامه

***********************

دجاج تكا

دجاج تكا ... هذا مسكين ترى ... مكانه روعه الصراحه وقعدته فيري نايس بس الاكل من بعد ماتاكل مااييلك نوم بالليل ... ياناس اكل فيه 6 طن دهن؟؟؟ اي ليش عاد؟؟ شنو ماكل بقره انا ؟؟؟

والله كل مااكل منه بالليل لازم اشوفلي احد يسهر معاي ماانام شسوي خو بعد منغث

ممممممممممممم لا واكو شغله ثانيه بعد ... ماانصح البنات اللي يلبسون تنانير قصيره انهم يقعدون على الجام لأنهم بيصيرون فرجه حق اللي يسوى واللي مايسوى تلاقي الواحد غصب يوقف سيارته تحت المطعم يعني بينطر موقف يفضى والا شي عشان يقعد يطالع فنصيحه ربعنا هني مو شايفين خير يابنات فلاتقعدين على الجام يعني بتصيرين رومانسيه حبتين دشي داخل وقعدي بالوسط هم تقدرين تشوفين البحر وعن العياره عاد والا والله جني اشوف واحد دعله من اخواننا الالمان قاعد تحتج ويخز عاد ماشاءالله كلش يستحون اهمه هالنوعيه من الشباب التافه

*****************************

مطعم هارد روك

من المطاعم الجميله جدا وموقعه استراتيجي ... يغلب على رواد المطعم الجاليه اللبنانيه الشقيقه ... واكله زين ماعليه منقود وسعره معقول

 ****************************

ماكدونالدز

ماكدونالدز المطعم المفضل لدى غالبيه رواد البحر ... على شنو ماادري عاد ... الله يطيح حظ بليسه

بس فيه حركه عجيبه كله يسوونها الشباب بسياراتهم ...يدشون صوب مال الطلبات الخارجيه عشان واهمه مارين من ورا يطالعون اللي داخل واهمه بسياراتهم ... صج ناس فاضيه وتافهين وبعدين يطلعون الصوب الثاني ويرجعون عكس السير ويدشون مره ثانيه ... بالله اهو سؤال الحين ياللي رديت مره ثانيه بتدش يمدي اللي قاعده داخل اتقوم واتيي وحده غيرها؟؟ خو اهيه نفسها مايمديها اتقوم شنو بتشوف يديد لما ترجع مره ثانيه؟؟؟

**********************

مطعم جوني كارينوز

مطعم جوني كارينوز اخيرا دخلته وفي كل مره ادخله اكل منه لازم بعدها ادورلي فراش انام او انسدح ياجماعه والله صج يدوخ مادري بس انا والا الكل تحوشهم مثل هالحاله ؟؟

بس صراحتن امانتن خوش اكل

********************

مطعم برج الحمام

برج الحمام ... هذا توه يديد وايضا دخلته لكن قيل لي في السابق والعهده على الراوي انه الاكل عادي جدا ولكن القعده حلوه جدا وكل شي جدا جدا .... شغله شغل شيشه واكل لبناني حلو ومريح وهادي مافيه لويه في السابق ايضا كان اذا بتروح يعني مثلا طق براسك بيوم من الايام تبي اتعزم رفيجك والا حبيبتك والا زوجتك مرتك حبيبتك ام عيالك ... هذا اذا كانت صج عاد حبيبتك ام عيالك تلاقيك موديها وشرهان عليها بعد ... المهم طق براسك بيوم تتعشى من هالمطعم بالذات شتسوي عاد النفس وماتشتهي ... اتروح هناك والا يقولولك مو بكيفك يالطيب تاكل على مزاجك اهو؟؟ تقولهم ها عيل شلون؟؟ يقولون حط رقم تلفونك واحنا اندق عليك متى مااشتهينا احنا انوكلك دقينا عليك وقلنا لك تعال ... يقولون والله عاد احنا جذي تبي والا اقلب ويهك ... حتى الاكل صار بالدور والحجز .... وعجبي على زمان ماقمنا ناكل براحتنا بس الحين ابشركم تعدلت الامور وصار كل شي طبيعي وعادي جدا تروح اي وقت تاكل براحتك

***************************

دجاج كنتاكي

كنتاكي البحر ... حاله حال اي كنتاكي ثاني بس هذا ميزته عالبحر

*************************

مطعم نينو

مطعم نينو مممممممممممم من المطاعم المفضله عندي الصراحه ... عليه ستيك مو طبيعي يم يم يم ... والاوادم اللي تقعد فيه شوي راقيه ومؤدبه ... الله يستر جان مو الالمان بعد هالموضوع يروحون هناك الله يستر منهم ... نصيحه حق الالمان اكو مطعم جريب صوب الابراج توه يديد خلوكم عليه

*********************

مطعم فرايديز

فررايديز العالمي مادري شاللي مقّوم حظ هالمطعم ؟؟ اهو زين احسن من غيره الصراحه بس فيه عيب صغيرون

طبعا رواد هالمطعم كل شي سياكل  اغتر وعقل برمودا تنانير بناطيل بلايز ... شير يمشي احبال تطير قراطييييييييس كل شي كل شي

المهم العيب  اللي في هالمطعم ياجماعه ... وانت قاعد تاكل تلاقي قطو والا عتوي مار صوبك يقولك السلام يالحبيب شلونك طال عمرك ؟؟؟ ممكن حتة استيكه والا قطعه مكرونه يالحبيب شوفوا الصوره اليايه وانتوا عاد الراي لكم

في هذي الصوره بس اربع قطاوه ماتتخيلون اللي طلعوا من درام الزباله واللي كانوا يتمشون طاقين فره على المطعم جم قطو ... صكروا درام الزباله وفكوا عمركم واشوفكم بالمطعم الياي

**************************

فدركرز

مطعم فدركرز ... والله يمدحون اكله صج عاد ؟؟؟

مااعرف اي شي عن هالمطعم فلاتعليق ... ايضا ذهب مع الريح .... ياكثرهم اللي ذهبوا مع الريح ولم يبقى لهم وجود

************************

لونوتر

لونوتر ... طبعا الاشاعات هني بالديره على أفا من يشيل اذكر قبل طلعت اشاعه انه هالمطعم مايدشه الا اللي لابس رسمي عاد انا قلت بعاند وبروح سبورت .. عاد رحت وييت عند الباب انا قلت الحين بيقولولي وين رايح والا مستقبليني من عند سيارتي جنه محد اييلهم ولاياكل عندهم ... وين اللي تقولون مايدشه الا الرسمي ؟؟ مال كف على ويووهكم !! ويومها بس انا ورفيجي اللي قاعدين ناكل وجم واحد مطشرين مني ومناك من افضل المطاعم الصراحه كأكل ونظافه وقعده جميله تفتح النفس

ياعيني على المناظر الجميله الرائعه  ... معلومه مفيده اتفيد الكل ترى هالمطعم مو لنا

*******************

ابل بيز

ابل بيز ... والله قعدته حلوه بس عاد انت وحظك مع الاكل مره زين ومره هههه لك عليه يالحبيب ... طبعا في اماكن ظلمه داخل يعني وانت تاكل ماتدري انت وحظك قعدته حلوه وهادي ايضا حق الدندره ترى زين

********************************

مطعم تشيليز

جيليز المطعم العائلي والامريكاني بنفس الوقت مرات يحوشه طشّار من الالمان اللي خبركم يدشون ياكلون منه بس شوي على ذرابه هذيل عاد مو مثل احم احم  ماشاءالله هالمطعم اذا رحت له يوم اليمعه والا الخميس من الساعه تسع ماتلاقي مكان كله يقولون انطر خو ليش عاد ؟؟ من الزحمه ترى ها ؟؟ ... نروح للاكل اول ماييبلك الاكل تشوفه حاااااااار طششششش طشششش من حرارته فعاد انتوا اكلوا بسرعه قبل لايبرد

بس زين انصحكم فيه

*******************

مطعم روبي تيوزدي

روبي تيوزدي ... احنا مانخلص من روبي بالتلفزيون تطلع لنا هني بعد على شكل مطعم؟؟؟ لا والاعلان بعد بالاحمر جنه القوملق اللي لابسته في اغنيتها الاخيره ليه بداري كده ولاهو بيداري كده والله يغربلج كده ... طبعا هذا اهو مطعم الالمان اللي اقولكم عنه عند الابراج توه يديد يعني ماادري شسالفته فلاتعليق حبيته بعدين لما راحوا من الالمان واكله لذيذ

************************

مطعم ميس الغانم

ميس الغانم ... هذا مادري شسالفته مره على يمين دسمان ومره على يسار دسمان يااخي اركد بمكان واحد وثول ومادري ليش يوم الاحد يسكر ... يعني ترى مو هامني ها ؟؟ طااااح حظ بليسك امطيحين فيه اغلب شعراء الكويت الفطاحل ... شدعوه عليكم شباب يعني ترى كووول ؟؟؟ خو اشفيها المطاعم الهنديه الجباتي والسمبوسك؟؟ هاااااااا؟؟ نسيتوها؟؟؟ اييييييي الله يعز ايام الفقر صمونة فلافل وبطاط من مطعم الجمعيه الحين ميس الغانم بالاحرى هو مطعم لبناني ماكليت منه الا مرتين فقط

**********************

قصر البردوني

قصر البردوني ... مطعم الدندره اهو شيشه ومطعم وكل شي هذا يكون صوب شسمه  ماني قايل عشان لا تنجرون وراء المهاترات اللي تصير فيه ... خو اقصد الشيشه مو شي ثاني عاد  ... بل عليكم النيه كلش مو صافيه

على فكره ترى اهو بيت وحولوه مطعم الحين عاد انروح حق احلى والذ مطعم على خط البحر

تعالوا معاي نشوفه

V

V

V

V

V

V

V

V

V

عجيب غريب هالمطعم افضل مطعم بالدنيا العالميه مطعم بدر البدور ... انصحكم بالكباب وصمونة الفلافل والبطاط المدور

هذا موقعه في منطقة بنيد القار ... بعد مايبيله تعرفون شنو يعني بنيد القار  اتشوفون شكله من بره تلوع جبدكم لكن تاكلون منه شي عجيب ماودكم تروحون منه  شدعوه فندق السعاده مو بدر البدور ... قائمه الاسعار جدا رخيصه  عشر صمونات فلافل وبطاط بدينار واحد فقط ... يعني بـ 3 دنانير اتعشي فريج كامل على العموم اذا بتروحون له راح يلوع جبدكم اللي اييب الطلب ساعه اتحرقه بالهرن على مااييلك مو عاجبه ولد الذين ودك اتطقه لكن تشوف شكله يكسر خاطرك

المهم هذي كانت رحلتنا اليوم على مطاعم خط البحر في دولة الكويت الحبيبه الغاليه

يالله سلام

تعليق وتصوير ... دندرن HaMaD