رحله الى العزبه

السلام عليكم ورحمة الله وبركاته

عزمنا احد الاصدقاء الكرام في احد الليالي الجميله والهادئه واللتي لايوجد لها مثيل الى العزبه .. عزبته الواقعه في منطقة جبد ... جبد يعني كبد بالفصحى اوكي ؟؟ بس مو الكبد مالت الانسان لا اهيه المنطقه اسمها جبد عاد ليش مادري روحوا سألوا البلديه

المراد مانطولها عليكم طقينا الموتر سلف جغيغيه .. يعني دقينا السياره سلف .. جان نروح لمنطقة جبد المحليه والواقعه في دولة الكويت العالميه ووصلنا ولله الحمد بالسلامه الى المكان المراد وبدأ وصول الربع المعزومين معانا بنفس المكان

وكان في استقبالنا عند باب العزبه هاللطيف

V

V

الجلب بوتشي .. حارس العزبه ^_^

دخلنا العزبه من الباب الرئيسي ... اكيد بيدخلون الاوادم من الباب الرئيسي يعني من وين بيدخلون يعني ؟؟

حديقه جانبيه داخل العزبه .. على فكره ترى اكو ضفادع بالحديقه بس يومها مادري وين كانوا رايحين طاقين فره على البحر الظاهر وتأخروا شوي

نافوره صناعيه داخل العزبه من صنع صاحبنا صاحب العزبه ^_^ والله كشخه بو فلان سبع صنايع والبخت الله كريم

المهم رحنا وقعدنا في القعده الخارجيه في العزبه حيث النسيم العليل .. وكان احد الاصدقاء الافاضل المعزومين قايل العشا عليه ولحد اييب وياه شي وقال بخليها لكم مفاجأه ماراح اقولكم الا لما اتحطون الجدور وقت الطبخ وراح تشوفون شنو يايبلكم .. احنا قعدنا نتسائل شنو يايب هالشاب اللطيف ؟؟ ياترى ياهلى ترى اهو قوزي او مندي ؟؟ دجاج ام سمك ؟؟ بقره ام بعير ؟؟

لانعلم لانعلم الفكر مشوش ولاندري ماذا يخبئ لنا المجهول ... شدعوه يبا صار فلم هندي بو الشباب خلصنا وقولنا شنو عاد

تبون تعرفون شنو بيعشينا ... كا ها اها

قباقب هههههههههههههههههه ياسلااااااااااااااااام عليك ..  والله خوش اكله الصراحه نياهاهاهاهاها

وبدينا بوضع القباقب بالجدور المخصصه للطبخ

ووضع الجدور اللي فيها القباقب على الجوله .. عشان نطبخ اكله انما ايييييييه حتاكلوا صوابعكوا وراها

بس الحين واجهتنا مشكله .. الا وهي انه البهارات مو موجوده شنو انسوي ياترى ؟؟؟ قباقب من غير بهارات مايصير خو

جان يقولي صاحب العزبه امش يادندرن معاي خل نروح مركز سلطان القريب من العزبه وانييب بهارات من مركز سلطان .. ادري الحين كلكم مستغربين شلون مركز سلطان بالجواخير ... مو مشكله خلكم لاتصدقون راح تشوفون بعيونكم الحين

المهم ركبنا الطقطاقي انا مع رفيجي صاحب العزبه متوجهين الى مركز سلطان عشان انييب البهارات .. عفيه على الشطار

رفيجي يهم بتشغيل الطقطاقي عشان انروح لا وبعد ياماها الطقطاقي .. والجلب بوتشي قاعد يطالع جنه مو عاجبه الوضع

المهم رحنا ووصلنا الى مركز سلطان الجواخير

تعالوا الحين نشوف مركز سلطان الجواخير شلون صاير

V

V

V

V

هذا اهو مركز سلطان الجواخير  شرايكم فيه ... كل ماتبون تلاقون فيه

لا وبعد ازيدكم من الشعر بيت ماله داعي تنزل داخل عندهم خدمة سيارات وطقطاقيات .. كل ماعليك تدق هرن والا اتصرخ على العامل وتقوله محمد ... خو كل الهنود والبنغاليه اساميهم محمد .. انت بس قول محمد وكلهم يردون عليك

لا وعقب ماتحاسب يسألك الكاشير ويقولك .. في مركز سولتان كارد ؟؟ بزززززززززز ماعليه طوفوها

اتخلص عاد من مركز سلطان ودك شوي اتريح والا شنو تشوف بالقرب من مركز سلطان ؟؟

ستار بكس ههههههههههه مو مصدقين الجماعه تعالوا تعالوا يبا وشوفوا بعينكم ستار بكس مال شارع سالم المبارك مقابل مجمع الفنار ^_^

V

V

V

V

كاهو لووووووووول

شرايكم بالقعده عجيبه مو ؟؟ ماودكم اتقعدون وياهم .. ؟؟ ترى عندهم بلوتوث بعد

حشا قاعدين بالسالميه مو ابـ جبد

المهم ردينا للعزبه وحطينا بهاراتنا على القباقب وننطر لين مايستوي الاكل وفي هاللحظه تعالوا نشوف محتويات العزبه

هذا منظر عام للعزبه من الدور العلوي ... بس بعرف ليش يابو فلان حاطين هالمزهريتين بوسط العزبه ها ؟؟

ماشلتوهم ليما الحين ؟؟ خو نبي براحه عشان نلعب كره ^_^

وهذي لقطه للقعده الخارجيه من فوق ومحتوياتها

الطقطاقي اللي رحنا فيه حق مركز سلطان ولاحظ تناسق الالوان مع الشيشه والطقطاقي

وهذي لقطات متنوعه للقعدات اللي في العزبه

تعالوا الحين نشوف انواع الحيوانات عزكم الله الموجوده في العزبه

حمام للتطيير والاكل اذا تأزمت الامور ^_^

دجاج ... نعم انه الدجاج وهذا للبيض والاكل والوناسه وتنظيف العزبه من الحشرات ^_^

كاااااااااااااك لاتعليق

نياهاهاهاهاهاها ماااااء ماااااااااء .. اصخول للمناطح والمجاول وشرب اللبن الفاخر هههه عاد موتصدقون مو ملوت امجاول هذيل لاحرام

ارنب نط راح للشط ... انزين ليش بروحه شنو ماعنده صاحبه ؟؟؟

والحين بعد ماطقينا فره على محتويات العزبه وشفنا شنو اكو ماكو فيها والاجواء المحيطه بالعزبه من ذهابنا الى مركز سلطان والقعده بستار بكس ... عاد الحين صكنا اليوع ونبي ناكل قباقبنا اللي طبخناهم تعالوا خل نروح نشوف الجدور شصار فيها

هههه يبدوا انه الاكل استوى على الاخر بس عندي سؤال للحداقه .. ليش اول ماحطينا القباقب قبل الطبخ كان لونهم غير ولما استووا صار لونهم برتقالي ؟؟؟ يالبرتقاله عذبتي حاله

الحين عاد نفرش السماط وانييب الجدور وانطلع قباقبنا المستويه وانحطهم بوسط هالصحون واندف لاتندف وعلينا بستين الف عافيه على قلوبنا وجبودنا ... تفضلوا معانا على العشا لاتستحون ترى خوش قباقب

وسلامي للكل وانشوفكم على خير ان شاءالله في وجبه خفيفه لذيذه غير هذي