مرحبتين ياجماعة الخير .... اليوم عندنا موضوع دندرني موضوع اليوم هو شواهد من شوارع الكويت العامره
يعني مثلا وانت ماشي بالشارع تلاقي الزين والشين والله يكافيكم شر الشين اللي يبط الجبد ومايخلي احد بحاله
فمثلا وانت ماشي تلاقي اللي قاط سيارته بالغساله وبعدين يطلعها والا اهيه كاشّـه
والا اللي راكب مركبة فضاء وقاعد يتمشى بعز الحر والهوى يطق فيه من كل صوب طبعا ماكو لاابواب للسياره ولاجامات عن الهوى انا بعرف لو يطق عليه مطر شيسوي ؟؟ يوقف تحت جسر مثلا ؟؟
وتلاقي اللي مسوي سيارته شقه متحركه ... تلاقي داخل السياره ليتات حمر وخضر وصفر وزرق وكل الوان الطيف موجوده
و تلاقي اللي من يشوف زول بنت كع بريك بويهك ولاجنه في آدمي يمشي وراه بسيارته يقول اسبب له مشكله او شي على العموم عاد هالنوعيه من الشباب عليهم خلق مو طبيعي ... قولوا شلون ؟؟ تلاقيه ورى البنت وين ماتروح خو يبين عاد اذا تبيك والا لأ ... بس فوق هذا يقعد يمشي وراها ليييين يوصلها بيتهم ... بس ترى والله خوش شغله هذي يابنات ... عندهم خدمة توصيل البنات الى منازلهم واذا تبين العكس تلاقينه ثاني يوم عند باب بيتكم ينطرج ومستعد يوديج اي مكان تبين بس انتي ركبي سيارتج وخلي الباجي عليه اهو تلاقينه وين ماتروحين وراج
نروح شوي الى اخواننا السعوديين اللي ايوون الكويت للسياحه.... طبعا الموضوع معروف من الصوره ماله داعي ازيد عليه شي
الحين عاد انيي حق اهل السياكل .... عاد الله يعينكم عليهم تلاقيه فوق هذا يتحرش فيك واهوه على سيكل ... ياحبيبي عن التحرش ترى راكب سيكل انت والله يهوشون لك بالسياره والا انت بالشارع الثاني ... معلق فوق شبه والا على شجره ... الله يحفظكم ان شاءالله بس اقولكم خفوا شوي عاد .. ترى مو كل من ركب سيكل العالم تطالعه .. اكو ناس يسبون ترى ويدعون عليكم دعاوي اتييب اجلكم
انروح حق النوع الثاني من اصحاب السياكل ... وهذا النوع يحب يتفاخر انه عنده صاحبه تلاقيه مركبها وراه وقاعد يفرفر فيها من شارع لشارع ومن سكه الى سكه ... وغرامهم اللي يسوقون يدوسون بالسيكل عشان البنت تتمسك فيه عدل لا يالخبيث المخبث عشان تلصق فيك البنيه ها ؟؟ قول قول الصج
ادري بتقولون شدراك انه اللي مركبها بنيه ها؟؟ انا اقولكم تعتقدون رفيجه مثلا بيحط ايده على رقبته ويلمه يعني؟؟
المهم عاد تبون تضحكون ؟؟ تعالوا شوفوهم اذا مسكتهم الشرطه لووووووووول مايخلي احد مايدق عليه والا تلاقي البنت اللي وياه ماخذه يوووش ... يوش يعني على صوب قاعده وتدقدق تلفونات ويييييي فلانه لحقيني انا مسكوني الشرطه مع فلان على السيكل شسوي انفضحت كل اللي بالشارع شافوني غبره شسوي تعالي اخذيني ...... ودندرن على قفا من يشيل
النوع الثالث من اصحاب السياكل تلاقيهم بس يتيمعون في اماكن معينه ... حشا جنه ماعندهم دوانيه يقعدون فيها ... لا واذا سالتهم قالولك وين نروح كله عوايل؟؟ لوووووووول ماعندهم غير هالسالفه ... بس فوق هذا في اصحاب سياكل محترمين والله تلاقيه ماشي بحاله ولاله شغل في احد تلاقونهم خامرين على التلفون يسولفون ... الله يعين اللي يكلمك الصراحه شلون يسمع ماادري
اىىىىىىىى عااااااااد خلصنا من السياكل طلعوا لنا اهل البانشيات ياشباب المستقبل ترى انتوا نواة البلد ....... حلوه نواة البلد ... يبا لاتضيعون انفسكم في هالسوالف ياخي روح اشتر سياره ابرك لك ... غرامهم اصحاب البانشيات الرصيف ترى كل ماطق براسه طق رصيف وغبّر على الامه وطاحوا فيه العالم سب ولعاين
مممممممممممممم أخر شاهد من شواهد شوارعنا العامره
اعتقد الصوره معبره ولاتحتاج الى تعليق
راعي غنم مالقى مكان يرعى فيه الغنم ملوته يابهم على الخط السريع خو مافيها شي ياجماعه غنم متحضرين شوي مالهم خلق يروحون البر يو الديره على الشوارع الرئيسيه عشان يشوفون الناس اللي رايحه راده
شوي شوي نشوفهم على البحر حاطين فراش وجاي مع حب وسوالف وهذره
ودمتم سالمين
تصوير وتعليق ودندرة HaMaD