السلام عليكم ورحمة الله وبركاته
كنت في زياره حق جامعة الكويت من جم يوم وهي جامعة الشويخ ... في زياره لمجلة آفاق الجامعيه ... وحيث المكان الهادئ والسكينه وراحة البال والشسمه والشسمات
فأول مادخلت الجامعه في طريقي الى وجهتي والا اشوف هالمنظر الحلو ... وهي ساعة بيغ بن بس مالت الكويت مو مالت بريطانيا !!
العاده اتشوف الساعه بروحها ماحواليها الا مواقف السيارات ... لكن هالمره لأ وألف لأ
هالمره غير .. طبعا غير ... جامعة الشويخ غير ^_^
والا اثاري الربع امخيمين عند الساعه @@
ههههههه اشصاير ليش ماليش ؟؟؟عسى ماشر ؟؟ لايكون ضاقت عليكم اماكن المخيمات الربيعيه ؟؟؟ ترى ماشاءالله الديره كلها بر المناطق السكنيه متيمعين في مكان واحد ومخلين الباجي حق الكشتات وطلعات البر ^_^
ساعة بيغ بن وحواليها الكامبينغ ... الخيام بجوار الساعه العالميه
بس بصراحه خوش خيام يذكروني في ملوت الزنوج الحمر ملوت الافلام الامريكيه القديمه .. لاوبعد امحاوطين الخيام بحبال بعد :)
عاد من زين الحبال ملونين بعد ... اي مو يقولك يمشون مع موضة بعض الشباب والشابات هالايام كل لبسهم الوان وفسفوري ومادري شلون صاير ^_^
اوووووه هذي خيمه صجيه مالت كشتات ;)
اي عدل يبا هذا الشغل الصح جذي الخيام ولابلاش
بس شفيها عويه الخيمه البيضه ؟؟ اكيد واحد من ربع بوشعيل متساند عليها ومخليها اتميل مثل حظ غالبية الاوادم
انروح الحين نشوف شغله ثانيه وانا واقف في أحد المصافط والمواقف مالت الجامعه وجدامي احد المباني :)
والا اشوف هالمنظر الحلو وايد
يشرّون الهدوم يعني ينشرون الغسيل ^_^ بس بالكويتي هذا طبعا
انزين تكفى ليش جذي امصففيفنهم ؟؟؟ ماكو شغل صح ؟؟
وانا واقف وعلى مستوى نظري شفت خير اللهم اجعله خير
شفت منظر والله عوّر قلبي اسم الله علي انا كنت واقف في أول المصافط اللي بجوار مواقف الساعه الجامعيه والا خلصت احدى المحاضرات واطلعوا الطلبه بيروحون سياراتهم ... والله حرام طقوها مشيه يمكن فيها كيلو صوب مواقف الطب المساعد عشان يوصلون سياراتهم انزين ليش جذي عاد ؟
انزين هالبنات في الحر بشهر سبعه وثمانيه بالكورس الصيفي شيسوون ؟؟؟ يطقون كل هالطريج عشان توصل القاعه ؟؟ والله على ماتوصل مالها خلق حتى اتطل بويه رفيجتها هالدور شلون بتقعد بالمحاضره ؟؟ ماتوصل الوحده الا لايعه جبدها من نفسها حتى .. انزين وهالشباب المساكين اللي كاشخ وساكب آخر سكبه اذا طق مطر بالشتا شيسوي ؟؟ يعني تخيل جذي فجأه طق مطر وانت بنص الطريج شتسوي ؟؟ الا ملابسك وغترتك وكل بلاويك اتصير شسمه امنقع ابـ ماي ... الله يعينكم الصراحه ... انزين ليش هالمسافه هذي ؟؟
بدال ماتأجرون 100 باص حق توصيل الطلبه من سياراتهم الى القاعات ويطلع عليكم الاجار السنوي بالملايين ... يبا سووا مواقف متعددة الأدوار فوق بعض ويكونون اقراب من الكليات والقاعات بقيمة هالمبلغ وعلى طول ... ليش اتعنون الاوادم ؟؟ انزين وين اتحاد الطلبه مالكم ؟؟ ليش مايتحجون في هالشي اشوف صارلهم سنين وماشفنا شي ... والا بس فالحين اذا صارت الانتخابات ووقت ظهور النتايج اتسوون افلام وكل واحد اتلاقونه مغمى عليه وطايح بصوب ؟؟؟ عشان والله بس يقولون وااااي شفتي فلان شلون طاح غشيان ؟؟
مغمى عليه يعني طايح غشيان بالكويتي ^_^
خو بعد هذي سالفة الانتخابات شغله ثانيه ... لنا وقفه معاها ان شاءالله بالمرات اليايه بس خل اتصير انتخابات يصير خير هههه ^_^
الحين خلونا نروح حق معاناة بعض الطالبات اللي اييون مع سواقهم ...
دريولنا عاش عاش دريولنا بيب بيب ^_^
المشكله انه المكان فيه دواعيس وايد ... والواحد من كثر هالدواعيس اللي بالجامعه ماقام يثبت شكو ماكو
اتلاقي هالهنود امبسطين في احد هذي الدواعيس وحاط له ذيج الفرشه الفسفوريه العجيبه اتقول اوزار امصدّي ... واميمع فيها كل من هب ودب ... يايلعبون جنجفه ... ياقاعدين ياكلون واخرتها يقطون الجياس على الارض ويمشون .. ياطايحين له جذب على بعض مثل افلامهم البايخه وكاشتين في معازيبهم @@
وتلاقي المسيكينه البنيه واقفه عند السياره وماكو احد مامر عليها ماقط له جم حجوه وجم كلمه عليها واهيه تدق عليه واهوه كاشت فيها ومايرد وقاعد يجذب على ربعه ويقول لهم ... انا والله يعرف خمسه بيبي كلوه واجد هلووو ... واهوه حتى صخله ماتطل بويهه
أقول أحقر بعد أكثر ها ؟؟؟
نرجع حق الدواعيس الموجوده في الجامعه ... واللي صارت مرتع حق كل شي مو بس الاوادم حتى الطيور صار لهم نصيب في هالاماكن
أكيد غالبيتكم شاف
مسلسل درب الزلق صح ؟؟ فيه مشهد بالمسلسل بين حسين بن عاقول واخوه سعد لما
رشهم النفط وبغوا يسوون مشروع .. فاحتاروا شيسوون مشروع ؟؟ فكانت من ضمن المشاريع
المطروحه انهم يفتحون مطعم باجه وكراعين واختلفوا شلون يكتبون اسم المطعم .. هل
يكتبونه مطعم باجه أو باكه ؟؟؟ فكانت من ضمن الاقتراحات ايضا ان
يفتحون يم المطعم خباز ايراني جنه مو لهم جذي على طرف مو لهم يعني .. ويفتحون يمهم
فندق اصغير عشان الزبون اللي يتغدى
من مطعم هالباجه يقيّل .. يقيل يعني ينام في وقت الظهيره وهاللفظ كويتي بحت ^_^
المهم نرجع لموضوعنا
فأنا لقيت المكان المطلوب لفتح المشروع وهو هذا المكان اللي بتشوفونه الحين ^_^
ها اشرايكم بالفكره ؟؟؟ مو خوش مطعم؟؟ يعني حلو لما الواحد يروح من صباح الله خير ويتريّق باجه وكراعين ياسلااااااام يمي يمي يمي لذيذ ;)
ترى على فكره الجامعه فاتحه ابوابها لي بالليل يعني يمدي الواحد يتغدى ويتعشى باجه وكراعين ^_^
هذي كانت جولتنا في جامعة الكويت العالميه وشواهدها الحلوه انشوفكم ان شاءالله في المرات والمناسبات القادمه بس قولولي متى انتخابات الجامعه عشان احضر الكرنفال ^_^
تصوير وتعليق دندرن
4/5/2005