موضوع حلقتنا اليوم شواهد من شوارع الكويت الجزء الثاني … راح نتمشى اليوم شوي على جم شارع من الكويت الحبيبه ونشوف شنو يصير في هالشوارع طبعا اول مايطري على بالك تبي تتمشى اتروح خط البحر … حيث الماء والخضره والوجه الحسن وكل حاجه حلوه تلاقيها هناك … ومن كثر مااتفرفر بالسياره عاد يخلص البانزين عندك فشنو اتسوي في هالحاله؟؟ ماعندك الا محطه بانزين وحده على خط البحر الثانيه اتسكرت وليما الحين ماافتحت والثالثه على البلاجات … عاد انت مالك الا محطة البانزين اللي عند حديقة الشعب … وانت قاعد اتصب بانزين ماتشوف وماتسمع الا صراخ هالبنات اللي يصارخون من العياره غالبيتهم طبعا اتدور هالصوت من وين ياي ؟؟؟ والا من طلقة الدبوس اللي في حديقة الشعب .. عاد انت استمتع بالمناظر الجميله اللي راح تشوفها ياملفع طاير من صماخ وحده من قو الطلقه او ترجيه محذوفه عليك من فوق … الله واكبر تقول السما قامت تمطر تراجي والا اذا كلش كلش مطر صناعي من حلوج الاوادم اللي يركبون هاللعبه … واذا ماكو هالشغلات كلش مايالك شي من هالخير؟؟؟ ماراح تشوفون عزكم الله الا ……..تعالوا نشوف الصوره
اعتقد عرفتوا قصدي
…………………………………
اتصب بسيارتك بانزين وتقعد تتمشى ماتدري وين الله قاطك … مالك بالفلك دوار .. وعسى ماتشوف لك زول بنت الا ركضه وراها ماتدري والا اخرتها مبطله لك الجام وتقولك ها فلان شلونك؟؟؟ والا تطلع خالتك او بنت عمك … عاد لحظتها شنو اتكون ردة فعلك؟؟؟؟
والا عاد اذا ماعندك شغل بس تقعد تتحرش في بنات خلق الله وتدور لك اي حجّه عشان بس تتحرش واتكلم البنت وفجأه تطيح عينك على دراعه البنيه طالعه من الباب ومسكره عليها …. ياسلاااام خوش سالفه عشان تتحرش ها؟؟
اتخلص من الفراره والقز ورى البنات تبي اتريح شوي وتوقف تجابل البحر … يعني رومانسي والا شنو اتشوف ؟؟؟
*************************************
اتدش شوي داخل السوق تبي تطالع شكو ماكو والا تلاقي واحد شاب لطيف آخر يعني بيتحرش بوحده شوفوا لما الواحد يوصل مرحله مو عارف شنو يبي بالضبط وفي أي مكان يالله المهم اتحرش والسلام …ماقول الا مالت بس
تطلع من بين الاسواق العامره ترجع للبحر وتطيح عينك على مكان القليل منكم يعرفه ….. ياخور او بمعنى اخر جاخوووور بوسط البحر
نعم جاخور لاتستغربون شوفوا وسكتوا
بالصدفه والا اشوف اثنين عمال يصلحون الاعلان التجاري اللي طاح من جراء العاصفه الهوجاء اللتي ضربت البلاد قبل مادري جم يوم المهم انه هالعاصفه طيحت الاعلان واثنين عمال بيصلحون الاعلان
شوفوا …….. دندرن
بعد هالرحله المكوكيه شي طبيعي يصكك اليوع وتبي تاكل مالك الا تروح تدور لك اقرب مطعم عشان تندف … تندف يعني اتهف يعني تبلع يعني تاكل يامال العافيه على قلوبكم ^_^
يمكن هالمطعم مايعجبك … امشوا خل اوديكم مطعم ثاني على دخلة شارع الحب بس لاتلوموني اذا صار فيكم شي ترى انا مالي شغل
اهوه مطعم مكسيكي مادري شسالفة امه بالزبط ماشوف الا هالجراسين لابسين لبس هالمكسيكان وقاعدين يطالعون بعض ويطالعون الاوادم جنهم يقولون ياولاد الايه ماتيجوا تاكلوا عندنا كلاكوا الدود والنمل السود .. أطيعه تأطعكوا
آخر شي عاد لما تخلصون من البلعه مالكم الا الحب وانتوا اللي رادين بيوتكم … خو الاكو والماكو قام يروح على هالشارع حتى اللي بيتهم بالجهراء والا الاحمدي قام يروح على هالشارع تسأله تقوله ليش يالطيب دربك مو هالصوب؟؟؟ يقولك يبا شنو ابي احب فلازم امر على هالشارع عشان العالم يحبوني … اهيه بالاساس النظريه غلط بغلط … فلاتعليق
وبما انه الكل قام يمر على هالشارع … حتى هالشاب اللطيف قال يبي يجرب حظه يمكن يحوشه من الحب جانب
نجّار يقز على شارع الحب
ودندرن
وخلصت وملصت ويت الديايه وعنفصت
نشوفكم ان شاءالله في الجزء القادم من البرنامج الرياضي
شواهد من شوارع الكويت
دندرن
العوده لصفحة شواهد من الكويت