السلام عليكم ورحمة الله وبركاته
انتهت انتخابات مجلس الأمه الكويتي لعام 2009 ونجح اللي نجح وسقط اللي سقط وفرح اللي فرح وحزن اللي حزن يالله عاديه السالفه كله عشان خاطر الكويت يهون
نقول مبروك للي انجحوا كلهم وهاردلك للي ماحالفهم الحظ خيرها بغيرها تعوضونها ان شاءالله في المرات اليايه بس اهم شي ماتيأسون شدوا حيلكم وان شاءالله اللي يبي الفوز يلاقيه
عاد الحين بالنسبه للي انجحوا واللي يرحم والديكم خلوا الكويت بين عيونكم ومصلحة الوطن والمواطنين مو تقزرونها خلافات شخصيه بين فلان وفلنتان واخرتها ماكو انجازات بالمجلس
قطوا الخلافات ورى ظهوركم وتعاونوا مع بعض ترى ملينا كل مره نجره ولويه وقرقه ودندره خلاص يوووبا ماصارت هالكلام هذا
على العموم خلونا نشوف بعض الاجواء الانتخابيه اللي صارت في الفتره اللي طافت
طبعا وبما اني مو سوبرمان ولاني ماكينه اروح مني ومناك فكانت جولتي على جم دائره فقط ويسمحولنا باقي الدوائر اللي مارحتلهم ان شاءالله اذا الله قدرنا وصارت انتخابات فيما بعد نقدر نمرهم
واللي عنده صور في دوائر متفرقه وحاب يعرضهم يراسلني وحاضرين ان شاءالله للطيبين والطيبات
بسم الله نبدي
مادري شمدخله هني مال الدي أتش أل الظاهر مستعيل عالصوت بيصوت بسرعة الحبيب
انزين دامج متوهقه في الباج اللي على ظهرج خو لفيه وحطيه جدام اكو كتابه من ورى كافي ليش هاللويه .. هذي نصيحه وانتي عاد براحتج
يالله نبلش الحين في الخدمات المتوفره لبعض المرشحين
شاني وسفن اب ويمكن اكو بيبسي بس مو مبين بالصوره شي حلو يخفف من
الحر شوي ويسحن الجبد 
زين ماكو كاكاو او بطاط عشان تكمل السالفه
وبعدين عندي سؤال ليش حاط جيس اسود على رقبتك من ورى ياحجي ؟؟
عند الخرافي غير ... كرواسون وفطاير جبن وزعتر وعصاير منوعه ... يالله التنويع حلو
ياعيني عالمعجنات شغل بيت ترى
ياسلام عليك يابوعلي ... شغل عدل ترى ولذيذ الصراحه
عاشوا الشباب يعطيهم العافيه ... اوصلت الماجله ياجماعه حياكم
بس بعد الواحد ماله داعي يتغدى او يتعشى يومها كافي ياكل من مالذ وطاب وبعدين اذا بغا يحلي يحلي مايتوهق الناخب
الجيش الأحمر يغزو الدائره الثانيه ... ماشاءالله تبارك الرحمن
اشكثرهم يالله موفقين ان شاءالله
بو علي وإياك واليأس .. اكيد مانيأس ان شاءالله
والطيبين وايدين ان شاءالله يعمرون الديره ويشوفون المصلحه
العامه لاتحاتي يابو علي 
زين انا خابر الشمس فوق مو عالجنب ليش حاطين الشمسيه هالصوب
اجل اجل الكويت لاتزال بخير وبتظل ان شاءالله طول عمرها بخير
بس عاد يالله انتوا اعملوا من اجلها وان شاءالله كل شي يصير اوكي
انزين ماشاءالله على كثر هالشماسي ولا احد فيكم كسرنا خاطره
وقالنا هاك شمسيه ؟؟ شدعوه يبا
اجري اجري اجري وصلني اوام وصلني وصلني اوام وصلني ... شوي شوي
يالطيبه شفيج دايسه 200
عليكم ألوان يالله سترك
بس والله شكله مريح بالمشي يبيلنا نجرب واحد نفس هالطقه بس عاد
مو هاللون
هوب هوب ياراعية الموتر حجيه اوقفي صوتي لنا شدعوه
فاصل ونواصل
شجره مثمره
تستاهل الدكتوره انجحت ان شاءالله نشوف منها الخير للديره
والله خوش فكره بدال مظلة حق السياره حط الباجات ويخففون شوي من الحر
سبحان اللي جمعهم على طاوله وحده
مادري
وبعدين لما تغرز تعالوا طلعوني وانقذوني وانجدوني خو مو زين للسياره يالطيب مو زين
استراحة محارب
الله يحفظك ان شاءالله ونشوفك بين النواب في المجلس مو بس اترشح
اي والله وقتك يالبرّد البرد يعني آيس كريم يعني دندرمه
مافيه الا العافيه ان شاءالله مريح شوي من التعب عادي عادي ياجماعه حر حر ماينلام
لاينام صاحي صاحـــــــــي
اي هذا اهو الثلج زين بهالجو ... حلاتها واهيه نايمه الفلبينيه
اتغشها اتقط عليها ثلج ... ترى كلش ماراح تقمز ابد
ودي اشوفك تشيل هالثلج بشهر 1
والله هذيل المساكين .. كل شي عليهم العالم اتوصخ وهذيل ينظفون وراهم يالله يعطيكم الف عافيه وعسى الله يعطيكم على قد نيتكم
وينه البيذان ؟؟ ماشفناه
متحمس يحذف بتاوين بين الناس
الله يبرد عليكم دنيا وآخره
نواف بو شيبه يشابه حمود فليطح جنه
درب درب
يامعوده دخلي السياره لاتطيحين مو وقته ترى
زحمه يادنيا زحمه ... عاد اتوقع انه غالبية اللي يكونون بالشارع
بسياراتهم مالهم بالتصويت ولا هم يحزنون خصوصا اللي بالشاميه
ينتظرون دورهم بتوزيع الباجات والكروت
لا منو يقول الشارع توصخ
اي ليش زعلانه جذي شاللي حصل
مركبج طبعان والا ماوصل
شالسالفه ؟؟
يبا مو طراره الأخت
اتوزع حالها حال الباجي
انا مو قاتلني الا الكابين اللي فوق بعض .. يالله هم زين يمكن واحد يطير الثاني موجود
ماشاءالله تبارك الرحمن عسى الله يخليه لأهله ويحفظه
يوزع حق المرشح عبدالله الأحمد سلم قلبه اسم الله عليه
داروها وجبات الشباب
اتصالات على الناخبين عشان اييون يصوتون يالله ياجماعه لحد يتاخر مابقا شي
تجييك على اسماء الناخبين اللي ماحضر يدقون عليه ... عاد ياااو مو شي الواحد يكون معطيهم كلمه ويدقون عليه والا جهازه مغلق
وين الباجات ؟؟
يقولون حاشتهم ازاله
ماشاءالله بكل مكان قاعدين في الدبه .. في السله .. زين بعد مو باقي الا فوق السياره بعد
هم زينه القعده تحت محطة انتظار
الباصات عشان الشمس الحاره لاتطقهم
عرض الوان شعر
تابع لما قبله هم لون غير للشعر
ماشاءالله انا بعرف جم درجه لون حق شعور البنات ؟؟
في احد مسوي احصائيه بهالشي ؟؟
من امه حاشتهم حالة الزهقان في بودي الوانيت
فوق سور المدرسه ؟؟ يايبا ممنوع
مايصير صفقه وشيلات
ومستانسين ان شاءالله دوم
وفجأه
تريريـــــــــــم
جان يقلب الجو من شمس وحروره الى غيم ومطر
وبدات قطرات المطر ترفرف على الموجودين
هوووووب نحشه .. يالله ميري سوي ركضه عشان في مطر واجد كوي
يالله دخيلك ... اسم الله عليها تعابل في الكرسي بتحطه على راسها عشان المطر
طريج طريج يابنات احتلوا المظلات
كلهم واحنا اللي كليناها
وليــــه ماكو مكان يأوينا من المطر ؟؟
اي يبا مضبط روحك جاكيتك مطري منه
وفيه
وانا لي الله ... الله كريم الله كريم
وبجذي اخواني واخواتي المشاهدين انتهت جولتنا الانتخابيه في عدة دوائر ومناطق الكويت العامره
اسأل الله لي ولكم الصحه والعافيه وان يوفق الاخوه والاخوات النواب اللي فازوا لما فيه مصلحة هذا البلد العامر
محدثكم من قلب الحدث بن دندره