رحلة الريفيرا الفرنسيه

السلام عليكم ورحمة الله وبركاته

عدنا من جديد في رحله جديده إلى الريفيرا الفرنسيه وهي عدة مناطق اشهرها نيس , كان , موناكو , مارسيليا , تولون ومناطق أخرى زرتها ساتحدث عنها من خلال التقرير

French Riviera Nice Cannes Monaco Antibes St. Raphael Menton

بدايه بتكلم عن بعض الشغلات اللي ممكن تفيد القارئ من حجز الطيران والسكن والمواصلات والاكل فهي شغلات مهمه جدا بالسفر

الطيران : كانت رحلتي على متن الخطوط القطريه .. طبعا هالطيران ماشاءالله مايحتاج شهادتي يتكون من اسطول رهيب ورحلات متعدده لاغلب بلدان العالم ناهيك عن خدمات الشركه نوعا ما كانت الرحله متعبه لان فيها نقطتين توقف حيث كانت الرحله من الكويت الى مطار الدوحه ومن ثم من الدوحه الى ميلانو نتوقف ساعه تقريبا بعدها نطير الى مطار نيس السعر كان 203 دينار كويتي عاد انتوا حسبوها للي يبي

السكن : حجزت 5 ليالي في فندق راديسون بلو Radisson Blu Hôtel Nice

كان السعر نوعا ما غالي بـ 510 دينار كويتي للخمس ليالي لغرفه مطله عالبحر لشخصين من غير افطار

الفندق بشكل عام نظيف ومريح والانترنت مجاني بكل انحاء الفندق

توجد خدمة ايقاف السيارات بسعر 25 يورو لليوم

وهذا موقعهم عن طريق بوكينغ اضغط هني

ملاحظه مهمه بخصوص السكن في هالفندق يتميز بالهدوء مافيه ازعاج حتى في الشاطيئ المقابل المكان هادئ .. لكن مافي يمه لا سوق ولاشي فقط محلات صغيره كبقالات

اذا خرجت من الباب الخلفي للفندق راح تلاقي على يسارك في بقاله صغيره ويمها مطعم صغير هذا قزرنا فيه افطارنا كل يوم اكله جيد الصراحه وسعره رخيص ويمه صيدليه

اما اذا اتجهت يمين على مسافة 200 متر تقريبا راح تلاقي بقاله يبيعون فيها عرب وامامها مطعم عربي حلال يبيعون فيه مغاربه يبيع شاورما وكباب وهمبرجرات هذا بالنسبه للفندق اللي حجزت فيه

مقترح آخر بالنسبه للسكن .. اذا خرجت من الباب الرئيسي للفندق باتجاه الشاطئ على يسارك وعلى مسافة تقريبا 3 كيلو يوجد الميريديان Le Meridien Nice

ميزة هذا الفندق انه قريب من المدينه القديمه والتسوق ومطاعم ماكدونالدز ومكاتب حجز السيارات ويوجد بالقرب منه ايضا مطاعم كثيره منها الحلال

لكن يعيبه الازعاج فهو في منطقه مزدحمه لانه يعتبر مركز المدينه مابين البحر والمدينه القديمه والسوق

المواصلات : سعرها مرتفع جدا جدا بالنسبه للتكاسي خصوصا اذا ودك تروح رحله برايفت كذلك اسعار الرحلات تقريبا الخمس ساعات للفرد الواحد بمعدل 60 الى 70 يورو واغلبها صباحا

نصيحتي تاجير سياره نفس ماسويت .. على فكره هم تاجير السياره مو رخيص نوعا ما غالي انا عن نفسي أجرت سيارة سمارت صغيره جدا يادوبها تشيل شخصين لمدة 3 ايام بسعر 323 يورو

ومحدودة الكيلومترات يعطونك 250 كيلو باليوم لكنها ارخص واوفر من التكاسي بشكل عام تاخذ راحتك متى ماتبي تطلع وترد براحتك

اعتقد هذي اهم شغلات تكلمت فيها بالسفر والان نشاهد التقرير المصور واذا في اي شي نسيته فاسمحولي

العنابي يحلق بنا الى الريفيرا الفرنسيه

سبحان الله هذا احنا فوق الغيم ولكم ان تتخيلوا روعة المنظر … كأنه قطن سبحانك ياربي

وبانت ملامح نقطة التوقف في ميلان الايطاليه كان الوصول بعد شروق الشمس مباشرة

بعض من مدينة ميلان الايطاليه ,, متوجهين الى نيس

وهنا بدت ملامح مدينة نيس الجميله

ولازلنا نحلق فوق مدينة نيس ندور الطبَه … بس تعبنا من السفره

ووصلنا فندقنا مثل ماذكرته لكم فوق راديسون بلو

اطلالة الغرفه على البحر والشاطئ وهالشجره مأذيتنا ماتخلينا نشوف على راحتنا

وهذي صوره للمطعم الخلفي للفندق اللي كل يوم نتريق فيه اسمه Brasserie restaurant

طبعا قزرناها اومليت وخبز .. والحلو ان يم المطعم لاصق فيه مخبز اذا ودكم ببعض الجبن والخبز

سيارتنا العزيزه اللي اجرناها اعنبوا دارها هالقوطي بـ 323 يورو لمدة 3 ايام عيل لو مأجر بورش جم بيطلع ؟؟

بس الحلو بانزينها مو غالي وماتصرف وخفيفه وبكل مكان تسفطها ماتتوهق بالسفطه كلش

نصيحه اخرى اذا بتاجرون في نيس اخذوا سيارات صغيره لان مسافطهم صغيره جدا السيارات الكبيره ماتدور عندهم فمن جذي مسوين مسافطهم صغيره

يالله تقهووا حياكم … ونبلش الجولات والرحلات

طبعا كانت السفره اساسها تصوير ومايمنع ان نستانس ونشوف اماكن جديده اول مره نزورها

واول زياره كانت للـ أنتيب

وهني في طريقنا للانتيب

هذي بعض شوارعهم عشان تاخذون فكره

وصادف بطريقنا عرس فرنسي ومسوين زفَه وقلنا وياهم ديد ديد

ووصلنا الى احد شواطئ الانتيب الصغيره .. شاطئ هادي تقدر تمارس فيه السباحه بعيدا عن الازعاج

ولازلنا في الانتيب

خلاص بس ليَل علينا الليل لنعود وثاني يوم قررنا نروح لمدينة كان الجميله

تتميز هالمدينه بميناء كبير جميل على طول الميناء مطاعم وكافيهات واذا صادف يوم ويك اند عندهم لازم يسوون عروض عالميناء

ميناء كان

بعض من مقاهي ومطاعم كان المطله على البحر

وفي ظل فرارتنا شفنا هالطياره وقلنا خل ناجرها تطق فينا فره على جزيرتين بالقرب من مدينة كان طبعا المده بسيطه جدا تطق فيك فره وتردك .. قلنا نجرب وكان صديقي اول مره يركب هليوكوبتر

بسم الله توكلنا على الله ونشوف بعض الصور

وهذي جزيرة lerins island

ونرجع للميناء

مدينة كان بالليل ومطاعمها شابه ليتاتها

خلوا يوم كامل في مدينة كان فهي تستحق للامانه فيها محلات كثيره وماركات عالميه ومطاعم ومكان جميل

ومن ثم نعود لفندقنا بالليل

وهالكارافان لازال سافط بنفس المكان من اول ماوصلنا ماتحرك

وفي اليوم التالي قلنا بنروح للجهه الاخرى صوب موناكو ومينتون مرورا بمدينة ايزي Eze

مدينة Eze

ونكمل طريقنا الى مدينة Menton القريبه جدا على الحدود الايطاليه

ونصل الى مدينة Menton

مدينه جميله صغيره عفويه جدا اهلها خليط طليان على فرنسيين والاهم من هذا كله فيها ماكدونالدز حق الاكل

طبعا مالنا الا فيش فيليه زرعت بطونا من الفيش فيليه

فيها متحفين قرب بعض واحد قديم وواحد حديث دشينا القديم

وهذا المتحف الحديث من بره

الحين ناخذلنا جوله في احياء المدينه الجميله

Menton

وبعدين نحدر ونروح لمدينة موناكو

منظر لكازينو موناكو في قلب العاصمه مونت كارلو والذي صمم في عام 1879

ميناء موناكو

Casino de Monte-Carlo

بعدين نعود ادراجنا الى فندقنا

جنه طريق رقم سبعه للحبيب غرندايزر

ونخطط في الذهاب الى مكان انا اخترته شخصيا من غير مايعرف صديقي ليش رايحين للمكان سوا انه منظر وشاطئ وصادف يومها الصبح مطر شديد لكن اصرينا على الذهاب … الحافظ الله سبحانه

المطر ينهمر على شباك غرفتنا في الفندق

وهني ننطر سيارتنا العزيزه على ماتوصل من الكراج والمطر لازال ينهمر صباحا

وهالطيب شافني اصور قال الا يصورني … عاد تطوف علي تصورني من غير ما اصورك ؟؟ مايصير يالحبيب

تاكسي ينطر ركاب لعل وعسى

واحنا بالطريق بدت تخف الامطار الى ان وصلنا الى مدينة Frejus

وهي مدينه يكثرون فيها الكواشيت فيها اماكن للتخييم بس من نوع ثاني

هذيل مخيماتهم … كل واحد عنده كارافان ويسفط تحت اي شجره ويكمل بقية رحلته في اليوم الثاني ان اراد او يكمل قعدته بالمكان

بحيره يم مخيماتهم

ونوصل الى مدينة سانت رافيل St. Raphael

وهو المكان اللي انا ابيه وفيه تم انزال فرقتين عسكريتين اثناء الحرب العالميه الثانيه في اغسطس 1944 واطلق على هذه العمليه عملية الفارس السندان وهو بالقرب من جزيرة

Île d’Or

وهي جزيره خاصه استلهمت خيال الفنان والرسام هيرجيه مؤلف روايات تان تان وألـف رواية الجزيره السوداء مابين عامي 1937 و 1938

احدى عربات انزال قوات التحالف اثناء الحرب العالميه الثانيه موجوده كنصب تذكاري

وهذه اهي الجزيره اللي الف روايتها الفنان البلجيكي هيرجيه .. تان تان والجزيره السوداء

احد القوارب على الشاطئ للي يبي يتمتع في السباحه في المكان

ونعود بعد ذلك الى شاطئ فندقنا … ونشوف الطيبين كل واحد يمارس هوايته المفضله بالمشي والقواري

غلطان على هالعدادات اللي بالسياره … هذا ماله داعي كاميرا لتحديد السرعه الشرطي اللي يوقف عند الاشاره يشوف جم قاعد تمشي icon_lol.gif

ونروح للمدينه القديمه في نيس … وفيها السوق للي يبي يتسوق ومطاعم وذات سكيك ضيقه جدا للي يحب المدن الضيقه … اترككم مع بعض الص

ياويله اللي يتحرش ويقرب

هذا التك تك مالهم

شوارعهم وسكيكهك الضيقه في البلده القديمه

احد مداخل البلده القديمه

واخيرا وليس آخرا في الليله الاخيره في نيس اخذلي فترة راحه ونقاهه في الفندق في المسبح وتبدأ بتوديع المدينه على أمل العوده لها لاحقا

آخر غروب في مدينة نيس ولازال الكارافان على سفطته امام الفندق ماتحرك

وننطر طيارتنا والمطر ايضا ينهمر لاستكمال رحلتي الى مدينة أخرى … سترونها قريبا ان شاءالله

يالله يالربع يا اصدقاء الرحله اخرتونا ترى

واللي حاب يتابع بقية الصور اللي مانزلت في التقرير فهناك الكثير والكثير في حسابي على الانستقرام حياكم الله

Hamad_dndrn

استودعكم الله الذي لاتضيع ودائعه

Page Views: #