السلام عليكم ورحمة الله وبركاته

تذكرون رحلات المدارس اللي قبل أكيد ... تذكرون لما يقولون حق الصف اليوم عندكم رحله بيــــه عاد شوفوا شنو يصير حزتها تصير هيصه وهلليله مو طبيعيه

لا والضحك كله لما يقولون لنا فجأه يعني من غير سابق مقدمات ولاشي جك بم والا اكو رحله أنزين شدعوه عاد قولوا لنا قبلها بيوم مايصير جذي خو خلوا الواحد يكشخ على الأقل ^_^

المهم ماطولها عليكم وتعالوا نشوف شكان يصير واعتقد لازال يصير بعد ^_^

طبعا في بداية الرحله الكل ماشاءالله عليهم ينزل عليهم الأدب والشطانه كلها تروح ياسبحان الله ... كل هذا عشان مايكنسلون الرحله

والمدرسين كل شوي ذالينا ترى انكسل الرحله واحنا مساكين بس نبي نطلع من هالمدرسه  ويطيحون فينا تجعم هالمدرسين وانقول يالله مو مشكله الله كريم ... بس بعدين يصير خير نياهاهاهاهاها

عاد انتوا ركبوا الباص وبعدوا شوي عن محيط المدرسه وتبدأ الشطانه مره ثانيه تطلع ... عاد أخذ من باصات تعبانه بس يالله نبي نطلع

طبعا في بداية الرحله الكل مستناس وتلاقيهم حتى ريوق ماتريقوا بس بيطلعون من المدرسه بأي شكل من الأشكال

وبدأت الرحله ويصير مسابق على الكراسي داخل الباصات وكل واحد يبي يقعد يم رفيجه والا رفيجتها والا اللي يبون يقعدون يم الدرايش مادري شنو الحكمه بس جذي 

ومطامر ومادري شنو داخل الباص وهذي تقعد مناك تبي تشوف وذيج تبي تقعد هالصوب تبي تشوف ^_^

وكله كوم واللي يقعدون آخر شي هذيل بروحهم كوم ثاني ... يعني ترى احنا اقوى شي في الباص واحنا الشطانه ومادري شنو لووووووووووول خير ان شاءالله ومايخلون أحد مايطيحون فيه تخزز بالشارع والمشكله تلاقيهم زعاطيط ويتحرشون ببنات خلق الله ههههههه

أحد مظاهر الشطانه اللي تشوفها بالطريج .. تلاقي الشباب ماشاءالله مسوين سمره بالباص وتطقطق بالباص قالبينه طبل بحري من الايقاعات اللي سووها بالباص ... وسايق الباص كومار لسان حاله يقول ... سنو هذا في شباب مال كويت كلوو يسوي طقطقه في باص راس مال انا يفتر من ازعاز ... ازعاز يعني ازعاج بس بالهندي

شوي والا تلاقي اللي مطلع راسه من دريشة الباص ههههههه اشتبي مطلع راسك خير يبا في شي ؟؟

يعني شوفوني ترى انا موجود في الباص   انزين منو درى عنك بس؟ دخّل راسك اهو بس وعن الخمبقه

عاد وشوفوا لما يوصلون حق المكان اللي رايحين له أول ماينزلون الطلبه يوقفونهم المدرسين والمدرسات صفيّن ويقعدون يعدونهم تقول شيسمونه للبيع   ها اكتمل العدد ؟؟ اي ابله كاملين مافينا أحد ناقص ^_^

هذا في بداية الرحله ... 

طبعا من هالاماكن هذي ... اول شي يفكرون فيه معرض الكتاب شي لابد منه يعني دام انكم طلبه لازم تروحون معرض الكتاب وتشترون كتب وفي نهاية الرحله بس ثلاثه والا اربعه اللي اشتروا كتب والباجي ليش ماشريتوا ؟؟ ههههههه مو منهم مساكين منكم انتوا خليتوا الرحله فجأه ماعندهم فلوس يشترون كتب هىهىهىهى يعني يادوب الواحد يايب معاه مصروفه اللي يشتري فيه من المقصف ^_^ هالدور تبونه يشتري كتاب بو اربع دنانير؟

هم عندكم بعد المتحف الوطني والمتحف العلمي عشان يتثقفون عيالنا ماشاءالله

ويروحون هناك بس يشوفون الحوت بو عظام مادري اذا للحين موجود والا لأ ... ويشوفون الهيكل العظمي ومصارينه اللي طالعه

ويدخلونهم القبه السماويه في المتحف الوطني فلم بو ربع ساعه عن كوكب المشتري وزحل وهالطقه .. اللي يسمعهم يقول جنه عاد صج بيروحون له بالواقع خو كله بالاحلام   ويالله حياالله من زار وخفف خلصت الرحله ^_^

لا والرحله البايخه لما يقولون يالله بنوديكم ندوه حق مدرسه ثانيه ...... من صجكم مودينهم رحله حق ندوه ؟؟

اهمه همهم الحين الرحله وانتوا مودينهم ندوه ؟؟ اقص ايدي اذا أحد استفاد شي من الندوه

وآخرة الندوه هوشه بين طلبة المدرسه الأولى والمدرسه الثانيه الدخيله على مدرستهم لووووووووووول

وحلاتها عاد تصير ندوه بناتيه ... يعني الهوشه اتصير بين بنات هههههههههههه اولااا ياهو بيصير تمجّع شعور وتحذف شباصات وكل ابله تدافع عن طلبتها يعني اهمه الزينين وبالصج موكلتهم .... حشاكم

بس الفتره الأخيره قمت اشوف يودونهم رحلات حق شاطئ انجفه وماكدونالدز وبرجر كنج وهالطقه على البحر ... هههههههه شنو الفايده من الرحله تكفه ؟؟؟ ينظفون الشواطئ يعني ؟؟ خو اكو ناس حق الشغله ... شكو مودينهم هناك ؟؟

بس انا ابي اعرف هذيل من وين يابوا هالكره وقاموا يلعبون فيها ؟؟؟

خوش رحله قزروها صح لعب كره وأكل وقز في ماكدونالدز هذي الرحلات اللي يبونها شباب وبنات المدارس مو مودينهم حق ندوه ومادري شنو ^_^

وتقارب الرحله على الانتهاء ويبدأ الكل في الامتعاض من قرب انتهاء الرحله ... ويبدأون بتجميع الطلبه والطالبات جدام الباصات هم عشان يعدونهم مره ثانيه وليــــــه ماصارت يبا كل شوي عادينهم ؟؟ ويعدونهم والا ناقصين جم راس لوووووووول وين راحوا ؟؟

أثاري الافكار طالعه من الطلبه والطالبات عشان لايردون مبجر حق المدرسه

وأول فكره تطلع يضيعون جم طالب عشان يقعدون يدورونهم ويتأخرون في الرده للمدرسه لوووووووووول

والا يطولون في الأكل كل واحد يقعد ساعه يتمطط في الأكل ... خو كلها صمونة فلافل  وبطاط شكو ساعه اتعلج فيها ؟؟

والا اللي مضيعة جنطتها والا شباصتها والا أمطتها ^_^

أمطه طايحه بالشارع شلون ماأدري تكفى شلون طاحت الأمطه من تحت الحجاب ؟؟؟

والا بعد تلاقي اللي قاعدين يحوسون في المجمعات عشان يطولون الرحله ومايردون مبجر ... ويقعدون الأبلات يدورون عليهم واخرتها يلاقونهم عند مال الملافع والنظارات

وكل وحده عاد تقعد تبدع في المجسمات الموجوده ... خو بيجربون الملفع الفلاني على النظاره الفلانيه

ولما يطيحون عليهم الابلات ويزفونهم  صارلنا ساعه ندوركم وانتوا هني ؟؟

وييييييييي ابله ماقلتلج لفتي اختربت وقاعده ادور ملفع غيره شسوي مايصير ارجع البيت جذي والا الشمس عمت عيوني ابله وقاعده ادور نظاره حق عيوني

اهييييييييييييه يامعوده يعني ماحلت النظاره واللفه الا الحين ؟؟ ولما يقولون لكم اشتروا كتب من معرض الكتاب تقولون ماعندنا فلوس ها ؟؟ الحين طلعت الفلوس يعني ؟؟

وبعد عناء ومجهود طويل يتم تجميع الكل ويركبون الباص ويردون المدرسه ^_^

عاد الحين الطلبه والطالبات يفكرون وليـــــــه متى يطق الجرس مالنا خلق ندرس والا العاده آخر حصه اتكون عربي لوووووووووووول أم الملاقه

وتلاقي الصف الثاني اللي معاهم بالرحله مستانسين عليهم العاب الحصه الأخيره هياااااااا وطاط طااااااااط يحرّون الصف اللي عليهم عربي

ويوصلون المدرسه والا الصف اللي عليهم حصة العاب ومستانسين ماخذها مدرس العربي بدال حصة الألعاب لووووووووووووووووووووووووووووووووووووووووول

وطووووووووووووط طووووووووووط خلصت الرحله

وان شاءالله تكونون استمتعوا في هالرحلات

تصوير وتعليق دندرن HaMaD