السلام عليكم ورحمة الله وبركاته

بما انه هالايام الجو بدى يتعدل وصار الجو حليو ويساعد على المشي وانفتاح القريحه والشريحه ... خلونا انروح نمارس رياضة المشي في بعض الاماكن في الكويت ... ها فيكم شده والا بعد ماكو لياقه ؟؟ خو ماكو مشكله بعد كلها مشي لاتقولن مافينا شدّه ... يالله نتوكل على الله

اول شي خل نتكلم عن بعض اماكن المشي في بعض مناطق الكويت ويعتبرون الاشهر تقريبا واللي احب اروح لهم دايم .. ماراح نتكلم عن كل المماشي لأ بنتكلم عن ثلاثه فقط وانشوف شكو ماكو ^_^

اول شي ممشى السره ... وبعدين ممشى مشرف ... ومن ثم ممشى البحر صوب المركز العلمي

نبدأ في ممشى السره ونشوف

هذا ممشى السره .. نتكلم شوي عنه اهو بصراحه يعتبر من افضل المماشي في الكويت لأنه خفيف وموطويل وايد عشان مايتعب ولايفجج هههههه ... خو تعرفون بعد ماكو لياقه فلازم الواحد يدور المكان المناسب في الوقت المناسب ... مممم مشكلته اذا رحت تمشي بالنهار يأذيك الذباّن لوووووول الذبان يعني الذباب بالفصحى ... تقعد اتكش في هالذبان يمين ويسار وايدينك صايره مشاشات يامني يامناك ولااتييك ذبانه دايخه وننننننننننننننننننننن وطب على عينك والا على شيسمونه بالحلج ياك ياك ياك بس ماعليكم ترى زين خوش ممشى ^_^

انزين خلصنا من النهار خل نروح نتمشى بالليل ... يعني الحين بتفتكون من الذبان ؟؟ اوكي خلصنا من الذبان خو الذباب مايطلع بالليل صح ؟؟ شنو يطلع لكم بالليل؟؟؟ ماكو تقعد تمشي وتدوس على هالنمل ... وغالبا مايكون من نوع نمل بو دبّه العود ولييييييييه يعني وين ماانطقها عويه ؟؟ ياذبان بالنهار والا نمل بالليل ؟؟ بس يالله مو مشكله هم حلو عاد انتوا تجاهلوا هالامرين ولاجنكم شفتوا شي

انخلص من الحشرات انروح حق حشرات اكبر شوي واهمه الصبيان هاللي مأذين الاوادم بالقواري ياشيط يقحص مني ياشيط يقحص مناك ... واذا زفيته وقلتله انت ماتستحي على ويهك ؟؟؟ يقولك ماسويت شي ياسلام ؟؟؟ عيل هالتقحص على الاوادم شنو يسمونه ياصبي ؟؟

وكله كوم واللي حاط ديوانيته على الممشى كوم ههههههه ... ماااتمر بنيه الا طاحوا فيها رواد الديوانيه خز ... خوش رواد

انخلص الحين من ممشى السره ونروح ممشى مشرف ... وياعيني على جمالك يامشرف ^_^

هذا ممشى مشرف العامر ... هالممشى حلو ولي فيه ذكريات حلوه وايد ... وطويل وايد ولو تقعد تمشي فيه اليوم كله ماتخلص يطيح حظك وينهد حيلك وانت تمشي فيه ... الزين فيه انه واسع ماشاءالله ونادر مايكون فاضي يعني ترتاح نفسيا وانت تمشي يقزر عليك الوقت وانت تطالع بالاوادم ... مشكلته ربع هالبانشيات الله يهديهم امشاخط بالممشى صاير سباق الربع ميل حشا مو ممشى ويغبرون على الاوادم ... لاوالحلو في هالممشى برمضان ... تعال قبل الفطور وشوف الاوادم اللي صافطين سياراتهم ويايبين معاهم كراسي وفرشات ومساند وتكايات عشان يقعدون على اطراف الممشى وتمقل في خلق الله ... يبا ترى اسمه ممشى مو مقعد :P

وزحمممممممممممه سيارات واتشوف اللي يمشون قليل والباجي صافطين ويطالعون بس

ورايحين ورادين ووناسه وتمقل وعنفصه وماكو شغل وهذا حالهم في ممشى مشرف

واللي يروح ممشى مشرف اكيد ملاحظ عزكم الله الجلب  اكو جلب لايث بروحه كله يحوس بالممشى اهو مسكين مايسوي شي ... هذا مادري شسالفته ... الظاهر يجيك على رواد الممشى كل يوم منو حضر ومنو ماحضر ... الله يذكره بالخير واحد من الربع طحت عليه هناك كل مايمر عند المكان اللي يتواجد فيه الجلب هذا يقعد يركض يعني ترى انا مو خايف من الجلب بس قاعد اهرول ههههههه

بس هم على فكره حلو وايد هالممشى

انروح الحين حق ممشى المركز العلمي على البحر

من احلى الاماكن اللي الواحد يقدر يتمشى فيها حيث الهواء النقي والنسيم العليل اللي يرد الروح ... واهم مافي الموضوع انه الشقيق احد رواد هالممشى ^_^ يمتد ممشى المركز العلمي من صوب المارينا كريسنت لغاية المركز العلمي في منطقة رأس السالميه مرورا بمطعم هارد روك ... عاد هذا لنا وقفه معاه ان شاءالله بس مو الحين بعدين

هذا مطعم هاردروك اللي على البحر

طبعا مرورا في المعالم الموجوده على طول خط البحر هناك وتقدر تتمتع بالمناظر الجميله والخلابه وانت تمشي

فمثلا تقدر تشوف طيور النورس الجميله تطير يمك وحواليك وتستمتع في صوتها اللي مادري شلون صاير

وتمشي وتمشي وتنسى نفسك ويليّل عليك الليل وانت مو حاس ^_^

وتشوف منظر الغروب والشمس لما تختفي ورى المباني منااااااااااااك صوب برج التحرير

هذا بشكل عام ممشى المركز العلمي ... ولكن هناك في عوامل مشتركه او سلبيات مشتركه تصير تقريبا في جميع المماشي اللي في الدنيا العالميه تقريبا

وهي بعض السلبيات اللي ان شاءالله ماتأثر في شي  ومنها مثلا لما يتيمعون ربع ويروحون الممشى

انزين تكفى انت رايح ويه ربعك تتمشى ... رفيجك اللي بالوسط القزم هذا اللي رابطه شكو يايبه وياك ؟؟؟

يااخي في ناس في يهال في حريم كبار يخافون مايصير جذي يعني الوحده بدال ماتروح تستانس اتحط ايدها على قلبها من تشوف هالنوعيات هذي بالممشى وخوفها كله لاينهد الجلب عزكم الله ويركض وراها ... لايقولك انا رابطه .. انزين في ناس وايد يفجون الرباط ويخلونه يعني ترى مايسوي شي ... انا اقول خله ببيتكم وتعال روحك وايد ارحم وابرك ... اخاف بس يمكن الجلب بيسوي ريجيم بعد ؟؟

والله يمكن كل شي جايز ^_^ اذا في هذي معذور خلاص

الحين عقب هالمشي وهالوناسه وكل شي بسألكم سؤال شيكون موقفكم لما تكونون بالممشى وسيارتكم بعيـــــــــــــــــده ويطق عليكم مطر قوي ؟؟

أعتقد وقتها بتصير افلام مالها أول ولاتالي اهي ملابس راح تترجخ اهي شعور راح تعتفس وحلاتها ماكو مظلات بالمكان هههههههههههههه فلم فلم هىهىهىهى ... انا عن نفسي عشت هالموقف ويومها كان المطر قوي حيل طبعا ماوصلت السياره الا صاير دوشق اسفنج وصابين عليه سطلين ماي ... ^_^

وتحياتي لكم وان شاءالله تكونون استمتعتوا في هالمماشي الحلوه واشوفكم ان شاءالله على خير في مماشي الكويت الحلوه

أخوكم دندرن HaMaD