السلام عليكم ورحمة الله وبركاته
اليوم بتكلم عن أحد المطاعم ... انا ماراح اقول اسمه ولكن هو في منطقة كيفان المحليه ... انتشرت في الفتره الاخيره ولله الحمد مطاعم كثيره في الكويت ولكن اللي استغرب منه هو المنيو اللي يحطونه اصحاب المطاعم ... يعني بالذمه ليش جذي اسامي الوجبات .. لي هالدرجه ماكو شغل والا ماكو وجبات يعني ؟؟
قبل طلعولنا ربع شارع المطاعم بالشبح والحوت والفيراري واللمبرغيني والفلوكس حتى الوانيت بوغمارتين بعد :)
الفتره الاخيره قاعدين نشوف اسامي وجبات خطيره الصراحه ... ماراح اطول عليكم تعالوا نشوف المنيو مع بعض وانعلق شويه
1- فطيرة اسمها ... عبود كسر خاطري ... بالله يعني هذا أسم ؟؟ يعني شلون كسر خاطرك عبود ؟؟ شايف أحد ماسكه وغاسل شراعه مثلا ؟؟ شايف أحد لاعن ابو جديف ابو اللي خلفه يعني ؟؟ شنو هالاسم ؟؟ شنو يعني عبود كسر خاطري ؟؟ لاحلاتها جذي رايح اقول ابي هالوجبه .. اوقف عند المطعم واللي يعافيك عطني عبود كسر خاطري .. ماكو اطول من هالاسم يعني ؟؟
على العموم انا اقول نتواعد على يوم كلنا ان شاءالله ونروح المطعم ونوقف هناك وكلنا بصوت واحد وصوت عالي ها ؟؟ وانصرخ حجّي حجّي عطنا فطيرة عبووووووود كسر خاطري يالطيب ... معلومه مفيده للكل ترى فطيرة عبود كسر خاطري ارخص فطيره موجوده باللسته ودي اعرف على ماذا تحتوي هذه الفطيره ... والله شكلها بس خبز خالي من غير شي :)
2- فطيره اسمها حلوه وكذابه .. ممممم من الاسم امبين انها وحده الظاهر والله اعلم انه كان امرقمها وقزرتها عليه جذب بجذب فمن جذي سمّا الفطيره بهالاسم
3- فطيرة دلوعة كيفان ... هذا جنه ايميل وحده اسمها دلوعة كيفان لووووووول ... يعني ترى امسوي جو حق البنات ها ؟؟ يعني يابنات كيفان ترى في فطيره عليكم ... لاويعني دلوعه ترى ها ؟؟ تعالوا اشتروا هالفطيره ... واخرها شكلها بيض وطماط
4- فطيرة تشيكن على المزاج ... يعني الديايه الجيكن ام المزاج تخيلوها جذي ... حاطه ريل على ريل وقاعده بقهوه واتشيّش ... خو هذا المزاج بعد شلون صاير ؟؟؟ شنو تشيكن على المزاج اشبتحط فيها زياده كلها فخذ ديايه وانقز بعد اشماله على المزاج ؟؟؟
وغيرهم وغيرهم من الاسامي العجيبه مثل رحومي ومثيره ومادري شنو
لاوآخر شي حاطلك يقول .. فطاير خاصه لمرضى السكري ... ياعمي خل مرضى السكري بحالهم الله يكون بعونهم اشناوي عليهم بروحهم الاكل بالحسره عليهم مساكين اشناوي عليهم حجّي ؟؟؟
على العموم وفي
الختام .. لايسعني الا ان اشكر الشخص العزيز واللي زودني في هذه اللسته العجيبه
وماقصرت طال عمرك
ونشوفكم على خير ان شاءالله اخوكم دندرن