هاي .. قوه .. شلونكم .. شاخباركم .. ان شاءالله طيبين .. انزين
اليوم سالفتنا عن شارع الحب … طبعا الكثير الكثير سمع عن شارع الحب في الكويت والكثير الكثير من بلدان عربيه وخليجيه ودهم يشوفون شارع الحب … عاد مادري شنو فيه .. المهم راح اعطيكم نبذه مختصره عن شارع الحب … يمتد شارع الحب على طول امتداد الدائري الثاني في الكويت ويمر من بين مناطق عده بداية من بنيد القار ويمر بمنطقة الدسمه والدعيه ومن ثم المنصوريه والقادسيه الاعداء اللدودين لبعض وبعدين النزهه والفيحاء فعبدالله السالم والشاميه وكيفان ودندرن … الخ الخ
اهميه هذا الشارع تنحصر في القز صباحا لغايه الساعه ثنتين الظهر وقت الجامعات … ومن بعد هالوقت اللي فيه خير يمر بهالشارع وخصوصا شهر سبعه وثمانيه ولو انه اكو كرابيش عادي يمرون ماعندهم مانع بس يالله مو مشكله … ومساءا لغاية مايفضى الشارع من الاوادمويروحون بيوتهم …
يالله بسم الله ونبتدي نوريكم معالم شارع الحب
بداية شارع الحب من صوب البحر … ويبدا من عند اشارة فرايديز وانت اللي ماخذ الدائري الثاني
طبعا اول شي اييلك تقاطع جسر طريق الفحيحيل السريع هذا الجسر ميت تلاقي عنده زحمه بالاول وبعدين تلاقي العالم بدوا يتوزعون … اللي يدشون الدسمه واللي يروحون الدعيه … العالم تلاقيهم اغلبهم مالهم خلق بيروحون بيوتهم
الاشاره الثانيه بعد الدعيه والدسمه … هني تبدأ الخمبقه عاد اللي املوع جبد وحده من البحر وماشي وراها صارله ست ساعات واخرتها يوصلها بيتهم ولاحصل شي … واللي عسى ماطلت بويهه وحده بالغلط الا قالك ياولد تبيني مسوي روحه الان ديلون واهوه حتى مرعوب وايد عليه .. المهم عاد هني عند هالاشاره يبدا الخز
طبعا نطوف هالاشاره ونشوف على اللافته المنصوريه على اليمين والقادسيه على اليسار .. هني عاد تلاقي الشباب اللي ماعندهم شغل يبتدون يطقون اشارات للشسمه يايمين يايسار
طبعا ونقعد انكمل انكمل ليــن مانوصل عند اشاره الجسر اللي يوديك الشاميه وكيفان …. لاتستعيلون اكو شي بالرده ماقلنا كل شي
طبعا الاشاره هذي غالبيه الشباب ياخذون فوق تحت من عندها وخصوصا بالليل الصبح قليل مايلفون مني اكو اشاره وراها احلى حق الصبح المهم هالاشاره تلاقي السيارات متكودين صوب اليسار صوب اللفه الفوق حدر جنهم نمل على دبق عشان يردّون على شارع الحب من يديد
نروح الحين حق الاشاره اللي بعدها واهيه مالت كيفان والشاميه
طبعا هني الاوادم ينقسمون قسمين يايدشون الشاميه رايحين مجمع المطاعم والا الجمعيه مالت الشاميه … او يدشون كيفان وياويله اللي يدش كيفان لاحق وحده … حلاتها اتسوي فيه دقه وتوقف بقطعه واحد بكيفان … او مسكين يطيح عند مطاوعه ويسوون له محاضره مالها اول ولاتالي
المهم هذي نهاية شارع الحب وراح نرجع الحين فوق حدر عشان انكمل رحلتنا على شارع الحب
طبعا وانت ماشي في هالشارع كل شي تشوف في هالشارع
الطقطاقي والوانيت بوقمارتين والتكاسي والوانيتات ملوت العبريه مع العلم انه ماكو عبريه في هالشارع
الحين نروح حق منطقه الفيحاء وعبدالله السالم ونشوف شنو يصير فيهم
على اليسار عبدالله السالم … طبعا تعتبر منطقه عبدالله السالم من ارقى مناطق الكويت .. دنــدرن المهم انا اقول قرطبه احلى … عاد كيفي … اللي تدش عبدالله السالم عاد هذي سالفتها سالفه … ياتتشيحط بالمنطقه او يعني ترى احنا بيتنا هني واهيه ساكنه في الله اعلم واخرتهاتطق لها فرّه شوي بالمنطقه وبعدين تدور لها اقرب لفّه وتقب من المنطقه جنه مو لها… لا وعاد وين يروحون ؟؟ كله عند مال العصير اللي بالجمعيه تكفى روحوا وشوفوا مال العصير والله ولاشي جنه محصار غنم عزكم الله … بس الفكره انها شاريه عصير من جمعيه عبدالله السالم
انزين نروح على اليمين شنو نشوف ؟؟ نشوف منطقه الفيحاء … يعني الواحد من يشوف هاللافته خلاص بعد مااعتقد له خلق شي … فمن جذي تلاقون هالمنطقه محد له خلق حقها كلش ملش
انكمل رحلتنا ونروح حق الاشاره والتقاطع الرئيسي مال الدندرن كله
هذا الشارع وهو الفاصل بين النزهه والفيحاء
هذا مال ابو الدندره
شارع يضع النقط فوق الحروف …
عاد نكمل طريجنا باتجاه البحر رادين اوكي ؟؟
مفترق طرق رئيسي ماله داعي بالمره .. واعتقد انه واضح من المناطق اللي فيه فمابي اعلق
راح اوريكم الحين احد المعالم اللي تقدر تشوفها وانت في شارع الحب
برج التحرير … نعم هوه برج التحرير احد اجمل معالم مدينه الكويت الغرّاء .. بس لحظه اشفيه البرج مايل؟؟ اخاف برج بيزا الايطالي يابوه هني والا انا تصويري عوي ؟؟
ملاحظه : عوي = عوج يعني بالفصحى اعوج يعني مايل
نكمل ونكمل ونروح صوب البحر
وراح اوريكم الحين احد المعالم الاخرى من شارع الحب
النادي العربــــــــــــــــــــي الرياضي … هو نادي العربي بعينه واعلمه النادي المحظوظ بل عليهم تلاقيهم طول الدوري يخسرون واخر شي شلون ياخذون الكاس ماتدري … بس ماعليه القدساويه قاعدين لهم قعده الفتره الاخيره
يالعربي جتوري .. هالسنه ماكو دوري
هىهىهىهى لايزعلون العرباويه بعد يسوون نقطه تفتيش يم النادي ومايخلون العالم يترزقون الله
ونكمل ونكمل ونوصل عند اخر اشاره قبل البحــــــــر
انا مو باط جبدي بالسالفه الا هالاثول راعي هالسياره اللي نام علي وانا قاعد اصور طاح حظه لاوشوفوا راعي الجيب كع بريك بويهه والله حلاتها شايفين ويهه لما وقف شلون تصرقع من الخرعه مسكين …
هذي كانت رحلتنا لشارع الحب في الكويت … بالله بعد هالرحله والحجي اللي عن شارع الحب بعرف شنو شفتوا فيه يفتح النفس ها ؟؟ ماكو الا اشارات … بتقولولي حلاة الشارع بالاشارات؟؟ مالت بس
يالله سلاام