14-8-2005
السلام عليكم ورحمة الله وبركاته
اليوم بوديكم منتزه الخيران شرايكم نتوكل على الله ؟؟
طبعا في بداية الامر روح احجز من مركز الاستقبال يم مطعم مركز سلطان اللي عالبحر وبعد ماتحجز طال عمرك ويحددون لك اليوم روح زهب جنطتك وعلم الاهل والاصدقاء كلهم وقولهم ترى بروح الخيران واللي يبي ايي حياه الله الشاليه شاليهه
انا اقول لو يكون الحجز اسبوع من السبت لي الجمعه ترى وايد احسن من اربعاء وخميس وجمعه يعني مايمديك اتنزل جناطك والا ثاني يوم بس تستانس وثالث يوم شايل قشك فاقول اسبوع ترى وايد زين ويمدي حق الوناسه واذا بغيت شي بعد مايبيله الديره قريبه سو شغلك وارجع
المهم ماطولها عليكم وخلونا نروح ونشوف شاللي عندهم ونشوف شاللي عندهم
هني اول ماتقبل على شارع المنتزه وحاطين لك لافته السيارات المسجله على الشاليهات فقط ... يعني اللي ماله شغل ياخذ يمين ويوقف سيارته وين مايبي خو ارض الله واسعه
هني هذي بوابة الدخول ولوحة الخيران باللون الاحمر ... ترحب بكم
المهم بعد ماتسوي اجراءات الدخول وحجز الشاليه وتضبط شغلك عاد اييك الدور على الدخله وتدخل بسيارتك رايح شاليهكم
واقضب الشارع الداخلي وخله يدور
فيك لين ماتوصل حق شاليهكم اللي انت حاجزه ... طبعا الشارع هني فاضي لأنه احنا تونا
داخلين بسم الله ماكو شي ولا اكو قز ولابطيخ ... تو الناس لاحقين على الفراره
وتوصل شاليهك في امان الله وتصفط سيارتك من غير شر ان شاءالله
وعقب عاد تنادي اللي يشتغلون وقولهم يالله اهو بشوف همتكم منو اسرع واحد فيكم ينزل الاغراض داخل الشاليه وتلاقيهم عاد هب ريح ماشاءالله كل واحد تقول شايله بيت كامل على ظهره
عاد هني يبدا
الشغل المضبوط ... روح ركضه واخذ الغرفه اللي عالبحر مباشره
وحط جنطتك وحط
ملابسك على السرير يعني ترى هالغرفه لي واللي ايي هني بحش ريوله
لايبا نتغشمر شدعوه الحين الواحد بيقعد بالغرف بس حق تبديل الملابس والنوم وانت
اللي طالع ماكو قعده بالشاليه بالخيران فراره لين ينهد حيلك
بس عاد عقب ماتحط جنطتك وملابسك بطل الشريشه .. يالله شريشه شريشه على قولة واحد زين
ياسلااااااااااام
على المنظر الحلو ... شير يمشي احبال تطير ... لالالالا مو جذي اقصد شير اشزينه
بحر يرد الروح يساعد على السباحه الصراحه .. ياسلااااام اكو لهفه على البحر
مو طبيعيه الواحد وده يطب في هالبحر ومايطلع ... اصبوره الحبيب ؟؟
وتشوف من بعيد من البلكونه مالت الشاليه هالمنظر الحلو تقول قاعد على شواطئ وجزر هاواي بس بالكويت يعني اكو فرق بس بسيط
وتتشيّش زياده على السباحه
مممممممممممممممم عاد هني طلع لبس البحر مالك ومايوهك وتدهن بفازلين عشان حرارة الشمس ........ خو الشمس حاره مو اي شمس يبا هذي .. وربي تصلخك صلاخ تخليك صيخ شاورما مشوي فاحسن لك يمدحون الفازلين بيبي جونسون
وروح شوي شوي ودش داخل البحر
وتطالع وراك والا كل مالك وتبعد عن الشاليه وعن اليابسه
وتطالع منّاك وتشوف هالحلوين هذيل
اي ليش ليش عاد تطشّر على الاوادم
ليش يايبا ؟؟ 
وتدش بعد شويه شويه وتكمل طريجك بوسط البحر ... ودوني البحر ابي اروح البحر
وتوصل لي اعماق البحاااااااااار
... توب توب يابحر توب توب يابحر ... مساااااااااااااعد تعال يامعود هونها يالطيب
ترى الدنيا ماتسوى اللي بتسويه عشانه ... فهمتوا شي ؟؟ مااعتقد
مو مشكله وندش داخل عشان نسبح بعد شنسوي
وطشششششششششش تسبح على راحتك
بس تكفى واللي يعافيكم لاتروحون
بعيد والا يطلعلكم اللي شفته جدامي
هالطيبه الحبيبه انا قاعد اسبح ياغافلين لكم الله واهيه يمي الاخت وماتتحجى يامال الدقم اللي على صماخج يالخمة الفقر
ترى صج والله مو لعبه
لا وكان في واحد يمي ولد حلال قاعد ويطامر والا لو حايشها جان سوته زبيدي عالفحم
اقول ياجماعة
الخير دام السالفه جذي يبا هونا مانبي نسبح
خل اوديكم اركبكم
في اليخت مالي
بلا سباحه بلا بلاوي لخم ويرايير وفك مفترس مالنا خلق اتصير افلام
يالله تعالوا تعالوا نسوي رحله في اليخت مالي
حياكم لاتستحون ترى اليخت لكم بكل مافيه من امكانيات عجيبه غريبه تعالوا يالله
هذا اهو اليخت مالــــــــي
شرايكم فيه فلّه مو؟؟
الله يخلي مطاعم الوجبات السريعه ترى طالعلي دعايه بس هم فادني
يالله خلونا نركب
وبدأت الجوله في اليخت مالي ... تكفى شكو نظارات البحر شدعوه بغوص ادوّر شعب مرجانيه الحين ؟؟
والا اذا كلش يبا انا اقولكم وين تسبحون روحوا صوب خور المفتح وسبحوا على كيف كيفكم هناك شوي الماي اهدا واحلى
عاد عقب هالجوله وهالسباحه يالله خلونا نرجع الشاليه ونتحمم ونغسل ونبدأ مشوار يديد في منتزه الخيران
مثل ماانتوا عارفين شارع الحب في منتزه الخيران معروف ... الدائري اللي يصل بجميع مرافق المنتزه مع بعض ويردك لنفس نقطة البدايه اللي بديت منها ... ياسبحان الله شفتوا شلون ؟
يعني في هالشارع هذا ياإنك تركب سيارتك وتقز او تمشي على ريولك لين يطيح حظك وخصوصا لما يكون الجو رطوبه او تأجر لك قاري ابو اربع تواير وتقعد تفتر فيه وتركب وياك اللي تبي واللي ماتبي
او انك اتكون يايب معاك قاري واحد من الاهل وتقص عليه بجم كلمه وتركب بداله او تأجر وتطيح له فراره
أو انك تركب حنطور وتشغل المسجل فيه وتعلي على الصوت جنك بشوارع القاهره
أو اذا كلش كلش مالك خلق انطر القطار
وتوت توت هذا قطاري اياباااه
عاد هني وانت تفتر في هالشارع هذا تشوف المناظر الحلوه اللي في المنتزه ... والله شغلات ترجعك حق ايام الطفوله
العاب وزحلاقيات اطفال
ياسلاام على المنظر ومن خلفك البحر ومن امامك الخضره والوجه الحسن
خووووش قعده
الصراحه لا
وفيها كراسي بعد
شوي وانت تفتر وتتذكر الاغنيه الدايخه البرتقاله شقيتي حاله ليش ياترى تتذكر هالمصاخه هذي ؟؟
انا اقولكم والسبب هالــ .........
هالبقاله ... ترى هذا دكان بس على برتقاله ... عليها لود موطبيعي بالليل
وعقب هالحوسه هذي ماكو الا نروح شوي ونقعد في القهوه نريح من الخواره والفراره تعبنا بعد
وتقعد اتريح اعصابك شويه وتنطر الحفله لين ماتبدي اهمه العاده هناك يسوون حفلات فعاد انت انطر اقعد يااما انك تبلع او تطق لك صماخ شيشه ... شيّش لين ماتبدي الحفله
طرررررررررررر وطررررررررررر اتقول قاعد تسمع صوت قزوز سياره
هذا صديقي الصدوق ابو الصداقه الصادقه
وتبدي الحفله عقب وطالع هالاوادم واستانس وشوف اللي مناك واللي مناك واللي واللي
عاد عقب ماخلصت الحفله جان اقول خل ابطل البلوتوث والا اطيح على هالنك
مسكين كسر خاطري .... نكه يقول " صارلي ساعه اسوي سيرج
الظاهر محد معبره المسيجين
يدور نابر
لوحه تبين تاريخ الافتتاح على يد صاحب السمو الراحل الشيخ جابر الاحمد الجابر الصباح رحمه الله
بس انا اليوم تعبت خلونا نروح الشاليه ونقعد ورى على الحشيش والزرع ونجابل نسمات العليل العابره والآتيه من صوب البحر الجميــــل
وترجع الشاليه وتشم روايح هالمشويات الحلوه ياسلااااااااااام يمي يمي
ياعيني على السمج المشوي اللذيذ
وتطالع الطاوله الثانيه والا تشوف عليها شي مغطى
مممممممممممممممممم حق منو هذا
؟؟؟ ترى انا يوعان حدي
شنو يحتوي عليه هالماعون ؟؟؟
تعالوا خلونا نبطله ونشوف شنو فيه
يمـــــــــــي شكله لذيذ ... تسلم ايد اللي سواه
جان يطيحون علي ^_^ بس شعقبه
جان اييبون باجي العشا
وطيح له نداف ياسلاااااااااام عوافي على قلوبنا ... حياكم ؟؟؟ ماتبون ؟؟ كيفكم على راحتكم
عاد عقب هالعشوه الطيبه والفراره بالمنتزه فيك خير تمشي بعد ؟؟؟ مالك أمل
بس تدرون شلون ؟؟
بسوي ازعاج
بالمنتزه
جان اتذكر معاي بالسياره صواريخ جراغيات قديمه شوي من ايام الشاليه بالعيد الوطني اللي طاف
جان اييبهم واروح اييب العده واقعد اشب جراغيات صوب الشاليه من ورى شنو تتكون منه العده ياترى ؟؟
ماكو العّده جدا خفيفه :
1- قوطي بيبسي ويعتبر قاعده لااطلاق الجراغيات الالعاب الناريه
2- الصواريخ بين قوسين ( العاب
ناريه ) وبالعاميه جراغيات
3- جبريت والا ولاعه ... وبس
عاد من زين
الجراغيات واحد يشب وعشره فاسدين مافيهم خير حتى يوصلون متر
ولما شوي اتهضم الاكل وترتاح قزرها مره ثانيه مشي على الممشى اللي ورى صوب البحر ترى خوش ممشى وحلو وجميل
وانت قاعد في امان الله وتسولف وتتمشى وتشوف الشاليهات المقابله وعلى شقّة النور توه بادي يطلع من بعد مااتصلي الفجر
وقاعد في أمان الله اوكي ؟؟
والا ماتسمع الا طشششششششششششششششششش ووشششششششششششششششش ياه شنو هذا ؟؟
والا مرشّات هالماي اللي تسقي الزرع اتخرب عليك القعده كلها
وتقعد تتأمل في هالماي واهوه يصب وانت متحسر على القعده اللي خربت والسبه مرشّات هالماي
وتروح تغير مكانك وتجابل البحر شحلاتك ويازينك زيناه
وتبدأ مسيرة يوم جديد مع بداية الشروق الجميل
ياعيني على الشروق والله أحلى منه ماكو يااخي يحسسك بالامان والهدوء والحب
تأملات بداية يوم جديد ...
وياعيني على جمالك ياشروق
لحظات ابداع جميل سبحان الخالق
عاد هني بس جابل البحر واستمتع
عاد هني مايبقى الا انك تمشي في هالممشى اللي تكلمنا عليه مقابل البحر والا انك تروح تنام مع بداية اليوم الجديد
طبعا انا دخت وبروح انام واشوفكم ان شاءالله لما اقوم من النوم
وبعد ماتقوم من النوم اتبطل البلكونه اللي تطل على البحر وتشوف هالمنظر الحلو جدامك
المهم بعد ماتغسل وتتغدى وتريح شوي ... شرايكم الحين نروح حق المارينا القديمه ؟؟
يالله حياكم
في الطريق الى المارينا القديمه
مممممممممممممم ووصلنا الى المارينا القديمه ... طبعا تدخل ماكو الا مطاعم وانترنت كافيه واكو شغله شرايكم انأجر هالمره مركب صجي مو مثل يختنا اللي طقينا فيه فرّه مع بعض ... ها شرايكم ؟؟ يالله يالله تعالوا اهوووو
هذا اهو اللنج مالنا اللي أجرناه ... طبعا كانوا معانا مجموعه من رواد المنتزه المحترمين قضينا وقت ممتع الصراحه
وبدأ المركب بالتحرك متوجها الى اعماق الخليج العربي في وسط البحر
بس احلى شي ميدالية قبطان المركب
المهم طلعنا على خور المفتح متجهين الى البحر
ويمشي مركبنا على راحته وللحين مابدت الافلام
وتشوف الحين عاد ابداعات الشباب ماشاءالله عليهم وحركاتهم الحلوه على الجت سكي والطراريد
عسى الله يحفظكم ان شاءالله
هذا الحبيب يدش بين العواميد اللي بوسط البحر هذيل اللي يمه ماشاءالله مسويهم درب الحيّه
طبعا اصحاب الجت سكيز يدورون الطراريد وين ويمشون وراهم عشان موجة الطراد تصير ويقعدون يبدعون عاد
خلصنا الحين من الجتات خلونا انروح للطراريد وتسحبهم للأوادم
تعالوا انشوف هالشاب اللطيف ونتابع الصور اول بأول
1
2
هوب هوب
3
ها ها اشصار ؟؟؟ مو جنه قلب في البحر ؟؟
4
اي والله
تعالوا خلونا نشوف الثاني
وانكمل مشوارنا في داخل البحر ونشوف بعض المعالم ... اي معالم بتشوف بالله ماكو الا هذا
وهالطيب كل شوي يروح بعيد عنا وبعيد ايي طاير ويمر صوبنا زين ليش ؟؟ يبا درينا طرادك اقوى واسرع يعني شنسوي تبي انييب مال خفر السواحل ؟؟
في طريق عودتنا الى المرسى اللي مشينا منه خلاص خلصت الرحله البحريه
عسى استانستوا ان شاءالله ؟؟
عاد الحين من بعد هالرحله خلونا نكمل مشوارنا داخل المنتزه ونفتر شويه
المهم بعد مانخلص من الرحله نبدا الجوله مره ثانيه على شارع الحب ههههههههه ماكو اللي تبي تسوي ريجيم تروح الخيران خلال يومين ينقص وزنها خمسه كيلو
يالله خلونا نبلش مشي مره ثانيه
واحنا نمشي لفت نظري شي هالعلامات الارشاديه اللي تدل على ارقام الشاليهات
اوكي ماكو شي غلط
هههههههههههههه مو جنه الكلمه مكتوبه غلط ؟؟
في مكان مارحناله شرايكم نروح المارينا اليديده؟؟
وندخل داخل المارينا ... طبعا تحتوي على طاولات بلياردو وبيبي فوت والعاب كمبيوتر وتنس طاوله وبولينج ومطعم حق البلعه والقعده والهذره فخلونا نشوف جانب من داخل المارينا شرايكم ؟؟
لعبة البولينج عليها ضغط الكل بيلعب وتلاقي اللعيبه ينعدون على الاصابع بس يالله حلوه التجربه
كل واحد يتحدى اللي يبي
وخلونا نشوف الحين لعبة البلياردو ونشوف بعض الفنانين فيها
طنـّب ... ها مو طنب ؟؟ يبا مو اتيل هذي بلياردو يالحبيب ماعليه ماعليه
ومن عقب مادخلنا المارينا وافترينا شوي ورحنا مني ومناك من داخل المنتزه مالك الا تشيل قشّك مره ثانيه
وتحطهم بالسياره وتتوكل على الله اتودع المنتزه على أمل الزياره له مره أخرى
وتطلع من باب المنتزه من غير مطرود
اتمنى تكونون استمتعوا معانا في رحلتنا الى منتزه الخيران في منطقة شاليهات الخيران
وهذا دليل المنتزه بالرسم اضغط هنا من فضلك
تصوير وتعليق اخوكم HaMaD دندرن