السلام عليكم ورحمة الله وبركاته
شلونكم ياطلبة وطالبات الجامعه ... عساكم بخير ... اول شي اهنيكم في بداية العام الجديد واقولكم هالله هالله بالدراسه وجابلوا دروسكم والواجبات اللي يعطونكم اياها الدكاتره والاساتذه الافاضل .. ولحد يتكيسل في حل الواجبات ها ؟؟؟ ماوصيكم عاد
في بداية كل عام دراسي جامعي واكاديمي تصير انتخابات في كل الكليات لأختيار قائمه تمثلها في الكليه ... ونشوف عاد كل واحد ووحده شادين حيلهم في العمل عشان اييب اكثر اصوات وهذي تقنع ذيج وهذا يحاول بذاك وهلمّ جره ... والشاطر اللي ينجح في الأخير
اول شي انا ما اتبع اي قائمه .. عشان لحد يقولي انت كذا او كذا او كذا
انا مع الزين اي قائمه اشوفها زينه احطها على العين والراس ... القائمه اللي تهمها مصلحة الكويت والطلبه والطالبات واللي مافيها تفرقه بين جميع اطياف الطلبه هذي على العين والراس
استغرب من التناحر اللي يصير بين القوائم ... المشكله انه اكثرهم ربع بس وقت الانتخابات يصيرون جني وعطبه ... بيــــه شدعوه عليكم
واللي تبجي واللي يسب واللي يغمى عليه ... يابابا خو كلها اربع سنين وتتوكل على الله ليش كل شدة هالحيل هذي؟؟
ترى في الأخير محد درا عنكم
يازينكم لو كل واحد فاز يروح يواسي القائمه الخسرانه شفيها يعني ؟؟ بتنقص من هيبتك مثلا ؟؟
والا القائمه الخسرانه تبارك للي فازت .. اخاف البرستيج مايسمح
الكلمه الحلوه زينه في هالأيام بس وين اللي يسمع
المهم ماني مطول عليكم تعالوا نشوف شوية من بعض الامور في انتخابات الجامعه من هذا العام 2008/2009
اليوم بنكون في الشويخ والخالديه
بداية مع كلية العلوم الاجتماعيه
الله ياعيني على التسامح والألفه
اللي صايره بالاعلانات ... الوسط يم المستقله
ههههههههه انت شمدخلك هني الله
يغربل بليس عدوك ... يبيع برّد داخل احد الممرات في كلية العلوم الاجتماعيه ... لا
والحبيب مبسوط يتحدث في الهاتف
مظلات للوقايه من حر الشمس بس محد قاعد فيها ... والحبيب اللي مجندس مادري شقاعد يسوي
نروح للقاعه الوسطيه اللي في الكليه مادري جنهم يسمونه سكوير على ماظن ... هذي وقت الانتخابات تصير مسرح للشيلات والصراخ والتحلطم والبجي والتخمخم والتلملم
وكل واحد يحس انه صوته حلو يطلع مواهبه هني ... وتشوف عروقه شوي وتطلع من كثر الصراخ ... وماتسمع من صوت البنات الا صراخ وااااااااااااااااااااااء وواااااااااااااء وماتدري شتقول وماتدري منو اللي فاز ومنو اللي سقط اهي بس تصرخ وبس انزين شصاير يابنيه مادري تقعد تكلمك بكلمات غير مفهومه مصحوبه بشوية صراخ على بجي وماتدري هل اهي دموع فرح او دموع حزن المهم انه حجي مخلوط
وفي الأخير بعد ساعه تكتشف وتعرف من كيفك انه القائمه الفلانيه فازت
هذي الساحه ... اللي يميزها الدرج اللي على اطرافها اللي داير مدارها كل ماتصعد طابق تلاقي اوادم قاعدين ويطلون على اللي بالساحه يعني هم تصلح تكون استراحه طلابيه تفي بالغرض
عدل يا الطالب المجتهد لاهامته لا
انتخابات ولاهم يحزنون الولد يدرس والعالم لويه وشعارات ولافتات ... كفو اي هذا اهو
مثال الطالب المجتهد 
سئفولو
سئفولو سئفولووووو
اي دعم اي بطيخ يامعودين .... الدعم قاطينه بالأرض وطبعات الجواتي والشحاطات عزكم الله على الورقه مايصير جذي ياجماعه
المفروض يكون بوستر شوي كبير ومعلق افضل واحسن من الأوراق اللي تتحذف يمين ويسار يعني فرضا فرضا لاقدر الله كان في اسم من اسماء الله الحسنى مكتوب على الورقه او شي مني مناك فمايصير ينكتب على ورقه ويتوزع الدعم لازم تكون في طرق ثانيه للتوزيع ... وجزاكم الله خير
ياسلاااااااام ... ياعيني بس القهوه
مكتوته على الأرض ... عاد في انتخابات الجامعه ياكثر اللي اييووونك ركضه طايرين
يعني مستانس بنتيجه او ماخذه الحماس زياده شوي ويبي يبلغ الشباب او البنات ...انا
ماني متكلم عن البنت اللي بتزلق في هالشي لأنه حالتها المسكينه بتكون كسيفه الصراحه
ومايبقى احد في الممر ماراح يضحك عليها فاا بس يعني مجرد تخيل بسيط لنفرض هالشخص
الطاير واللي شاد حيله ياي ركض وماشاف هالقهوه على الأرض وطاحت ريله على القهوه
وزلق اتهقون شبيصير فيه ؟؟؟ اتوقع ان كان لابس غتره وعقال بتلاقي الغتره طايره في
الهواء الطلق والعقال معلق فوق شجره وراسه تحت وريوله فوق الشبّه ... وان كان لابس
بنطلون يبوووووووووووووي الله يعينه الصراحه صوت شقـةّ البنطلون بتسمعها من عند
النويصيب شيييييييييييييييييييييط ... اي مسحوا اللي انكت لايتودرون الاوادم ياعلكم
شقول 
مالنا خلق اصابات
انتخابيه لطلبتنا وطالباتنا الجامعيين
وبجذي خلصنا هالجوله البسيطه في العلوم الاجتماعيه نروح للاداريه ... طبعا المسافه بسيطه جدا بين الكليتين ماكو يمكن 50 متر فقط وتوصل
ويقولون ادارة الجامعه مو مهتمه فينا احنا يالطلبه .. والله انكم عيايره يالطلبه كل شحلات المكان ... اشجار ومباني يديده ومواقف وتنظيم اشحلاته بس انتوا مايفيد فيكم يالطلبه تبون كل شي بيسر وسهوله
خو الله يعطيهم العافيه ادارة
الجامعه قاعدين يسوون اللي عليهم وزياده
وهذي كلية العلوم الاداريه ... وهني يوقفون طلبة الجامعه وينطرون احد الباصات اللي توديهم حق سياراتهم ...
مسكين سايق هالباص شكله زهق من الحر
والقعده في الباص 
قالك انزل
شوي اغير جو واطلق رويلاتي
عيونك بابووو طالع جدام ياشقول
وهذا سيركل الاداريه .. حشا صاير قاعة افراح على هالزينه اللي فيه
مو ناقصكم الا جم كرسي على هالطاوله وتدورونه هند والا كوت بو سته ... قلنا هند او كوت بو سته ماقلنا شي ثاني
ياعيني عالحركات ... هب السعد هبايبه
الله يبيله صاج حلوم والا لبنه مع
زعتر اياباااااه ... خوش كليه الصراحه
الحين هذي مالت القاعه والا احدى
القوائم حاطينها ماعرفنا هالثريا حق منو
وبجذي خلصنا من الشويخ يالله خلنا نروح حق الخالديه لكلية العلوم وكلية الهندسه
ونشوف بعض اللوحات الاعلانيه
عرس انتخابي
الوضع كان تقريبا هادي
ترقب واندماج
ياعيني على العلم اللي محذوف محد
داري عنه ... كله في سبيل الانتخابات
مخلين مذكراتهم وكتبهم
مايدرون عنها ورايحين مع لوية الانتخابات والتصويت ... لا بالله خوش دراسه
ههههههههههههه ذبحنا العطش نبي شي
نشربه مايصير ... ماشاءالله مشطبين على البارد
يخرب بيت عدوينه حتى هني وصل ؟؟
هاكم شوفوه اهداء حق بعض الناس
اهو صح ؟؟
اوله شنو صار ؟؟ شنو هاللويه والعفيسه اللي صارت ليش ليش جذي
ممممممممممممم شسالفته ؟؟
ها شعندك
وماندري لي يومكم هذا هل قدر ياخذ العقال والا لأ ؟؟ نتابعه في الانتخابات السنه القادمه بأذن الله اذا العقال موجود يعني ماقدر ياخذه واذا مو موجود نقدر نقول انه كومار قدر يستولي عليه
تنظر وتتطلع الى المستقبل العلمي الباهر وتشير بيدها الى ما أدري وين ... هل ستتحقق احلامها ام لأ هذا ماسوف نراه في الحلقة القادمه ... حكايات عالميه
يالله باي باي علوم ونروح الهندسه
اي والله انتوا المساكين ويعطيكم الف عافيه المفروض يكافئونكم على شغلكم بعد كل انتخابات
ووصلنا الهندسه
ماشاءالله تبارك الرحمن شنو هذا ... اوووه جنه النتيجه طلعت هني الظاهر يينا متأخرين
هو لايلااااه هو لايلااااه
ومبروكين لكل اللي فازوا وهاردلك للي ماحالفهم الحظ في جميع الكليات واقولهم ماعليه تعوضونها ان شاءالله في المرات القادمه بحيل الله واللي فازوا شدوا حيلكم وديروا بالكم على مصلحة الكويت والطلبه قبل كل شي
لاتاخذكم الامور الثانيه ومحاربة القوائم الثانيه وتنسون عملكم اللي المفروض انتوا ماوصلتوله الا لخدمة الطلبه والطالبات
همسه للكل ... خلوا عنكم الامور الدخيله على مجتمعنا ... اللي ينجح باركوله واللي يخسر واسووه وقولوله خيرها بغيرها ترى الكلمه الطيبه والله تسوي الشئ الكثير
وانتوا عاد بكيفكم اللي بيسمع الحجي حياه الله واللي مايبي كيفه ذنبه على جنبه
والسلام عليكم ورحمة الله وبركاته
18/10/2008