السلام عليكم ورحمة الله وبركاته
اليوم خلونا نفتر شويه في اجواء القاهره الحلوه ... يقول المثل اللي يشرب من مية النيل يرجع لها .... اهوه فعلا هالكلام صحيح بس مو عشان مية النيل ... لأ .. عشان اهلها الطيبين اتلاقيهم ناس على نياتهم وطيبين أوي ... ولو انه في بعض الشواذ لكن هالشي مايسئ لسمعة القاهره ولا لسمعة مصر الحلوه
حتى في كل بلدان العالم في زينين وفي مو زينين فنتمنى من الكل ان يتقبل كل شي بصدر رحب وان شاءالله تستمعون ويانا في التجول في اجواء القاهره ... يالله نتوكل على الله وانبلش يومنا
طبعا راح نتكلم اليوم عن اذا ماكان عندك شي في بالك اتسويه وحسيت انك ماتبي تروح لامني ولامناك فشتسوي وانت بالقاهره ؟؟ طبعا ماراح تتوهقون كلش تدرون ليش ؟؟ لأنه القاهره كل شي فيها حتى اذا مالقيت مكان اتروح له يكفي عليك تتمشى وانت راح تنبسط
اتقوم من النوم متأخر توك صاحي من النوم الساعه 12 الظهر والا وحده الظهر واتقوم اتغسل ويهك عشان اتصحصح ... وتاخذ لك دوش على الطاير واتسوي تمارين الظهر مو الصباح واتشد عضلات ايدينك وريولك والمعده وكل شي ... حشا عندك مباراة مو توك قاعد من النوم ... على العموم هذي صج السالفه كان يسويها واحد من الربع
عاد عقب ماتصحصح قوم تغدا واتريق بنفس الوقت خل وجبتك وحده لأنك توك قاعد بعد شنو تبي تاكل وتتريق مايصير خو ... عاد اهل مصر مشهورين بعمل الفول والطعميه ماشاءالله عليهم ... وعليهم فوق واااااااااااو اينن يخبل يويل حالي
تطق لك حتتين طعميه من مركز الهيلتون رمسيس ومعاهم طبق فول عشان يقعد عليك مره وحده ليما العشا
وجبتين في وجبه وحده ... انت ياالغدا وانت يالريوق حلو ؟؟
وعقب ماتترغدا ... طبعا هالتسميه من عندي اللي اهيه تترغدا ... واهيه جمع كلمتين تتريق وتتغدا مع بعض حاضرين انضبطكم بالجلام الحلو احنا مو شوية ترى .. اي شعلى بالكم دندرن شويه في البلد ؟
عقب هذا كله روح أشر حق تاكسي وقوله ابيك تطق فيني فره في اجواء القاهره شوي طبعا انصحكم تبتدون المشوار من بعد الساعه 2 الظهر عشان اتخف الشوارع من زحمة القاهره المشهوره لأنهم توهم طالعين من الدوامات فزحمه هالوقت انت بلّش من الساعه ثنتين ونص جذي حلو
طبعا راح تشوف شغلات حلوه من القاهره وتشوف الناس على بساطتهم
انا ماادري ليش عجبني هالمنظر الصراحه ... يعني صج يبين لك البساطه اللي اهمه فيها شعب مصر الطيبين
المهم خلونا نوقف ونشتري منه شرايكم ؟؟؟ يالله
وبعد ماتخلص قولوا حق راعي التاكس يوديكم شارع كرداسه مال الدراريع ماشاءالله الخليجيين هناك نايمين فيه نوم وخصوصا الحريم هههههههههه بس بصراحه شارع حلو والدراريع اللي فيه عجيبه اشي احمر واشي اخضر واشي بنفسج ... حتى دراعة نانسي بنت عجرم اللي غنت فيها آه ونص يبيعونها
طبعا سم بسم الله وادخل المحلات الموجوده
احد البائعين مع اخته في احد المحلات هذا طقينا وياهم صحبه وشرينا منه دراريع حق الاهل واحنا اللي طالعين
بس ترى والله صج خوش دراريع عندهم
تعالوا نشوف بعض نوعيات
الدراريع
على راسي والله راعي المحل وعلى راسي الشخص اللي عطاه الباج مال الأسرى واللي لي الحين امعلق هالباج على هالدراعه في المحل ... نسأل الله العلي القدير ان يفك اسرهم وان يرحم الشهداء يارب العالمين
وبعد مانخلص من هالمحل خلونا نفتر
شوي في بعض المحلات الموجوده في نفس الشارع وندش محل اسمه الاسراء ... هذا المحل
سالفته سالفه 
حاط عنده في
طاولة العرض اللي داخل المحل اقسام وحاط في كل قسم عملات الدول الخليجيه عاد احنا
مايصير اندش ونطلع من غير ماانحط تذكار هههههه ^_^
فكتبنا على نص دينار ذكرى دندرنيه انا وصديقي الصدوق وحطيناها في المكان المخصص لذلك
هذا اهو النص دينار اللي كتبنا عليه
وهذي اهيه طاولة العرض داخل المحل ويلاحظ العملات الكويتيه الله يحفظها يارب موجوده داخل المحل
عاد الحين جود الساعه صارت على الخمس ونص والا ست اركب تكسيك مره ثانيه وروح حق فلفله
والا تلاقي هاللطيف بويهك ... بس على فكره ترى موصج هذا ... هذا جذي دميه فقط للعرض
والا جود بهالوقت صكك اليوع شوي ...
اطلب لك شي خفيف عندهم خوش اكل الصراحه وعقبها صماخ شيشه وريح اعصابك نتفه وانت
اللي طالع ..... بوص انا في انتظارك
أم كلثوم شتصير لج ؟؟
جود الحين الدنيا صارت ظلمه
انزين ليش امبقق عيونك
يالحبيب ؟؟
ماعليه عاد الحين شتسوي شتسوي مممممممممممممممممممم جان تطري علينا فكره جهنميه نياهاهاهاهاهاها .... شدعوه عليكم عاد مادري شنو الفكره المهم لاتستعيلون على رزقكم شوفوا شنو سوينا
اشرنا حق راعي حنطور وقلناله يبا
افتر فينا شوي ملينا من التكاسي شوي نبي تغيير ^_^ وتاني تاني تاني ترييرم راجعين
للحب تاني والنار والعزاب من تانييييي
وقعدنا انغني وانهيص
وولعها ولعها تريريم
الواد زيزو وصاحبته المساعده بتاعته صباح يسوقون الحنطور
واحنا قاعدين ورى انا ورفيجي ونطالع
معالم القاهره ليلا ... وهات ياضغاط
قزرناها عليهم بس خوش
فره طق فينا زيزو
فندق سميرا ... لالالالا غلط غلط
غلط اقصد فندق سمير اميس
مو سميرا ن.... لا سمير
اميس
هذا احد المعالم في القاهره ليلا وراح نشوف الحين معلم ثاني من القاهره
برج القاهره العالمي ليلا .... ياسلام على المناظر الخلابه
صديقي ينظر ويتامل برج القاهره ... وحال لسانه يقول اييييييييه لو كل من ييه ونجر ماظل بالوادي شجر
ونظرة امل ووفاء وحب للمستقبل القريب والأل بي سي
الحين وانت في عز اندماجك مع الحدث ونظرات التأمل العميقه والمتفائله نوعا ما وبوسط هالجو الرومانسي اللي انت فيه ... ينط لك من وسط الشارع هالنزغه هذا ويخرب عليك كل شي بل عليك من ياهل
ده بتاع مين ده ؟؟ والله مش معانا ده مش عارفين طلع لينا منين
قمنا نسأل مني مناك ياجماعه من له هالياهل من حقه بتاع مين يااخوانا ؟؟؟ محدش رد علينا بعدييييييين اكتشفت انه مش بتاع حد وطلع بتاع الاسفلت ... بل عليك خربت الجو الرومانسي على رفيجي .... بييييييه شدعوه رومانسي عاد ... خو كله حنطور ويطامر
وتريبك تريبك ... تريبك تريبك ... وشي حااااااا وعادي بو الشباب بوسط الشارع يمشي فينا بالحنطور
المهم خلصنا من الحنطور الحين وين نروح ؟؟؟؟
نروح الفندق ؟؟ لالالالا مايصير تو الناس الحين انروح ونركب مركب بوسط النيل
وأجرنا مركب بروحنا ولوحدنا بـ 20 جنيه مميزات المركب تتغير الاضاءه الداخليه للمركب لعدة الوان ... دي جي منوع من اغاني شرقيه وغربيه هههه بوفيه مفتوح وتبدو طاولة الاكل واذا تطلبت الامور مافي مايمنع من الرقص داخل المركب
عاد وانت ماشي بالنيل تشوف هالمراكب الكبيره اللي على مطاعم على اطراف النيل والعوامات وتشوف اجواء حلوه ليلا ونسيم عليل وهواء يرد الروح
وتقدر تتسلى بأكل الترمس واللب والحاجات الحلوه
صديقي منهمك في السوالف وهو في وسط النيل ويبدو سائق المركب في الخلف ... مادري شفيه حاقرنا مايسولف ويانا ..... عاد احنا قلنا مايصير جذي خل يسولف ليش امسكر حلجه ؟؟
جان اطلب هويته شكو مادري
خو عشان نلاقي مدخل وياه موراضي يتحجى ... وفوق هذا هم طلبنا هويته وهم ماتحجى ... اخاف بس مايتكلم الريال واحنا طايحين هذره وقرقه معاه؟؟
على العموم هذي كانت جولتنا في شوارع القاهره وان شاءالله تكونون استمتعتوا في هالجوله ... وانتظرونا ان شاءالله في الحلقه القادمه في
عم عز في الاهرامات