مساكم الله بالخير او صباح الخير كله واحد ..

من فتره ليست بعيده قررنا انا وصديقي الصدوق ان نسافر .. وجك بم جان نحجز على مصر العالميه وسافرنا .. اي اكيد الواحد يحجز عشان يسافر .. عيل عشان يصور مع التذاكر يعني ؟؟ لا اكيد بيسافر .. المهم سافرنا الى مصر الشقيقه .. وعلى بلد المقرود ودوني ... وزاد وجدي والبعد كاويني ... مو جني عفست ام الاغنيه ؟؟ ماعلينا المهم تعالوا نوريكم اليوم ... شواهد من شوارع مصر العربيه .. وهذا راح يكون ان شاءالله احد الاجزاء اللي راح تشوفونها عن رحلتنا الى شرم الشيخ والقاهره .. واليوم بنكون في القاهره وتعالوا نشوف شواهدها

لحظة الوصول الى مصر وهني فوق البحر الاحمر بالطياره .. ويزاه الله خير موظف الكاونتر ضبطنا على الدريشه ^_^

يالله شريشه شريشه ... اللي بعدووووو

طبعا ولله الحمد وصلنا مطار القاهره الدولي واللي يسمونه في مصر ميناء القاهره ... بعرف انا خابر ميناء يعني اللي يكون على البحر ... شكو المطار يسمونه ميناء القاهره الدولي؟؟

احنا مالنا .... المهم طلعنا من المطار جان ينشب في بلعوم ام اللي يابتنا راعي تاكسي غصب اوديكم بخمسين جنيه .. وقام يتحيلق علينا انا من امبارح وانا قاعد هنا وتعالوا اوصلكوا بـ 50 جنيه ... ياه مانبي يبا روح وساعه يقول لنا انا من امبارح وانا هنا ... انزين احنا شكو فيك قاعد من امبارح .. روح بيتكم يااخي شمقعدك؟؟

المهم كشتنا فيه وركبنا مع تاكسي ثاني بنروح الى فندق هيلتون رمسيس ... وعاد هني تعال وشوف التكاسي اتقول دوريات حشا مو تكاسي .. راح تعرفون الحين ليش دوريات

يعني اذا فيك خير اركب في مثل هالتاكسي وحاول تنزل بروحك من غير ماأحد يساعدك .. يعني لاقفل موجود ولايدة فتح الباب ولا تقدر ترفع او تنزل دريشه مالك أمل ...

بس بيني وبينكم ترى فيهم عبقريه اصحاب التكاسي في مصر ... ياأخي عليهم حركات موطبيعيه  

ذكاااااء ذكاااااء خارق .. بمجرد لمس الاظفر على اي مكان في التاكسي تدق هرن لوووووووول يعني تتسنّد على الباب اتدق هرن اتنام اتدق هرن ترفع الجام اتدق هرن ماشاءالله اوادم مايدوخون من الهرنات ... الهرن يعني الكلكس ديد ديد ^_^ مثل ماعمل صاحب هالتاكسي هذا حط مكان الاشاره والمساحه مالت السياره الهرن عشان وين مايلقّي ويهه يدق هرن  ..؟؟

وفي مره كنا قاعدين نتمشى بالشارع جان شنو انشوف تتوقعون؟؟؟

شفنا البرتقاله اللي غنوا عليها

يالبرتقاله عذبتي حاله

البرتقاله امخبله وتزهين ^_^

V

V

V

كاهي البرتقاله شوفوها قاعده تتمشى بالشارع

بعدين انا خابر الواحد يحط على سيارته ستيكر مطعم .. مغني .. اصخله .. بقره .. يحط ايميله أو رقم تلفونه على سيارته جنه مو مصدق عمره عنده موبايل او ايميل جنه صج السالفه ... بس انك اتحط هالستيكر؟؟

هذا اللي عمري ماشفته الصراحه

مغرم بسندباد الأخ ^_^

الحين تعالوا اذا كنتوا ساكنين بفندق هيلتون رمسيس وطوفوا الفندق روحوا صوب المتحف ومروا من تحت الجسر اللي جدام الهيلتون رمسيس لوووووووووووووووووووووووول وربي يبيلك كمّام تلبسه وبعدين تطوف  يويل حالي هههههههه ... لا والادهى والامر من هذا كله انه اكو ناس ينامون عادي ماكو مشكله .. طبعا جميع الكراسي الموجوده تحت الجسر مشغوله آخر الليل نايمين عليهم اشخاص ماتدري من وين اطلعوا

في يوم من الايام كنا بالغرفه انا وصديقي ضايقه خلوقنا وانفكر شنسوي شنسوي ؟؟

جان اتييلنا فكره جهنميه قلنا خنسوي جو مايصير جذي قاعدين ماكو شغل والفندق حد امه صخه ماكو احد الا اللي باللوبي كل يوم ماكو غيرها اللي تغني لا والفرقه اي شي الموسيقى بصوب واللي تغني بصوب ... مره قصينا على المايسترو مال الفرقه قلناله انه احنا موسيقيين ونفهم بالموسيقى هىهىهىهىهى وصدق ابن الحلال حسباله الحين اللي يكلمونه رياض السنباطي ومحمد عبدالوهاب  ^_^

المهم قلنا شلون نقتل وقت الفراغ ؟؟؟

والا رفيجي شاري جراغيات اللي على صخر تذكرونهم اللي يكونون ملفوفين ابـ سيم أسود؟؟

هذيل اهمه

عاد طقت براسنا فكره .. احنا غرفتنا تطل على احد ارقى الأحياء في القاهره .. ضبطتنا سحيله أم الخلاجين مالت الريسيبشن بأوده انما إييه .. تقول والنبي انا حزبطكم بأووده حتنزلوا تدعولي أما تشوفوها .. وبالفعل ضبطتنا بغرفه تطل على بولاق ... ماقول الا مالت على أم يابتج ياأم بولاق ... طبعا غرفتنا تطل على الملحق مال الهيلتون رمسيس وعلى بولاق على قولة اخواننا المصريين  وقمنا انحذف على الاوادم اللي يمرون تحتنا جراغيات هىهىهىهىهى ^_^ شنسوي ماكو الا انقزرها عليهم وعلى الشرطه اللي واقفين تحت وانحذف جراغيات

وهذا هو الحي اللي قمنا انحذف جراغيات عليهم  

دندرن  لاتعليق

ومن رداة الفندق ماكو مع حجز الغرفه لاأفطار ولاغداء .. عاد شنسوي ؟؟ لقينا مطعم موجود بالملحق مال الهيلتون رمسيس يسوي وجبات أمنا الارض ... نعم أمنا الارض هذي أكلة الشقيق المفضله وتحتوي على فول وطعميه ^_^ 

آخر شاهد من شواهدنا اليوم هذي الفاترينه العجيبه .... محل كله يبيع قواملق حمر ^_^ ماعنده غير الاحمر .. الظاهر راعي المحل امطبق نظرية اذا تبين حبيبج او ريلج يتعلق فيج ومايهدج لبسيله حمر