الله يهنيهم في ديرتهم
ويخليلهم شيوخهم ... المهم نرجع لاحداث وتفاصيل الرحله الى دبي السلام عليكم ورحمة الله وبركاته
في شهر نوفمبر اللي طاف من عام 2009 توجهت في رحله الى دبي لحضور بطولة العالم الشاطئيه اللي صارت في دبي واللي تقدرون تشوفون تغطيتها كامله على الرابط التالي
بطولة العالم الشاطئيه دبي 2009
فكان لابد وحتما علي ان اقضي اوقات
الفراغ في التجول والتسيح في ربوع دبي .. اخر رحله لي لدبي كانت في عام 2001 وبعد 8
سنين زرتها مره ثانيه ماشاءالله تبارك الرحمن تغيرت تغيرا كليا
الله يهنيهم في ديرتهم
ويخليلهم شيوخهم ... المهم نرجع لاحداث وتفاصيل الرحله الى دبي
سباق على متن طيران الجزيره مع
طياره ثانيه مادري مالت وين ... الظاهر اللي يوصل قبل له شي مني مناك ... شنسوي اندور
الرخص شحلات طيران الجزيره رخيّص وكويّس لا وبعد الحلو فيه انه يروح الصبح بكير
ويرد بالليل متاخر شوي ... يعني جنكم رايحين السوق بس لدبي طير الصبح وتسوق في
هالمجمعات الزينه ورد الديره بالليل ومن غير جواز على الله ثم على بطاقتك
المدنيه ... عاد شكثر اعرفهم يسوونها الصراحه
وهالايام اتهدد على
الروحه ترى .. اللي بيروح معاي حياه الله الطياره طيارتكم
ووصلنا دبي ولله الحمد
وأجرنا لنا سياره ومعانا العم ((جارمن)) جزاه الله خير يدلينا شوارع دبي ولو انه مرات يخون ابن الحلال بس يالله مو منه من الحفريات والتعديلات اللي قاعده تصير بشوارع دبي
وهذا شارع الشيخ زايد ماشاءالله هالشارع تقول قاعد بامريكا من طول عماراته وفنادقه الشاااااااهقه
وخّر شوي يالطيب مالنا خلق مشاكل يالحبيب
وصلت الفندق اللي حجزته عن طريق النت ولله الحمد واسمحولي ماراح احط صوره لأنه وبكل صراحه مو مال تصوير ... بس الزين فيه ليلته بـ 16 دينار ويسمحلي الفندق مره ثانيه لأني ماراح احجز فيه ... نتجاوز هذه النقطه ونروح لأحد الاماكن الجميله في دبي وهو فندق اتلانتس وهو صلب موضوعنا اليوم واللي اهو التجول والتسيح في دبي .. هالفندق يسوون له عروض في ايام محدده تطلع عليك الغرفه برخص التراب مع الاستمتاع بجميع مرافق الفندق من اكواريوم واكوابارك صج انه شوي بعيد عن السنتر بس زين زين حلو
وهذي احد أزقة وممرات اتلانتس
وتمر على الاكواريوم مال الفندق
وتتشيّش للدخله ... يالله شورانا عاد
جنها سفينه غرقانه ... يخرب بيت العدو تذكرت رحلة السفينه الغرقانه في شرم الشيخ
ماشاءالله الحين صايرين ابطال
وتصورون عادي وقريبين من الحدث والا وقت الصجيه لو يقولون لكم دخلوا عند اسماك
القرش ولا واحد يقرب
عاشت الخرجه اللي معاك تنظف فيها ... الحبيب يمسح جام الحوض من الداخل مع اليرايير
افلام رعب مو اكواريوم هذي ... دخان
يطلع من تحت ريولك لمبات تشب عند راسك ... اوادم ماتدري من وين تطلعلك ... حق
التخرع مو وناسه
يالله عاد الحين نشوف الكائنات البحريه داخل الاكواريوم
سبحان الخالق
هذي اظن اسمها دجاجة البحر
اهو جذي من فوق والا شي ماسك فيه مادري الصراحه
برطمك يالحبيب ... لاتطنقر علينا
تبارك الرحمن
لا اله الا الله
سبحان الله
الله اكبر
ياعمري يالبوز
نفس الشي سبحان الله بس الالوان غير
قايلكم فلم رعب مو اكواريوم
عاد هالنوع من السمج لازم تركزون فيهم بالضبط وتتأملون
لازم لازم تلاقون فيهم جم سمجه خبله تمشي عكس السير
نظام خالف تعرف الاخت
وهالشي اهو اللي خله الخيايطه يسوون
لهم تي شيرت على هالسالفه العبيطه
السمجه الحمره عكس التيار
انتي وين اهلج ؟؟
شفيه الأخ صاير مدرس احياء ويعلم زوجته يعني ؟؟
يقولها شوفي هذا الحلج وهذا الخشم وهذا الشسمه وهذاك الشيسمونه ... وروح بزبز عليها حتى تصدق انك صج فاهم الطبخه وانت مايندرى عنك
يالله نتسوق شوي داخل الاتلانتس
ينقش اسامي من تحبون على القلاصات
... ومادري شيسوي سوالف ثانيه بعد ... اهم شي اسم من تحب ... يعني بيمسكون الواحد من ايده اللي تعوره
تخبز ... بس بذرابه ... شحلات خبز قبل ان ماياك بعنف وضرب بهالعجين تقول متهاوشين والا ماتقول خبز
وايد رخيص ترى بس بـ 105000 درهم بس يعني 8 الاف وربع كويتي بس
وهالطيبه تكتب هم اسامي من تحبون على هالورقه ... طبعا الكل من تحبون ماكو من تكرهون يعني ؟؟
شفيه السلطان زيزو ؟؟
عم بيخر
ومجسم صغير لفندق اتلانتس ... وبجذي خلصنا من هالرحله الصغيرونه الى اتلانتس ونروح الحين نتسوق في جم مجمع من مجمعات دبي وهما
مجسمات اوادم طايحين من فوق
نجرب عدسات في احد المجمعات لقينا هالمحل وقمنا نجرب عدسات
ها ماكو سيرفس للفيزا داخل المحل ؟؟
من ربع الانجليز اللي تحطلها فلوس ترقص وتسلم وتغني وتعنفص
برج خليفه في دبي للحين هدوء
بعدين اشتغلت النافوره الراقصه ... وهات يارقص
وندش سكي دبي ... ويستقبلونك هالفلبن
اعنبوا دار بليسكم ماتموتون من البرد ؟؟ شنو يشربونكم ؟؟ انا دشيت نص ساعه تجمدت اطرافي وانتوا اليوم كله ماصار فيكم شي ؟؟
يامعود ناقصين بروده احنا عشان تعطينا من هالبارد ؟؟
مبسوط بالقعده يالحبيب ؟؟
خوش بيت هنيالهم اصحاب هالعش الثلجي ... هذيل اللي يقولون لو كوخ نعيش فيه مع بعض بس والله شكلها وقت الصجيه ابو الكوخ لا بو اللي يقعد فيه
مادري اهو نقص حنان والا هوشة
؟؟
خوش مدربان
ها من التعب مبسّط هني ؟؟
اوله شنو هالدخنه
ياساتر من وين طلعت انت
ها تصورين الزميل ؟؟؟
فينا تيليفريك فوقه ياشباب
وليــه الطيحه قشره
ماخذين الامور ببساطه الشباب
ياكبر الطيحه تعور ... عاد مو شي تطيح على ثلج صناعي لو ثلج صجي يهون بس صناعي يااااااااو تكسر الواحد
عاد صج هاللعبه ودي اتعلمها بس الخوف كل الخوف ماتبقى فيني عظمه صاحيه
سوالف خاثره
بس ياجماعه نزلونا هونا يبا ماصارت تيليفريك نبي نجرب الصجي ان شاءالله من ربوع لبنان
واشوفكم في الجزء القادم ان شاءالله من دبي ايضا ولكن من اماكن اخرى