موضوعنا اليوم اسمه بين السما والارض … وهو مأخوذ من الفلم العربي الشهير بين السما والارض لما انحكروا بالاصنصير وموراضي يتبطل فيهم … فاليوم خلونا نتكلم عن حوداث الطيارات وبعض المواقف اللي تصير بالطيارات وعن الطيارات وبعض الخمبقه اللي تصير فيها ونشوف اول صوره ونتكلم ونقول

انا اعتقد انه الطيار يومها كان لاكّه … يعني امكثر الحبيب من الواين .. وبدال ماينزل الطياره على مدرج المطار … نزلها على الخط السريع  فعادي اتصير ليش لأ خو امبين … طيح الله حظه … امقرشع بكل شي حتى الشبك مو مخليه

**********************************************************

الظاهر هني الطيار متولع بالجواخير واللي يطيرون حمام .. مو يقولك المثل انه المطيرجي اذا تولع تولع خلاص بعد ماكو فايده منه كلش يعني اهم شي عنده الحمام … والظاهر هني طيارنا امطيرجي … وحب يكتشف السر او يجرب ويشوف شنو شعور الحمامه لما تقعد تقلب واتلوت بالجو شوي يسار وشوي يمين شنو يكون شعورها في هالوقت ؟؟؟ والظاهر من كثر مااندمج شوي ماثبت نفسه الا بين وايرات الكهرباء عاد تعال الحين شيفكك ؟؟ لو يهفك هالميتر وررررررررر والا مقطعك ستين قطعه … اخرتها جني بشوفك زابن فوق هالارايل هههههههه 

زابن بمعنى طب بالعاميه وبالفصحى قد حط على مكان ما

وهذا مصطلح دارج عند المطيرجيه … مثال : هالحمامه ازبنت على الاريل … يعني هالحمامه طبّت او حطت الرحال على الاريل … وليييييييه تعالوا انعرف يعني شنو الاريل … الاريل يعني عامود التوجيه الهوائي لالتقاط الموجات التلفزيونيه والراديو …. عاد مالقيت الا اضرب هالمثل الا على الاريل ؟؟ خو اشفيها الطوفه ؟؟ 

**********************************************************

هوب هوب هوب سلامات يالحبيب غدا شرك ان شاءالله ماكو الا العافيه شوية صداع ويروح .. اخذ بندولتين واستأنف الرحله من جديد

**************************************************************

انزين ليش عاد امبطل باب الطياره ؟؟؟ لايكون احد خطف الطياره وأحد الركاب يبي يحذف عمره ؟؟

خو يسوونها الهنود عادي ماعنده مشكله على ابو انه يبي يفك عمره من الارهابيين يبطل باب الطياره ويحذف عمره وبدال لايفك عمره يعفس الامه كلها اللي بالطياره لوووووول

وتعال عاد عقبها لقّط الركاب اللي اشدخت فيهم الطياره … والسبب شنو ؟؟؟ هندي 

********************************************************

يقولك قبل الغواصين والنواخذه كان لهم صيت في البحر مو ؟؟؟

بس عاد عقب ماتطورت الدنيا واعرفوا الطيارات بعض وارجع واقول بعض هالشياب قاموا يقزرونها على بانكوك وهالسوالف … فلما اتمر الطياره فوق بومباي وربعها يقعدون يشلخون ويبزبزون … قولوا شلون عاد ؟؟؟

اييييييييه سلمكم الله اكو بعض الشياب عسى الله يخليهم عيونهم زايغه شوي فلما يشوف اي مضيفه وياه بالطياره يفز قلبه اسم الله عليه ويقوم يتخيلها سميره توفيق … خو كانت معبودة الشياب قبل سميره توفيق ملهمتهم عسى ماشافوا زول الا على طول شبههوها بسميره توفيق … المراد ماطولها عليكم عاد تلاقي الشايب ابو عين زايغه هذا اميمع المضيفات ويشلخ عليهم واخذ من هالقصص الفلاتيه … مره يقولك غصت كيلوين على قولة المسلم  ومره يقولك انا ذبحت يريور في هالنقعه هههههههه شدعوه عليك وين شفت هالنقعه وانت في الجو ؟؟ اخاف نقعة الشملان بس وانا مادري وحسبالك بومباي ومره يقولك انا ضبطت خمس كشميريات على هالسيف لما كننا نبي نبحر والا ذاك الزرف من الكشميريات اللي يحت الطير من السما … حشا شوزن …  اي عاد اكمل لكم والا ذاك الزرف من الكشميريات … اللي لما شافوني وانا قاعد احمل الاغراض في البوم جان يطقهم عقر بقر … انزين بو راشد ليش طقهم عقر بقر من جمالك والا من خبالك ؟؟ لالالا هذا من جمالي وانا ابوك شافوني طقوا ريل بالسما وريل بالارض ماانحرك من هالمجان الا لما يعطينا ويه هالمزيون … ويقصدون منو في المزيون ؟؟ انت ياا الغواص اللي يقص القصه على المضيفات اللي في الجو 

بعض التعاريف …. الزرف يعني مجموعه من كذا وكذا ههههههه

شوزن يعني بندقيه في اللغه الفصحى 

البوم يعني نوع من انواع السفن الكويتيه القديمه والمشهوره بذاك الوقت

عاد ويقعد يشلخ ويشلخ ومن كثر الصواريخ اللي قاعد يدزها الريّال مايوعون الا والكابتن مندمج وتلاقيه امنزل الطياره في البحر وقالبها سفينه 

**********************************************************

خل اقولكم سالفه وهذي صارت من صج ترى  مره كننا قاعدين في احدى الديوانيات وكان معانا شخص قاعد يسولف سالفه من صجه انا بداية السالفه شدتني الصراحه لأنه فيها رحله وجذي قلت خل اشوف شالسالفه .. وقطيت اذني ابي اتسمع للحديث .. لكم السالفه كما رواها اللي كان قاعد يقصها وهذي على كلامه يقول هالسالفه صارت له اهوه لووووووووووووووووول

يقولك في يوم من الايام كانوا رايحين البر على وانيت بو قمارتين وانتوا مثل ماتعرفون البر مقطوع لاحنيس ولاونيس  المهم سبب رحلتهم كانوا رايحين يصيدون طيور يعني قنص … يقولك وفي وسط الرحله جان يخلص عليهم البانزين ولييييييييييه اشهالحاله ؟؟؟ شلون الحين انرد لبيوتنا … وهالحجي من زمان يعني قبل لاتطلع سالفة الموبايلات عشان لحد يقول ليش مايدقون تلفون … اي عاد اقولكم جان يتوهقون ماكو لابانزين ولاشي ولااحد يمر صوبهم عشان يروحون واييبون بانزين ويعبون ابد ماكو انقطعت كل السبل عليهم … وكان الجو حااااااااار حددددده … شيسوون شيسووون ؟؟؟  وفي وسط التفكير العميق والحاله اللي اهمه فيها جان يسمعون صوت طياره هههههه اهمه ماصدقوا بالاول … طالعوا مني مناك والا فعلا طياره … نعم طياره ومن نوع بوينج 747 على حسب رواية الراوي  انتوا الحين حسبالكم انهم بيأشرون للطياره وجذي من هالسوالف ؟؟؟ لا ياحبايبي مو جذي السالفه افا عليكم بس انتوا تفكيركم محدود لووووووووووووووول جان اتيي فكره جهنميه حق الراوي اللي قاعد يروي القصه لنا  اي ماقلتولي شنو اهيه الفكره ؟؟

اهاااااا انا اقولكم شنو الفكره … الحين اهمه رايحين يصيدون طيور … حلو ؟؟؟ يعني اللي معاهم قناصه ونقوشيّين حدهم  والاخوان يبون بانزين وماكو محطات بانزين قريبه عشان يعبون فشنو سووا تعتقدون ؟؟

طلّع الراوي اللي قاعد يروي القصه البندق مالته … بين قوسين الشوزن … جان يعبيها فشق بين قوسين طلقات …جان يرمي تانكي البانزين مال الطياره ههههههههههههه جان يحوشه ويقضّه قض صغير عشان ينقط شوي شوي ومايصير بالتانكي نزيف … عاااااش بو الشباب بززززززززز ابي بعد اكثر من جذي صواريخ  

الحين البانزين قام يصب من الطياره .. شلون اهمه يعبون بالله ؟؟؟ ادري طرى على بالكم هالسؤال لكن الحل موجود عند بو الشباب الجذاب العود … انا اقولكم الحين شلون قاموا يعبون

كان معاهم اطياس … يعني جمع طاسه مثل مالت شرب اللبن وجذي هالسوالف  وكل واحد منهم مسك له طاسه وقام يركض تحت الطياره اللي قاعده اتخر بانزين وكل واحد تنترس طاسته يوخر وايي رفيجه الثاني عشان يعبي طاسته لوووووووووووووووووووووووووووووووووووووووووووووووووووول ويروح اللي تنترس طاسته يصب بانزين بالوانيت ابو قمارتين ويرد مره ثانيه ويلحق ربعه عشان يعبي الطاسه مره ثانيه  لا أبي اقوى من جذي بعد

المهم خذوا حاجتهم من البانزين واكتفوا … عاد الحين اهمه خافوا على ركاب الطياره اللي قضوها خافوا اذا خلوها جذي يخر البانزين تطيح الطياره ويموتون صح ؟؟؟ لا يبا لاااااااااا فكر صاحبنا الراوي مره ثانيه فكره جهنميه اخرى عشان يرقع التانكي اللي قضه اهوه بالطلقه الاولى … جان يطلع البندق مره ثانيه ويعبي فشق مره ثانيه جان يرمي التانكي مره ثانيه جان ينرقع التانكي ويتسكر ولاجنه فيه شي وكملت الطياره رحلتها في سلام ولاجنه صار فيها شي  ياالله شنو هالنقوشي هذا ومن هالبعد وهالمسافه وشنو هالافكار هذي القويه اللي قاعده تطلع .. الحين عاد اهمه خلاص تطمنوا انه الطياره ماراح تطيح لأنهم سكروا الفتحه اللي انقضت بالاول مو ؟؟ واهمه خذوا حاجتهم من البانزين … حسبالكم خلصت القصه ؟؟؟ لا بعد باقي شوي … يقولكم لما حركوا بالوانيت مالهم من بعد ماعبوه بانزين … أول ثاني ثالث بدّل رابع الحبيب الحين … جان يقول حسينا الوانيت قام يرتفع شوي شوي عن الارض ههههههههههههههههههههه  اي ماقلتولي ليش ؟؟

لأنهم حطوا بانزين من الطياره وبانزين الطياره اقوى من البانزين العادي وبجذي اوصلوا وردوا بيوتهم بسرعه قصوى اسرع عشر مرات من السرعه العاديه لوووووووووووووووول

وخلصت وملصت ويت الديايه وعنفصت

*****************************************************

الحين هذي بعد آخر سالفه بقولها عن الطيايير وهم هذي صج بعد  

يعني كان اكو شخص قاعد يروي لنا هالقصه المهم في يوم من الايام يالنا واحد من الشباب ويايب معاه صوره طياره … المنظر حلو الصراحه احنا حطيناها وعلقانها في المكان اللي كننا فيه 

هذي صورة الطياره اللي يابها صاحبنا انا صورتها وقلت بوريكم اياها 

المهم عقب ماعلقناها وجذي …… جان يطالعنا رفيجنا اللي ياب هالصوره جان يقولنا تدرون انه انا اللي امصور هالطياره ؟؟؟   

هههههههههههههههه ليش عاد ليش ؟؟ 

ياربي انا اشكثر اعاني ؟؟؟؟؟؟ 

وسلامتكم وتعيشون وهذي كانت جولتنا بين السما والارض اتمنى ان شاءالله يكون الموضوع عجبكم وان شاءالله بل واتمنى من اللي شيسمونه يخفون شوي من الجذب واللي بيجذب يجذب بعقل مو جذي عاد