السيول بدت تتجمع في الشارع الرئيسي

كان يوم السبت الموافق 22/1/2005 يوما حافلا بالخير والحمدالله فقد طق المطر علينا من فجر يوم السبت الساعه 2 واستمر الى الساعه 9 مساءا ولم يتوقف المطر ولله الحمد … المهم الاهل امخيمين وانا كنت في البيت وبروح لهم فركبت سيارتي الساعه 12 الظهر وطلعت من بيتنا متوجها الى مخيمنا في البر … فلما طلعت وانا في الشارع الرئيسي للمنطقه توني ماطلعت والا هالزحمه ماشاءالله من المطر

السيول بدت تتجمع في الشارع الرئيسي 

اشوف يميني والا هالشاب اللطيف قاعد يتمشى في المطر عادي عنده ولاهمه شي الاخ

ياساتر هني ماقمت اشوف الا ليتات السياره اللي جدامي لا وعلى الخفيف بعد 

ووصلت الى الطريق المؤدي الى مخيمنا وماشوف ماشاءالله الا هالغيم اللي صاك والمطر يطق

واختلط الحابل بالنابل التراب قام ينزل على الشوارع والسيارات تتزحلق شوي يسار وشوي يمين … عاد وتعال وشوف اللي يسوي روحه قوي وبايعها وموهامه الطين ويدش يعني ترى انا اقوى واحد بالدنيا العالميه … واخرتها هىهىهىهىهى تعالوا طلعوني … اي من الاول قلنا لك لاتدش لاتدش لاتصير فلتة زمانك ماطعت الحجي … يالله فك عمرك الحين والله محد يوقفلك يخلونك اتصارخ واتحفر بروحك

هالشاب اللطيف راعي هاللوري امسوي روحه ترى مو هامني واخرتها طبع بالماي ^_^

واطالع يميني ويساري واذا بي أرى هالمخيمات المتاخمه على جانبي الطريق

انا بعرف شغله ليش بعض رواد هالمخيمات لاصقين بالشارع ؟؟ شنو الحكمه علموني ؟؟

انزين الحين على هالمطر واحد اهبل ياي مسرع بسيارته وهوب وازلقت فيه السياره … شلون يعني ؟؟؟

والا وانت نايم بالليل والا تسمع صوت السيارات امشاخط عليك يمرون ونننننننننن ونننننننننننن

ماسوت عليكم هالمخيم عاد ^_^

بالله بذمتكم تقدرون اتفرقون الشارع من التراب ؟؟؟ مااعتقد

وبدأت السيول والمياه تذهب الى الخيام ^_^ تربك تربك … جك جك جك … تربك تربك … جك جك جك

واستمريت في مسيري متوجها الى مخيمنا وزاد المطر وبدت الرؤيه في الانعدام … ماقمت اثبت طريجي 

فتوكلت على رب العالمين وكملت خو بعد قطعت نص المسافه مالكم امل ارد البيت عقب مامشيت هالمشي نص ساعه واخرتها ارد البيت ؟؟؟ انسوا  

ووصلت ولله الحمد الى اليابسه 

يالله بسم الله … ونتوكل على الله يبيلنا بعد 3 كيلوات تقريبا على مانوصل المخيم اوكي ؟؟؟

وتطالع على يمينك واتشوف ……. هالشي

وامشي وامشي وامشي ابص شمال ماشوفش حاجه ابص يمين اشوف تواير بعيده ^_^ والارض فاضيــــــــــــــــــــه

ههههههههههههههههههههه واخيرا وصلت المخيم وتبدوا قطرات المطر على جامة السياره وعلى الخيام تهطل منهمرة وبغزاره وماكو احد يحوس بره المخيم وينهم ؟ 

وقعدت بسيارتي لين قلت يمكن تهدأ الاوضاع شوي يعني

والا السالفه شكلها امطوله

حشا اتقول قاعد بافغانستان على هاللبس … اشفيهم متلبجنين جذي ؟؟

متلبجنين يعني لابسين اهدوم وايد من البرد ^_^

المهم نزلت ودشيت داخل الخيمه ..

 طبعا في جو مثل هالجو مالك الا تقعد وتنثبر داخل الخيمه وماتتحرك واتجابل الدوّه واتحط غواري هالشاي واتحط ايدينك على الفحم تتدفى ^_^

وتتسّـند على وحده من هالمخاد وتتأمل في الطبيعه من باب الخيمه … ياسلاااااااام على هالقعده

وصينية النفيش يمّك وتقعد  تاكل عليك بستين الف عافيه

يبيله كستنه بعد نياهاهاهاهاهاهاها ^_^ مو ؟؟؟

مممممممممممم دورت كستنه مالقيت … عاد طق براسي الا ابي كستنه وبدأت رحلة البحث عن الكستناء والا الساعه 7 بالليل جود ظلمت الدنيا والمطر لازال يرفرف .. على قولة صاحبنا 

المهم ركبت سيارتي بروح اشتري كستنه من احدى هالبقالات المتنقله اللي على جانبي الطريق .. الحين عاد في طريق العوده الى الشارع الرئيسي والدنيا ظلمه ماتشوف ايدك من المطر ماشاءالله  وتخيل نفسك في طريق رملي ومافيه جادّه … الجادّه تعني طريق رملي مثل الشارع … من كثر ماداسوا عليه السيارات صار مثل الشارع بس على التراب 

فلمحت واحد جدامي يمشي على التراب قلت وراه لين يوصلني الى الشارع القار ووراه وراه

ليـــن حذفني على القار … القار يعني الاسفلت ^_^

ومشيت في طريق مظلم هههههه تبدو الفرحة فيه قبلنا وضحكنا ضحك طفلين معا وعدونا فسبقنا ظلنا هههههههه

اي ظل اي بطيخ أم كلثوم يبا ماكو لاظل ولاهم يحزنون يامعوده طريج كله ماي وظلمه وماكو ليتات وبروحي اي لعب زين اي بطيخ ماقول الا مالت على الشسمها ام السنانسين

وليييييييييييييه الحين وين هذيل الجمعيات المتنقله ؟؟؟

الحين صار الطريج اشطوله وتوه قبل شوي اشزينه  اي ليش جذي عاد ؟؟؟

مممممممممممم جني أرى ليتاتن قد أينعت وقد حان وقت دندرتها

أجل انها ليتات ياولدي …. عيناها سبحان المعبود ضحكتها انغام وورود … حشا صارت سعاد حسني مو ليتات

ووصلت الطريق العام وماشوف ولا قطو بالطريج هههههههههههههه وينكم يااصحاب الجمعيات المتنقله نبي كسنه يبا شلون يعني ماناكل اليوم ؟؟؟

وتبدوا المياه تارستن الطريق والمطر لازال ينهمر على السياره وعلى الشارع والدنيا برد برد ياربي ماذا افعل ؟؟؟

المهم مالقيت اهل البقالات المتنقله شالوا شلايلهم وانحاشوا من المطر الظاهر خافوا على البضاعه الموجوده عندهم ^_^ عاد من زين البضاعه كلها جم ابريج ماي وجم كرة نايلون وخيشتين فحم وكتكو ابو الاصابع

عاد انا شسوي الحين ؟؟؟ مالي الا ارجع المخيم مره ثانيه خالي الوفاض

وتاني تاني تاني تريرم راجعين للخيمه تاني تريرم والبرد والتراب من تاني …. يالله راحت ايامك ياعبدالحليم

المهم رديت المخيم مره ثانيه والا المطر بدا يخف شوي شوي لين وقف …

ممممممممممممممممم مايصير جذي ياناس لازم اسوي شي

وفكرت فكرت فكرت

جان اقول ماكو الا اطيح له شوي على الدوّه …. ههههههههه خوش فكره تعالوا حياكم

جان اييب قطع من الدجاج المتبّـل والمبهر واطيح فيه تقصص ابهالسجينه … واحط الفحم بوسط الدوّه جان اييب الدياي واحطه فوقه هاهاااااااااي فوزي 

عاد الشوي مايحلا الا بشوية طماط مقلي على الفحم وابصله داثره بروحها مع الدياي ممممممممممممم شكله لذيذ 

وعقب مايخلص الشوي طيح له من هالاكل الزين علي بستين الف عافيه ان شاءالله

عاد المره اليايه حياكم ترى عازمكم انا اللي بطبخ لكم … بس واللي يعافيكم الماجله عليكم ^_^ ماجله ماجله 

عاد عقب هالوجبه الدسمه تدور الفراش حق النوم ^_^

واتحط راسك واتنام في امان الله

وثاني يوم من صباح الله خير ماتسمع الا صوت عييييييييييييين وعاااااااااااااااان وطررررررررررررط وطيييييييييييييييط

وليييييييييييييه شنو هذا بعد ؟؟؟؟

اتبطل باب الخيمه وتشوف هالشمس الساطعه من عقب مطرة امس ماشاءالله والارض رطبه لااله الا الله ….  والا هالعيال امشغلين بقياتهم ويلعبون فيهم … عاد يخلونك اتنام ؟؟ انسى

عاد انت ياللي توك قاعد من النوم ياخذك الحماس واتروح ركضه حق واحد منهم واتنزله غصب من البقي ماله وتركب انت ^_^ لوووووووووووول يالله ماعليه ياما انزفينا ايام الصغر هىهىهىهىهىهى … عاد انت مو تصير نحيس اردف اللي نزلته وقص عليه قوله تعال خل نفتر انا وياك في البقي وركبه وراك ^_^

عاد انا ليما الحين براسي الكستنه شلون يعني ؟؟؟؟؟؟

أبي كستنه مو شغلي الا اطلع كستنه لو احدر الديره اييب وارجع مو شغلي جان اركب سيارتي مره ثانيه …. واستأنفت رحلة البحث عن الكستنه من يديد

يالله تعالوا الحين نروح انييب كستنه من الجمعيات المتنقله المتاخمه على الطريق الرئيسي

عاد تدرون امس كان مطر وايد ماشاءالله غرقه صح ؟؟؟

تعالوا الحين انشوف شنو صار في بعض المخيمات من المطر اللي حاشهم ^_^

ههههههههههههههه ذكروني بمسلسل طاش ماطاش يوم كانوا بالكشته وطق عليهم مطر واغرقوا لوووووووووووول

طاش طاش طاش ماطااااش

مساكين الخيام بوسط بركه من الماء البارد جدا ^_^ الحمدالله ماصار فينا جذي والا جان بلاوي هىهىهىهىهى ياويل حالي

الحين سباحه اصحاب المخيم يروحون حق مخيمهم … والا يأجرون جت سكي عشان يوصلون هناك ههههههههه

يالله ماعليه شباب تكبرون وتنسون ان شاءالله 

مخيم آخر حاشه طشـّار من المطر قاعدين يفصخون الخيام اللي بوسط الماي عشان تطقهم الشمس ^_^

انا اول مره اشوف ناس اتخيّم بوسط حفره يبا صعدوا شويه فوق عشان لما يطق المطر ماتتنقع خيامكم … يالله ماعليه تحصل باحلى المخيمات

وجاري البحث عن الكستنه

وأخيرا جان الاقي جمعيه متنقله ^_^

وشرينا كميه من الكستنه وعدنا ادراجنا الى المخيم

وييب الفحم من يديد وحطه بوسط الدوّه … ياعيني على منظر الفحم هههههههههه شنو الزين فيه بالله ؟؟؟

عاد الدوّه ماتحلى الا مع غواري الشاي ودلـّة القهوه

وانطر شوي لين تحما النار وييب الكستنه وقطها فوق الفحم ياسلااااااااااااااااااام على الكستنه ياسلاااااااااااام

الكستنه فوق الفحم قاعده اتبغبغ بغبغبغبغبغبغبغبغ

ياعيني جنها بدت اتصير اوكي …. والدله اللي مادري شنو فيها من الهيل مثل مادري منو ريحتها مادري شفيها

وأخيرا استوت الكستنه … وشيل اللي فوقها الفرو وحطها بوسط هالصحن واكل عليك بالعافيه ان شاءالله

هذي كانت رحلتنا في البحث عن الكستنه وان شاءالله اتكونون استمتعتوا معانا في أجواء المخيمات في الكويت

وسامحونا اذا طولنا عليكم في هالموضوع

مع تحيات اخوكم دندرن

تصوير وتعليق دندرن

HaMaD

وتذكروا من سرق فليس منا