فريق الفارسي للطيارات الورقيه … هذيل مجموعه سلمكم الله متخصصه في الطيارات الورقيه والسيد بو فارس هو صاحب اكبر طياره ورقيه على علم الكويت دخلت موسوعة غينيس
فاليوم سلمكم الله بوريكم شويه من عروضهم اللي يسوونها هني بالكويت واهمه عادة كل جمعه يتيمعون في مكان معين في الكويت ويطيرون الطيارات
فمره تلاقونهم في المسيله ومره صوب بحر الشويخ ومره في بنيدر يتجولون الله يعطيهم الصحه والعافيه
اليوم بنشوف مكانين من هالاماكن واهمه شاطئ المسيله وبحر الشويخ
وبداية مع شاطئ المسيله
ترم ترم
بعض الطيارات الورقيه اللي يطيرونها … اللي على دب واللي على اشكال طيارات واللي على جلاب عزكم الله … اي شي ان شاءالله يخطر ببالكم بتلاقونه
هو هو
احد المطيرجيه المبتدئين … اي عدل عدل نظارتك في بعض الاحيان ترى ماتفيدك
ياسلام خوش مطيرجي يمارس هوايته بجد واجتهاد
افا تعبت ؟؟؟ يالله ماعليه شد حيلك المره اليايه
يحاولون يطلعون الطياره العالقه بين الاسلاك الشائكه والصخور البحريه المتاخمه على شاطئ المسيله
صارت طوفة محول الله يهديكم على هالشخابيط مو علم … ماظلت ذكرى ما انكتبت على العلم بس خوش فكره الصراحه
ها مستعده ؟؟؟ واحد اثنين ثلاث …
قاعده اتمترين دراعه الله يهديج … نبي خام 3 امتار بس يكون بو عرضين واللي يعافيج
اسحب … هوووووووب يالله … لايوقف
حركات الشباب
هذا سلمكم الله اصغر مطيرجي توه بادي بهواية التطيير قولوا ماشاءالله وذكروا الله
نبي ماي يالطيبه
الميه تروي العطشان … وتطفي نار الحران … خو قالوا سماعة بلوتوث حق السياره مو هني
مالومك والله الحر عامل عمايله
يحليلها بريحاتها … والله زين منها للحين صامده في هالحر من غير لاماي ولاهم يحزنون
عدل عدل … يالزميل يالزميل … جك جك جك جك لاحق لاحق الله يحفظك على شقا التصوير … هم قولوا ماشاءالله
ممسكا بالطائره اللي تسوي جمبات استعدادا لتطييرها
وفجأه … تريــــــــــــــــــــــــم
هبت عاصفة هوجاء كادت ان تقذف بصاحبنا قذفتن بعيدتن
شوي والا مطيره صاحبنا الثاني ….
عاد هالحبيب بو وليد هوايته اذا صار هوى ياسلاااااااام يشتغل جمبات ونطات راح نشوف بعضها ان شاءالله
العم بو فارس واحد الاصدقاء يصلحون احدى الطيارات العالقه
والحين خلونا نشوف بعض الطيارات الموجوده ….
تشكيله من الوان علم الكويت … ورايحين ورادين وسوالف ووناسه
مممممممممم محاولة اقتراب وتحرش من الطائره السوداء
جان يختلط الحابل بالنابل وتصير معركه طرباخ بس معركه مسالمه مافيها لا صواريخ ولاقذايف حدهم خيوط
خوش شي راعي هالكارافان الصراحه .. حاطله دش حق الستلايت ووحدة تكييف على الجنب ومضبط الشغل ياسلام عليه
والله ترى خوش شي حق السفر مايتوهق لا بسكن ولابطيخ اصفط كرفانك على صووب وريح عمرك … تبي تروح بحر يفيدك . تبي تروح بر يفيدك … تبي تسافر يفيدك
يبيله واحد جذي
والحين ننتقل لموقع آخر وهو بحر الشويخ
هني الشباب قاعدين يتفقون على شي … شنو اهو ياترى ؟؟
نزلوا شوي وتعرفون شقاعدين يخططون عليه
اركض اركض ياولد … عليها عليها … بيطيرون هالكره العوده وبيقطونها على راس اللي انحاشت تحت الكره ههههههههههههههه
وحده من الطيارات الورقيه من الداخل على علم الكويت
الأم البطريقيه العوده وعيالها تحتها … وفي شارع الجهراء صادفوني ثلاثه رايحين الصالحيه
وخالد ينط فوق روس الاوادم هوبااااا
العم بو فارس يطير طياره
الله يعطيك الصحه والعافيه ماقصرت على هالشغل الطيب انت وكل المجموعه اللي معاك يعطيهم العافيه فردا فردا ونفر نفر
وعسى الله لايفرقكم
وانشوفكم ان شاءالله على خير ومحبه وود وسلام
واللي حاب يستفسر اي استفسار حاضرين وبالخدمه واللي حاب يحضر ويشوف تطيير الطيارات حياه الله المجموعه اللي هناك كلهم يرحبون فيكم
مراسلكم من قلب الحدث (دندرن)