شي عيدكم مبارك وتقبل الله طاعتكم وعسى الله يعوده علينا كل سنه يارب
طبعا من جم يوم كان العيد بحلته وزينته وحلاته اللي مالها أول ولاتالي ^_^
والحمدالله اللي بلغنا رمضان والله يبلغنا فيه كل عام يارب العالمين
المهم مابي اطول عليكم … وخلونا نشوف الواحد شنو يسوي بالعيد ووين وده يروح وليش واشحقه ولماذا ؟؟
بس لما اتحاولون تروحون راح تنصدمون في جم واقع مرير فعشان جذي تعالوا نشوف شكو ماكو … ادري شكلكم دختوا من الهذره بس يالله حياكم
طبعا اول شي خلونا نتكلم عن مظاهر العيد … خو يقولك قبل العيد مباشره في اواخر ايام رمضان المبارك … الاسواق اتصير لويه وزحمه وقتلى وجرحى عشان كل واحد يتزهب حق العيد … عاد الله يعين البنات .. خو احنا الحمدالله طرق الدشداشه اليديده والغتره والعقال وانت اللي ماشي … بس البنات الله يكون بعونهم ^_^
المهم خلونا نطلع ونروح اول شي طق براسنا نتغدى بمطعم … فمسكنا خط البحر في الطريق الى المطعم
انزين سؤال اهل السياكل عارفين هالشي انه ظهورهم تطلع … ليش مايلبسون شي يغطي ظهورهم ؟؟
خو لاتحوشكم لفحة هوى والله اتييبكم فوق حدر .. بس يالله الله يستر عليكم ان شاءالله
من مظاهر العيد … تلاقي الشباب يتيمعون في سياره وحده ويطلعون تلاقي سته سبعه في سياره صغيره ومتحاشرين مع بعض لا والمصيبه اذا كانوا امغترين … بيــــه عاد كل واحد يعابل بغترته واللي قاطها على جتفه
بس أهم مافي الموضوع الدببه المعلقين بالسياره
ويلاحظ الشارع واقف من الزحمه
المهم نوصل سوق شرق ونطالع على يسارنا نشوف الجسر اللي يوصل لي سوق شرق
هم بعد زحمه يعني الواحد شيسوي بالله ؟؟ يركب هيليوكوبتر عشان يوصل المصافط؟؟ ^_^
نكمل طريجنا متجهين إلى المطعم اللي نبي نتغدى فيه ونوقف عند الاشاره
ماشاءالله لااله الا الله … ولاواحد فيكم لابس خوذه ؟؟
خو لبسوا خوذه ماراح اتأثر فيكم … يبا ترى الطيحه قشره الله يحفظكم
المهم نكمل ونوصل حق مطعمنا … اللي اهو ميس الغانم
هههههههههههههه شوفوا الزحمه العالم وين واقفين عند باب المطعم وعلى الدري والسيارات ماكو مواقف ولاشي ..بالدور ياشباب بالدور لحد يخطّر الثاني بليز
صوره للمطعم من الخارج … والعالم يتغدون داخل عليكم بالف عافيه … المهم طقينا فره مره ثانيه وردينا بعدين لأنه ماكو مكان نوقف وبعدين عاد تغلغصنا وحشرنا عمرنا ونزلنا طبعا تقريبا نص ساعه على مادخلنا داخل
ودخلنا واكلنا ولله الحمد
هالشاب اللطيف قاعد يقز على البحر .. هالصوره التقطت من داخل مطعم ميس الغانم
المهم خلصنا غدانا … وطلعنا قلنا بنطق لنا فره شوي على البحر وبعدين بنروح حق منطقه عالميه
قلنا بندش مسرحيه … بس خلونا في الأول نطق فره عالبحر شوي وبعدين نروح حق منطقتنا المقصوده
وانت ماشي في امان الله مالك ولاعليك باحد كلش بنوب بنوب والا اللي مار عليك بسم الله الرحمن الرحيم
هذا شفيه ؟؟
والا الثاني بعد هههههههههههههه شفيكم شباب ؟؟؟
شصاير عسى ماشر ؟؟ لايكون هذي اللي يسمونها فرحة العيد جذي اتسوي ؟؟
يه يه يه شفيه ميـّل الحبيب ؟؟
ميّل وحذف منديلوا كاتب على طرفي أجيلوا … عاش عبدالحليم بوحافظ
أهااااااااااا عرفت ليش ميّل عشان يلف واهوه ضاربه ويل يعني
ممممممممم من هيك عم يبكي
والعالم يطالعونه بس ماشاءالله عليه مشى درب طويل واهوه على تاير واحد … الله يحفظكم يايبا
بس هذيل اشوه لابسين خوذ مو مثل ربعنا اللي قبل شوي ولاواحد فيهم لابس خوذه ^_^
المهم نكمل ونكمل ونمر على الابراج
ههههههههههههه حلفي بس ؟؟
اخاف صج عاد ؟؟
لاوالله ؟؟
أوكي
مو مشكله يالله البنت عازمتكم بالابراج على حسابها
نكمل ونمر على حديقة الشعب … طبعا الزحمه واصله لي راس العاير هههههههه مابي ادخلكم … هىهىهىهى العيد الياي انفكر ان شاءالله بس خنشوف لعبه وحده من بره وهي طلقة الدبوس ياعل ماكو دبوس ^_^
هههههههههههههههههههه مايبينون من سرعة اللعبه والانطلاق الى الاعلى ومن ثم الى الاسفل
يامعود نحشت البرد الله يهديك
هذا صاحبنا انصدمت فيه لما رحت حق منطقتنا اللي بنروح ندش المسرحيه فيها هم موجود هناك
المهم يالله خلونا نروح حق المنطقه العالميه
وبدأت الشمس بالمغيب والغيوم بدأت تغطي السماء العابره ومادري شنو بعدين بس يالله مو مشكله قازره انكمل طريجنا
وندش بعدين منطقة خيطان العالميه
تريييييييييييييييييييييييييم موسيقى صاخبه واصوات مراويس ودنابك طاخ دم طاخ دم
ياسلاااااااااااام عالجو اينن ويهبل
اللي فيه خير يعد جم غيمه بالصوره هههههههههههه ها فيكم شده ؟؟ ماأظن ^_^
ونتجه الى سينما غرناطه لحجز تذاكر للمسرحيه ونوصل بالسلامه
وليــــــــــــه عاد ليش جذي كل مره مسرحية ينانوه واشباح ومادري شنو ؟؟ واشمعنى يعني في خيطان بالذات ؟؟ ^_^
هني السؤال ليش كل مره مسرحية رعب ومادري شنو ؟؟ خو غيروا التغيير حلو
هم بعد زحمه عند شباك التذاكر ؟؟
يالله طاااااااف هونا مانبي ندش زين جذي ؟؟
المهم طلعنا وقلنا خل نطق فره عالبحر مره ثانيه بعد الطلعه طلعه مالنا خلق نرد البيت
ومسكنا خط البحر وهم بعد زحمه
شنو هذا كل مكان زحمه ؟؟ ليش عاد ؟؟
على ماافترينا شوي جود صار وقت العشى وقلنا يالله خنشوف لنا مطعم ثاني نتعشى فيه وقررنا نروح مطعم تشيليز
ولما وصلنا هم بعد زحمه وليـــــــــــــــه كافي عاد
ماكو مكان حتى الواحد يوقف فيه … يقولك تعال سجل اسمك وانطر عاد لين مايطلع اسمك وتعال دش داخل
يالله على مايطلع اسمنا قلنا خل نفتر شويه حوالين المطعم ^_^
هههههههههههههههههه والا نشوف من الخلف في كراسي وطاولات فاضين داخل المطعم هىهىهىهى
عيل ليش الزحمه اللي بره ؟؟
يقولك يبون ينظمون عملية الدخول والخروج
عشان لايصير تهافت وتزاحم في ارجاء المطعم
زهقنا ومشينا هونا مانبي ناكل من هالمطعم قلنا خنروح مطعم ثاني
ورحنا مطعم فدركرز مو خسرانين شي بنجرب
هم بعد زحمه
هونا مانبي ندخل بعد وقررنا نروح الهاردروك
زحمه يادنيا زحمه ترييرم زحمه وتاهو الحبايب
يبا تدرون شلون مانبي نتعشى يمدحون مطعم بدر البدور
ومن بعد هالعشوه الخفيفه لووووووول قررنا نكمل طريجنا … تو الناس وين نروح ؟؟
يالله نفتر شويه وخلونا نروح شارع سالم المبارك
والا زحمه على الشارع العام والا هالاوادم اللي يبيعون سيديات منسوخه يعني كوبي هههههههه
والاوادم زحمه عليهم بعد
عاد اخذ خلطبيطه بين كويتيين وغير كويتيين وهنود وكل الجنسيات يبون يشترون
انزين لحظه وين البلديه عنهم ؟؟ شنو مايداومون مراقبي البلديه بالعيد والمناسبات الرسميه يعني والا شنو؟؟
والا قلتلي الاشاره اهيه يحك راسه ها بو فلان ؟؟ ههههههههههههههههههههه
عاد صادوه والا ماصادوه ؟؟
يالله يبا خنكمل طريجنا ماورانا شي
تدرون شلون يبا ؟؟
خلاص قررنا انا وزميلي ان نروح رحله بحريه في اليخت اللي صافطينه في مواقف سوق شرق لووووووول حشا مو يخت اللي صافط طقطاقي
وقررنا نرجع مره ثانيه حق سوق شرق
ههههههههه ولازال جسر سوق شرق زحمه واكيد المواقف اللي داخل مالك محط ريل
المهم احنا مالنا شغل عاد بنروح نوقف في مواقف الاعضاء المشتركين بالمرسى
لقطه عامه لسوق شرق والمراكب واليخوت اللي صافطه بالمرسى ويبدو يختنا منااااااااك على السطره اللي على اليمين
بس ورى شوي
ونزلنا تحت عشان نروح حق مركبنا … بس على فكره ترى مو هذا طرادنا لأ هذي لقطه جذي عابره قلنا خنصور صوره
وركبنا اليخت لكن شنو نشوف ؟؟
شفنا خير اللهم اجعله خير
شكلها السالفه بتصير لويه من الضباب اللي حاشنا
هههههههههههه يبدو انه الجو شوي مرطب وضباب وراح نعاني من مشكله عدم الرؤيه
وبالفعل كان الجو مضبب شوي ومايبين شي من داخل اليخت حتى عدسة الكاميرا ماقام يبين منها شي
وحركنا باليخت والرؤيه شبه معدومه
ومشينا واحنا مانشوف شي باليخت متجهين الى وجهتنا تريررررررررررم
يعني مؤثرات صوتيه وفلم رعب واحنا نمشي في عرض البحر والدنيا ليل والجو مضبب والجام مايبين منه شي
يعني قاعدين نمشي على عمانا
تدرون شلون ؟؟
راح نتوقف لي حد هني ونكمل ان شاءالله في القريب العاجل في رحلتنا اللي باليخت في وسط هالاجواء المعتمه واقولكم بعدين شنو صار
نيااهاهاهاهاهاهاهاهاهاها
تصوير وتعليق دندرن HaMaD