عندي واحد من الربع على قد حاله .. شاب لطيف ظريف خفيف كله بحال سبيله لاله ولاعليه … يعاني من التصحر اللي حايش راسه واللي اهو حايش كثير من شباب وبنات هالوقت … مادري يمكن الجو له تأثير فسيولوجي على فروة الراس او شي مني مناك مايندرى .. فتعددت الاسباب والصلعه واحده .. في من يقول انه بسبب الغتره والجل والكريمات بالنسبه للشباب وفي من يقول انه بسبب التمجّع والشباصات بالنسبه للبنات لكن ياترى شنو الحل لهذه المشكله اللي تؤرق الكثير من افراد مجتمعنا المعمور ؟؟
في من يلبس الكبوس والغتره والعقال 24 ساعه على صماخه عشان يخش الصلعه وبالنسبه للبنات طايحين وهابين بالتوصيل وسد الفراغات اللي تكون بالشعر وتحط كبّه من ورى اشكبرها يعني ترى شعري طويل واهي بالاساس مايندرى في شعر والا مافي شعر … الله اعلم ^_^
المهم مانطولها عليكم فبعد تفكير وتمحيص لقينا الحل نعم الحل موجود عندي وانا بو هندي …
الباروكه العجيبه .. ترم ترم نعم هي الباروكه العجيبه انتاج محلي من مصانع دندرن ليمتد
مميزات هذا النوع من البواريك …
1 – تلصق من أول مره … بمجرد ملامستها لفروة الرأس على طول مثل المغناطيس
2 – ماتفج ولاتنشلع الباروكه الا لما اتزهلقها وتدهنها بفازلين اربع مرات مع القليل من زيت الخروع الساخن يالله تنشلع
3 – قابله للغسيل والكوي سواءا في البيت أو المصبغه .. يعني تقدر اتوديها المصبغه تغسلها على البخار عادي مافي مايمنع
4 – تقدر اتسرّح البكله على كيف كيفك مره يمين ومره يسار ولازم يكون الفرق على جنب نفس ايام أوّل .. يعني شغل تسريحات قبل يادجّه ياتواليت
5 – نظرا لالتزامنا بالعادات والتقاليد تم مراعاة عدم قبول الباروكه العجيبه لأي نوع من انواع التسريحات العصرية مثل السبايكي والمارينز وخلافه
6 – يوجد بها مواد حافظه وكيمياويه تقتل الحشرات اللي تعشش في مثل هالأماكن من الراس
7 – يوجد دواء اضافي للباروكه العجيبه بقيمة 1,950 د.ك يساعد على نمو شعر الباروكه بشكل طبيعي بيسر وسهوله
8 – تخفي العيوب والمنحدرات في الراس الناتجه من جراء النوم الغلط للطفل في بداية ولادته
9 – ينصح بها في أيام وليالي الشتاء البراده جدا حيث انها تساعد على دفئ الراس وتحمي الانسان من الاصابه بنزلات البرد ( الانفلونزا) وتحمي فروة الرأس من المطر يعني شمسيتك منك وفيك
جميل جمال … ملوش مثال … ياسلام لي هالدرجه مو قادر تنسف الغتره عدل من البكله ؟؟
الله يهداك ذكرتني بالمسلسلات البدوية والممثلين اللي فيها اللي مايدرون ولايعرفون شي عن نسفة الغترة والعقال …
وبجذي عاش صاحبنا في سعاده وفرح وسرور .. والسبب من بعد الله سبحانه يعود الى الباروكه العجيبه … ترم تررررررررم