6/7/2007
السلام عليكم ورحمة الله وبركاته
كل عام وانتم بخير ان شاءالله وعسى ايامكم يارب كلها فرح وسرور واعياد
مرات الواحد يطق براسه اذا لقا عنده شوي متسع من الوقت ان يقوم باستكشاف اشياء لم تخطر له على بال (شدعوه بكتشف الذره عاد) المهم فتشوف المراكب والطراريد اتحوس جدامك جنها تقولك تعال خل اطق فيك فره صغيرونه في البحر ... فمنها شوية ترفيه ووناسه ووتغيير وتشوفون الكويت من البحر ... فيـ الله فوقه خل نروح انأجر لنا مركب صغيرون من صوب سوق شرق وندش بحر ... عاد التاجير رخيص مو غالي ... نتوكل على الله ونركب
هني تونا هاميّن في ركوب الطراد الصغيرون
هامين أي نهّم في ركوب الطراد الصغير
ويبحر فينا متوجها الى عرض البحر
وتمر من تحت جسر سوق شرق
واوووووه يامااااال ... اي تذكرنا ايام الغوص على اللؤلؤ
وهذا الحبيب النوخذه بن هندان ... قبطان المركب
ويمشي الهوينه مركبنا ... وكاسيروووه فله مادري شنهو فله
وتبين منااااك ابراج الكويت
وتشوف بعض ناطحات السحاب الكويتيه.. قاعدين يبنون ترى نطروا نطرووا ان شاءالله بتصير الكويت امية طبقه
وهذا برج التحرير واللي يعتبر خامس أعلى برج بالعالم ويبلغ ارتفاعه 372 متر
سوق شرق
زملاء مانعرفهم يقومون بنفس الرحله تقريبا هههههههههههه لاحقينهم بنشوف وين بيروحون
ابراج الكويت من صوب البحر ويبلغ ارتفاعهم 187 متر
وهذي مدينة الالعاب الاكوابارك حق التزحلق والتدحرج والشقلبات الاماميه والخلفيه شغل عدل الصراحه ... بس بالصيف مو بالشتا حق الانفلونزا ... الا عاد جان الواحد مينون ويروح بالشتا هذا شي ثاني الصراحه
سكّر بعد شويــــــه خل نصيد الشمس ههههههه ترى صعبه ياجماعه لأنه المركب مو ثابت صاعد ونازل
تذكرون سالفة الجاخور اللي في البحر ؟؟ في مره من المرارير سويت موضوع وقلت لكم عن سالفة الجاخور اللي بوسط البحر فتعالوا الحين نشوفه عن قرب وعن كثب
اثاريه لاجاخور ولاحتى بطيخه .. كل ماهنالك انه مركز تم بنائه مادري حق شنو والحداقه اشكثرهم صوبه يحدقون ومافيه الا غرفه وحده راح تشوفون شنو داخلها الحين
وهذا سلّم يودي للسطح ههههههه
وهذي الغرفه اللي فيه ماشوف داخلها الا جنها مغسله لليدين وصندوق طايح بوسط الغرفه بس هذا الموجود غيره ماشفت الصراحه
لا والباب امشرّع بعد
ونرجع الى حيث اتينا في اتجاه سوق شرق والجسر اللي تمر تحته ...
كاتبين على البوابه الحمدالله على السلامه ... يالله الله يسلمكم ان شاءالله
مرسى سوق شرق
ورجعنا لقواعدنا سالمين الحمدالله بأذن رب العالمين ونشوفكم ان شاءالله في رحلات قادمه
ترقبونا فالقادم مذهل اكثر
في أمان الله